RUT 3 - Biblia Guarani Tumpa Iñee

Rut jare Booz mbaembopiriría renda pe

¹ Jókuae güire Noemí jei Rut pe: —Chemembɨ, che taeka nemerä, reiko kavi vaerä.

² Booz jae ko orerëtara, jembiokuai kuña reta ndive nde reiko vae, kuae pɨ̈tu ojota kó pe ombaemboveve, omboyao vaerä cebada ipiregüe güi.

³ Jayave eyau, eñemokäti kavi, jare emonde nderemimonde ikavi vae, jare ekua jokotɨ mbaembopiriría renda pe; ërei agüɨye eyeechauka chupe, jae opa regua okaru jare oɨu.

⁴ Jare emae kavi jese ketɨ ra oyapakuata oke vae, javoi ekua eipea itɨma, jare eyapakua joko pe; jare jae jeita ndeve mbae ko reyapota vae.

⁵ Jare Rut jei chupe: —Tayapo opaete nde cheokuai vae.

⁶ Jayave ojo kó kotɨ jare oyapo opaete imesɨgüe oyókuai rami.

⁷ Jare Booz opa ma okaru jare oɨu yave, oyerovia katu reve ojo oyapakua oke mbaeatɨ iyɨpɨ pe. Jayave Rut kïrii ngatu ou oipea chugüi itɨma jare oyapakua joko pe.

⁸ Jare pɨare mbɨte ma yave, jókuae kuimbae güɨramoiño osareko jare oyere yave oñeiämondo, echa metei kuña oyapakua oï itɨma rupi.

⁹ Jayave Booz oparandu chupe: —¿Kia pa nde? Jare Rut jei chupe: —Che ko Rut nderembiokuai, nde ko cheme amɨri jëtaragüe, emenda che ndive.

¹⁰ Jayave Booz jei: —¡YandeYa tiporerekua nderé! Ikavi vae ko reyapo tenonde reyapo vae güi. Ndepuere tëi reeka kuimbae taɨrusu vae, oikokatu vae ani ramo paravete vae.

¹¹ Ërei, añave agüɨye ekɨɨye; tayapo nde ndive nde rere vae, echa opaete cherëtaɨgua reta oikuaa nde ko jae metei kuña jeko kavi yae vae.

¹² Mase, añete che ko jae jókuae kuimbae jëtara, ërei oime ko ïru ma köiño chugüi vae.

¹³ Añave neköe kuae pe, pɨareve yaikuaata jae oipotata ra ndemboepɨ vae, oipota yave tandemboepɨ; ërei mbaetɨ yave oipota ndemboepɨ, che romboepɨta. YandeYa jee re kuae jae ndeve, añave eputuu köe regua.

¹⁴ Jare oke güire itɨma rupi köe regua, Booz opüa ndei köe kavi mbove; echa jei: “Agüɨye toikuaa metei ave, kuae kuña ou ko kuae kó pe vae.”

¹⁵ Javoi jei chupe: —Eru reñeapeva pɨpe vae, jare eipɨɨ. Jare jae oipɨɨ ramboeve, Booz oñono pɨpe cebada cuarenta kilo oasa, javoi ombovoɨ; jare ojo tëta guasu kotɨ.

¹⁶ Jare ou ye ma oväe yave, imesɨgüe oparandu chupe: —¿Kërai pa reguata chemembɨ? Jare omombeu chupe opaete jókuae kuimbae ndive imiari vae.

¹⁷ Jare jei: —Kuae cebada omee cheve, jei cheve reve: “Agüɨye vaerä ndepogüɨrai reyerova ye nemesɨgüe kotɨ.”

¹⁸ Jayave Noemí jei: —Chemembɨ, eäro añave, yaikuaa regua këraita ra oyeapo kuae teko vae; echa jókuae kuimbae ngaraa ikuérai opa oyapo kavi regua kuae teko.