SALMOS 102 - Biblia Guarani Tumpa Iñee

SALMO 102 Oiporara oï vae iyerure

¹ CheYa, eyeapɨsaka cheyerure re, ¡tojo toväe ndeve chesapúkai!

² Agüɨye chereeya chepɨatɨtɨ aï yave, emboɨke ndeapɨsa chekotɨ; ¡jarembae voi emboyevɨ cheve roenɨi yave!

³ Echa cherekove opa oï chegüi tätati rami; jare chekägüe reta opa ókai tatasɨgüe rami.

⁴ Chepɨa ipuere veä ma, ñana opa ipiru vae rami aï; ¡jáeramo, cheakañɨ tembíu güi ave!

⁵ Aiporara yae jeko pegua, chekägüe yepeaiño ma.

⁶ Surumbukuku ñuu rupigua jaeño vae rami ko che, suinda oñemoëta ogüe reta rupi rami ko che.

⁷ Mbaetɨ chepuere ake, güɨra jaeño oguapɨ o iárambo rupi vae rami ko che.

⁸ Ara ñavo cherovaicho reta oyapo ikavimbae cheve, jare iyarasɨ chekotɨ vae reta oyomboemboe cheré.

⁹ Jáeramo, jëe ngatúa cheve tembíu chepɨatɨtɨ güi, jare cheresaɨ oyea rami cheɨgua ndive.

¹⁰ Ndearasɨ yae jeko pegua, chereupi jare chemombo ɨvɨ re.

¹¹ Ara reta oasa ojo oiko chegüi, küaraɨa oasa ramiño; ñana ipiru ojo oiko rami aiko.

¹² Ërei nde cheYa, reiko avei vae ko; ¡nderee re imaendúa jekuae avei vae ko!

¹³ Epüa jare eiparareko mo Sión, echa oväe ma ko ara; ¡oväe ma ko neɨ̈ro chupe vaerä!

¹⁴ Nderembiokuai reta oaɨu omae jëtagüe ita reta re, ¡ipɨatɨtɨ omae reta jëtagüe opa oyemboai vae re!

¹⁵ Opaete tëtaguasu reta jare mburuvicha guasu reta oipoɨuta yandeYa jee imboetea yae vae güi.

¹⁶ YandeYa omopüa ye Sión yave, oyekuaa iyemboetea yave,

¹⁷ oendu yave ipuerembae oyeepɨ vae reta iyerure, oendu yave iyerure chupe reta.

¹⁸ Toyekuatía kuae, taɨkue rupi yogüɨrekota vae reta peguarä, jókuae ndei vɨteri oa vae reta omboete vaerä yandeYa.

¹⁹ Echa yandeYa omae oï ɨvate güi, jae omae ara güi ɨvɨ re,

²⁰ oendu vaerä tembipɨɨrɨru pe jäse ñogüɨnoi vae reta, oyora vaerä omano vaerä ma ñogüɨnoi vae reta;

²¹ jërakua vaerä Sión pe yandeYa jee, oyemboete vaerä Jerusalén pe,

²² oyemboatɨ yave opaete tëtaguasu reta ketɨ ketɨ güi, metei rami oyeokuai reta vaerä yandeYa pe.

²³ Jae chepɨ̈rata ombopɨtu chegüi; mbaetɨ omaeño aiko puku.

²⁴ Jare jae: “CheRu Tumpa, agüɨye chereekɨ ndei etei ɨma aikove aiko mbove.” ¡Nde neaño reta opambae ko!

²⁵ Iyɨpɨ ete pe nde ko reyapo ɨvɨ, jare ara jae ko nderembiapo.

²⁶ Jae reta opata ko okañɨtei, ërei nde reiko aveita; opaete jókuae reta temimonde rami ko indechita; ¡temimonde rami reipoepɨta, jare oyepoepɨ retata!

²⁷ Ërei ngatu nde ko oyepoepɨmbaei vae, neaño reta opambae vae ko.

²⁸ Nderembiokuai taɨ reta yogüɨrekota oipoɨumbae reve, jare iñemuña reta yogüɨreko aveita nderóvai.