SALMOS 104 - Biblia Guarani Tumpa Iñee

SALMO 104 Tumpa oyangareko opaete jembiapo reta re

¹ ¡Tamboete cheYa opaete chepɨa ndive! ¡CheYa Tumpa, tuichagüe yae ete ko nde! Reyemonde yemboetea pegua pe jare ikavi yae vae pe,

² reñeapeva tembipe pe, temimonde pe rami; ¡reipɨso ara, asoya oyepɨso rami!

³ Reñono reikoa ɨguasu iárambo, jare reñono amapɨtu reta nekäretourä, ɨvɨtu re reguata.

⁴ Ɨvɨtu reyapo neñee jerajaa ra, jare tata ko nderembiokuarä.

⁵ Nde reñono ɨvɨ iguapɨka reta re, agüɨye etei vaerä omɨi jenda güi.

⁶ Ɨguasu pe reñova ɨvɨ, temimonde pe rami, ɨ pe reyasoi ɨvɨtɨ reta.

⁷ Ërei nde reñeengata chupe reta yave, opa yogüɨraja; otekuarai reta neñeeäta oendu yave.

⁸ Oyeupi ɨvɨtɨ re, ogüeyɨ ɨvɨtɨ päu ipe kavi vae pe, jare ojo oï, nde rere chupea pe,

⁹ nde reñono chupe reta jembeɨrä, agüɨye vaerä oasa, ngaraa ye ma oñova ɨvɨ.

¹⁰ Nde ko remoë ɨesaɨ reta, ɨ osɨrɨ ɨvɨtɨ päu rupi vae reta.

¹¹ Jókuae ɨ güi oɨu opaete mɨmba ñana rupigua reta; pɨpe omboasa iɨuve mburika ñana rupigua reta.

¹² Jembeɨ rupi oyemboaitɨ güɨra reta; ¡jokoropi oñee reta ɨvɨra-räka rupi!

¹³ Nde ko remboɨu kaa reta, ɨvate reïa güi, ama pe remboɨu kavi ɨvɨ.

¹⁴ Rembokuakuaa kapii mɨmba reta peguarä, jare temitɨ reta kuimbae reta peguarä, güɨnoi vaerä jembiurä chugüi;

¹⁵ jókuae tembíu reta, omee vaerä mɨ̈rata chupe, vino, omboyerovia vaerä ipɨa, jare asaite pe jova jembipe kavi vaerä oyekuaa reta.

¹⁶ Jokɨ katu yandeYa iɨvɨra reta, ɨ̈vɨrare reta jae oñotɨ Líbano pe vae.

¹⁷ Jokoropi güɨra reta oyemboaitɨ, jare ɨvɨra pino jee vae reta re oñemoëta güɨratï reta.

¹⁸ Ɨvɨtɨ ɨvate vae reta kavara ñana rupigua reta peguarä, ɨ̈vavira reta, tapiti reta ikuarä.

¹⁹ Reyapo yasɨ, oyepapa vaerä ara reta; kuaraɨ oikuaa kërai yave oiketa ojo vae.

²⁰ Rembou pɨtumimbi, pɨ̈tu vaerä, jayave oë oguata mɨmba kaa rupigua reta.

²¹ Yaguapope oñee jembiarä re, jökorai oiporu Tumpa omee vaerä jembiurä.

²² Ërei köe yave, opa yogüɨraja reta, jare oputuu reta ikua rupi.

²³ Javoi kuimbae oë ojo iparavɨkɨa kotɨ, oparavɨkɨ iko pe kaaru regua.

²⁴ CheYa Tumpa, ¡opa rapeä ko roipapa nderembiapo reta! Opaete jókuae reta reyapo ndearakuaa katu reve; ¡ɨvɨ tɨnɨe oï nderembiapo reta pe!

²⁵ Joko oï ɨguasu, ipɨguasu jare puku yae vae, jeta yae pɨpe jevae reta, tuicha vae jare michi vae reta;

²⁶ jokoropi oguata barco reta, joko pe oime mbaeporou Leviatán jee vae, reyapo oyuvanga vaerä pɨpe.

²⁷ Opaete jókuae reta oäro ndegüi, remee vaerä jembiurä iara pe kavi;

²⁸ remee chupe reta, jare jae reta jou; ndepo reyora jare oyemoangapɨɨ reta ikavigüe pe;

²⁹ ërei, nde resɨrɨ chugüi reta yave, jae reta okɨɨye; reekɨ ipɨ̈túe yave, jae reta omano, opa ojo ye ɨvɨkuirä.

³⁰ Ërei rembou tekove yave, oyeapo ye, jökorai rembopɨau ye ɨvɨ iárambo.

³¹ ¡YandeYa iyemboetea opambae ko! ¡YandeYa oyerovia omae jembiapo reta re!

³² Jae omae ɨvɨ re yave, okana; ¡jae opoko ɨvɨtɨ reta yave, jätati!

³³ YandeYa pe tatairari aikove aï ramboeve; cheTumpa pe atairarita salmo, aikove aiko ramboeve.

³⁴ Chekɨ̈reɨ ngatu yaeta ayemongeta ikotɨ; che ayerovia katuta cheYa re.

³⁵ Topa tokañɨtei ɨvɨ güi iyoa vae reta, jupimbae reta topa tokañɨtei. ¡Tamboete cheYa opaete chepɨa ndive! ¡Aleluya!