SALMOS 10 - Biblia Guarani Tumpa Iñee

SALMO 10 Yerure jeko kavimbae reta okañɨtei vaerä

¹ CheYa, ¿maera pa mombɨrɨ reï? ¿Maera pa reñemi tembiporara iara pe?

² Jeko kavimbae ipɨayemboete reve omoña paravete vae. Ërei iyemongeta kavimbae pe aeño oa yeta kuri.

³ Echa jeko kavimbae oyemboete ipɨa jemimbota reño, imbaepotarai vae iñee kaviä, jare nereröɨro cheYa.

⁴ Jeko kavimbae, ipɨayemboete yae jeko pegua mbaetɨ ndereeka cheRu Tumpa; mbaetɨ oipoɨu ndegüi.

⁵ Oyapogüe oë kavi avei chupe. Neporojäa reta güi oñemoakañɨ etei ko; omotareɨ opaete jovaicho reta.

⁶ Ipɨa pe jei: “¡Ngaraai chemomɨi vae! ¡Ngaraai asusere!”

⁷ Iyuru tɨnɨe oï ñee ikavimbae pe, mborombotavɨ reta pe; iyuru pe oime yuvanga katu jare ikavimbae.

⁸ Okätɨro köiño tëta raɨ reta güi, oñemi oï, oyuka jekombae reta, osareko etei ipuere potambae vae re.

⁹ Oñemi okätɨro yaguapope ikua pe oï rami, okätɨro paravete vae re, oipɨɨ yave, güɨraja iñuai pe.

¹⁰ Opoñɨ jare ipe ipe, jare oa ipo pe ipuere potambae oyeepɨ vae reta.

¹¹ Ipɨa pe jei: “¡Tumpa iñakañɨ chegüi! ¡Oñomi jova ngaraa chereecha!”

¹² ¡Epüa cheYa Tumpa, eupi ndepo! ¡Agüɨye neakañɨ paravete vae reta güi!

¹³ Jeko kavimbae, ¿maera pa nemotareɨ Tumpa? Ipɨa pe jei: “¡Nde ngaraa rejäa vae!”

¹⁴ Nde reecha ko; echa remae jembiapo re jare iyuvanga katu re, ¡nde etei remee vaerä chupe jembiapo jekovia! Nderé oyemboya iyangarekoambae oiko vae. Nde ko jae tɨ̈reɨ omborɨ vae.

¹⁵ Eiyɨva rakɨo jupimbae vae. Eaɨkuemoña jeko kavimbae jeko opa remokañɨ regua.

¹⁶ YandeYa jae ko Mburuvicha guasu opambae vae jare jekuae avei vae. ¡Iɨvɨ güi opa okañɨtei tëtaguasu reta!

¹⁷ CheYa, ¡nde reendu oñemomichi vae reta iyerure! Nde remoäta ngatu jare reyeapɨsaka jese reta.

¹⁸ Reyapo jupi vae tɨ̈reɨ pe jare oiporara vae pe, agüɨye vaerä mo oporogüɨrekoasɨ katu kuimbae ɨvɨ pegua reta.