RUT 4 - Biblia Guarani Tumpa Iñee

Booz omenda Rut ndive

¹ Jayave Booz ojo oguapɨ tëta guasu jöke yemboatɨa renda pe; jare ko ou jókuae kuimbae, Booz imiari jese vae, jare jei chupe: —Eyu räri kuae pe jare eguapɨ. Jare jókuae kuimbae ou oguapɨ.

² Jayave jae oenɨi payandepo kuimbae reta, tëta guasu pegua tenondegua reta jare jei: —Peguapɨ kuae pe. Jare jókuae kuimbae reta oguapɨ.

³ Javoi Booz jei jókuae jëtara pe: —Noemí ou ye ɨvɨ Moab güi vae, omeeta ñanerëtara Elimelec amɨri iɨvɨ.

⁴ Jare ayemongeta aikuaauka vaerä ndeve, jare amombeu ndeve, regua vaerä, kuae pe oguapɨ ñogüɨnoi vae reta jovake, jare cherëta pegua tenondegua reta jovake; nde reipota remboepɨ yave, emboepɨ, jare mbaetɨ yave reipota remboepɨ, emombeu cheve, che aikuaa vaerä; echa mbaetɨ yé ïru omboepɨ vaerä, jaeño nde, jare che nderaɨkue rupi. Jare jae jei chupe: —Che tamboepɨ.

⁵ Jayave Booz jei ye chupe: —Ɨvɨ regua yave Noemí güi, jókuae ara rerekota vi ko Rut Moab pegua, omano vae jembirekogüe, jókuae ɨvɨ oiko vaerä omano vae jee reño.

⁶ Jayave Booz jëtara jei: —Jökorai ko yave, mbaetɨta amboepɨ, agüɨye vaerä arokomegua chembaeyekou. Nde emboepɨ; tamboasa ndeve, echa mbaetɨta chepuere amboepɨ.

⁷ Jókuae ara rupi Israel pe teko jae ko, oñoëtara vae omboasa yave mbae oyoupe ani ramo mbae omee oyoupe yave, omoañete vaerä oipotagüe yemongeta, jókuae omee vae omboi ipɨapaa jare omee jókuae ogua vae pe; körai kuae nunga oyeapo Israel pe, yemongeta oñemoañete vaerä.

⁸ Jayave Booz jëtara jei: —Nde egua. Jare omboi ipɨapaa omee chupe.

⁹ Jare Booz jei tenondegua reta pe jare opaete joko pe ñogüɨnoi vae reta pe: —Opaete perovake ayapo kuae; Noemí güi agua aï opaete Elimelec amɨri iɨvɨ jare opaete Quelión jare Mahlón imbae.

¹⁰ Jare arekota vi cherembirekorä Rut, Moab pegua, Mahlón amɨri jembirekogüe; jókuae ɨvɨ oiko vaerä omano vae jee reño, agüɨye vaerä jókuae omano vae jee oyemboai jëtara ipɨte güi jare iɨvɨ güi.

¹¹ Jare tenondegua reta jare opaete joko pe ñogüɨnoi vae reta jei: —Orerovake ko reyapo. ¡YandeYa toyapo ndeve jókuae kuña oiketa ndero pe vae Raquel jare Lea rami, kuae reta güi oñemuña tëta Israel! Jare nde eiko kuimbae tuicha yae vae Efrata pe, jare jërakua vae Belén pe.

¹² Jare neñemuña toiko Fares iñemuña rami. Fares ko jae Tamar imembɨ, Judá taɨ; jókuae kuñatai rupi yandeYa tomee neñemuñarä.

¹³ Booz güɨreko Rut, jare yandeYa omee ipurúa vaerä Booz pe jare imembɨ metei kunumi raɨ.

¹⁴ Jare kuña reta jei Noemí pe: —Toyemboeteuka yandeYa, jae omee ndeve neramarirorä, kuae jee jërakua yaeta Israel pe;

¹⁵ kuae oikota ndemoingove katu vaerä jare ndeangareko vaerä netɨ̈aro yae ma yave; echa nemembɨtatɨgüe nderaɨu yae vae imembɨ ko, Rut iporomborɨ ko ndeveguarä ikavi yae ete, renoi yave chiu nemembɨraɨe reta güi.

¹⁶ Jare Noemí oipɨɨ michia raɨ, jare oñono jäpapau pe, jare oyangareko jese ombokuakuaa regua.

¹⁷ Jare jëta iyɨpɨ pegua reta ombojee, jei reta reve: —¡Noemí pe oa metei kunumi! Jare ombojee reta Obed. Kuae ko jae Isaí tu, David tamɨi.

David iñemuñagüe reta

¹⁸ Kuae ko jae Fares iñemuña reta: Fares taɨ jae ko Hezrón;

¹⁹ Hezrón taɨ ko Ram, jare Ram taɨ ko Aminadab;

²⁰ Aminadab taɨ ko Naasón; Naasón taɨ ko Salmón;

²¹ Salmón taɨ ko Booz; Booz taɨ ko Obed;

²² Obed taɨ ko Isaí; jare Isaí taɨ, jae David.