SALMOS 103 - Biblia Guarani Tumpa Iñee

SALMO 103 Mbaemboete Tumpa iporerekua reta re

¹ Tamboete cheYa, opaete chepɨa ndive; tamboete opaete chepɨa ndive cheYa jee ikɨambae.

² Tamboete cheYa, opaete chepɨa ndive; agüɨye tacheakañɨ metei iporerekua güi ave.

³ Iñɨ̈ro ko cheve opaete cheyoa reta re, jae ko chembogüera opaete chembaerasɨ güi,

⁴ jae ko oepɨ cherekove tɨvɨa güi, jare chemboyekou mbaembae re jare iporoparareko re,

⁵ jae ko chemoangapɨɨ ikavigüe pe, jare chembotaɨrusu avei güɨraké rami.

⁶ YandeYa ko oporojäa jupi rupi, oyapo jupi rupi, oiporara vae reta peguarä.

⁷ Jae oikuaauka jemimbota Moisés pe, jare opaete jembiapo reta Israel iñemuña reta pe.

⁸ YandeYa, iporoparareko yae vae ko jare oyeaeä yae vae ko; jae mbaetɨ iyarasɨ raivi vae ko jare iporoparareko yae vae.

⁹ Mbaetɨ ko oñeengata avei yandeve, mbaetɨ vi iyarasɨ avei;

¹⁰ mbaetɨ vi oiporarauka yandeve, yandeyoa reta jare ikavimbae vae yayapogüe oï rupi;

¹¹ echa ara ipɨguasu yae rami ko tuicha iporoparareko, chugüi oipoɨu vae reta kotɨ.

¹² Kuaraɨ oëa, matɨ yae oï kuaraɨ oikea vae güi rami matɨ omondo yandepɨapochɨ reta yandegüi.

¹³ Michia re tu oiparareko omae rami ko, yandeYa oiparareko omae oipoɨu chugüi vae reta re;

¹⁴ echa, jae oikuaa kërai ko yande vae, oikuaa ko ɨvɨkuiño yande vae.

¹⁵ Kuimbae jekove ñana ramiño ko, ipotɨ kaa rupigua ñana rami:

¹⁶ Oasa ɨvɨtuakuvo jupi yave opa ipiru, jare mbaetɨ ye kia imaendúa jendagüe re.

¹⁷ Ërei yandeYa iporoparareko, opambae vae ko, oipoɨu chugüi vae reta re; imbaejupi jekuae kuae rupi vae ko,

¹⁸ Tumpa iporogüɨrökuavee päve oyapo vae reta re, jare iporookuai re imaendúa oyapo vaerä vae reta re.

¹⁹ YandeYa oñono iguapɨa ara pe, jare iporookuaía oï opaete re.

²⁰ ¡Pemboete yandeYa, opaete pe iaraɨgua reta! Pe pembaepuere yae vae, peyapo jae iporookuai reta vae.

²¹ ¡Pemboete yandeYa, opaete pe iaraɨgua reta! ¡Pe jembiokuai reta peyapo avei jemimbota vae!

²² ¡Pemboete yandeYa, opaete pe jembiapo reta, opaete jae iporookuaía oïa rupi! ¡Tamboete cheYa opaete chepɨa ndive!