SALMOS 1 - Biblia Guarani Tumpa Iñee

LIBRO I SALMOS (1—41) SALMO 1 Jupi vae jare iyoa vae

¹ Oyerovia ko kuimbae, mbaetɨ oiko jeko kavimbae reta iporomboarakuaa rupi vae, mbaetɨ oiko iyoa vae reta jeko rupi vae, mbaetɨ oguapɨ Tumpa kotɨ mbae jei reve oyóyai vae reta ndive vae,

² jaeño oñono ipɨa yandeYa iporookuai re vae, jeseño oyemongeta ara rupi jare pɨ̈tu yave vae.

³ Jókuae nunga kuimbae ko metei ɨvɨra ɨ̈aka jembeɨ pe oï vae rami, ia iara oväe yave ia, jokɨ katu avei, mbaetɨ jo osururu. ¡Opaete mbaembae oyapogüe oë kavi chupe!

⁴ Ërei iyoa vae reta mbaetɨ jökorai, mbae javiyugüe ɨvɨtu güɨroveve vae rami.

⁵ Jáeramo iyoa vae reta mbaetɨta güɨropɨa morojäa iara pe; jare ngaraa ñogüɨnoi, jupi Tumpa jóvai vae reta ipɨte pe.

⁶ YandeYa oyangareko jupi rupi yogüɨreko vae reta re; ërei mbaeyoa rupi yogüɨreko vae reta okañɨteita.