Romanos 9 - Biblia Guarani Tumpa Iñee

Israel pegua reta iyeparavo

¹ Che Cristo re jae añete vae. Mbaetɨ ko cheapu, echa chepɨa pe aikuaa Espíritu Santo rupi,

² kërai chepɨatɨtɨ yae, jare chepɨa etei jasɨ avei.

³ Echa aipotaecha ayembosɨrɨ Cristo güi, metei yepopeyu oa jese vae rami, aaɨu ramo, cherɨvɨ reta. Jae ko cherëtara reta.

⁴ Jae ko Israel iñemuña reta. Tumpa oyapo taɨ retarä. Oechauka iyemboetea chupe reta. Oyapo morogüɨrökuavee päve jae reta ndive, jare oikuaauka vi chupe reta Moisés iporookuai. Oyeokuai reta Tumpa pe jare jae oñererökuavee chupe reta.

⁵ Jae reta vi ko ñaneñemuñagüe reta iñemuña, jare jupi reta Cristo ou oyeapo kuimbaerä. Tumpa etei ko. Jae ko opaete mbaembae iYa. Toyemboeteuka jekuae avei pegua. Amén.

⁶ Kuae mbaetɨ ko Tumpa oñererökuavee Israel pe vae oyembopoä, echa opaeteä ko Israel iñemuña reta, Israel iñemuña añetete vae.

⁷ Jaeramiño vi opaeteä ko Abraham iñemuña reta, taɨ añetete vae. Echa Tumpa jei Abraham pe körai: “Isaac rupi renoita neñemuña añetete vae.”

⁸ Kuae oipota jei, kuimbae jemimbota rupi ou ñemuña vae rupiä ko Tumpa taɨ reta. Jaeño Tumpa güɨrökuavee vae rupi oñemuña vae reta ko jae ñemuña añetete vae reta.

⁹ Echa Tumpa jei Abraham pe, körai: “Körai yave ïru año ayu yeta ndépɨri, jayave Sara oimeta ma imembɨ.”

¹⁰ Ërei jokuaeñoä ko. Echa Rebeca imembɨ vae, imembɨ ko metei kuimbae güiño, jae ko ñaneñemuñagüe Isaac.

¹¹ Ërei ndeiño oa chaguakiri reta. Jare ndeiño oyapo ikavi vae ani ikavimbae vae mbove (kuae ko Tumpa oiparavo jae jemimbota rupi oiko vaerä; mbaetɨ oiparavo jembiapo rupi, jaeño jae jemimbota rupi),

¹² Tumpa jei Rebeca pe körai: “Tenondegua oyeokuaita taɨkuegua pe.”

¹³ Echa Tumpa Iñee pe oyekuatía oï körai: “Aɨu Jacob jare aröɨro Esaú.”

¹⁴ ¿Mbae pa yaeta jayave? ¿Tumpa jupiä pa jayave? ¡Mbaetɨ ko!

¹⁵ Echa Tumpa jei Moisés pe körai: “Aipararekota ko chekɨ̈reɨ aiparareko vae. Jare chepɨakavita ko chekɨ̈reɨ chepɨakavi chupe vae pe.”

¹⁶ Jáeramo, mbaetɨ yande yaipota vae ani ayemoambeko vae rupi, jaeño Tumpa iporoparareko rupi.

¹⁷ Echa Tumpa Iñee jei Faraón pe: “Kuaerä etei che roparavo mburuvicha guasurä, aechauka vaerä nderé chembaepuere, oñemoërakua vaerä cheree opaete ɨvɨ rupi.”

¹⁸ Jáeramo, Tumpa oiparareko, ikɨ̈reɨ oiparareko vae. Jare ombopɨatäta, ikɨ̈reɨ ombopɨatäta vae.

¹⁹ Jáeramo, güɨramoi rereta cheve: “Jökorai yave, ¿maera pa Tumpa yandemboeko? Echa mbaetɨ kia ipuere oyopia jae jei vae.”

²⁰ Ërei nde, kuimbae ¿kia pa nde reñeengata vaerä Tumpa pe? Echa ɨvɨyapepo ¿ipuere pa iñeengeta iyapoa pe, jei: “Maera pa nde cheapo körai”?

²¹ Echa oñaeu-apo vae ¿ipuereä pa oyapo ñaeu güi jae oipota vae? Oyapo ko metei ñaeu güiño ɨvɨyapepo yemboete pegua jare ïru oyeporuiño vaerä.

²² Tumpa iyarasɨ ipuere tëi omboyekuaa jare jërakua imbaepuere, ërei güɨropɨa guasu jókuae iyarasɨ kuimbae reta, kañɨtei peguarä vae reta pe,

²³ jae omoërakua vaerä iyemboetea tuicha yae vae, omboyekuaa iporoparareko rupi, jókuae omokätɨro ma iyɨpɨ güive chupe reta yemboetea peguarä vae;

²⁴ kuae reta vi oenɨi, jae ko yande reta. Mbaetɨ judío reta güiño, judiombae vae reta güi vi.

²⁵ Oseas oikuatía vae pe jei rami: “Tenonde yave tëta mbaetɨ chembae vae, oyeapota ko chembae retarä; jare tenonde yave mbaetɨ aaɨu vae reta, añave aaɨuta ko.

²⁶ Tenonde yave che jae peve: ‘Pe reta chembaeä ko.’ Joko pe etei peñeenɨita ‘Tumpa oikove vae taɨ reta.’ ”

²⁷ Jare Isaías jei iñeeäta reve Israel pegua reta re: “Yepe tëi jeta yae ko Israel iñemuña reta, ɨguasu jembeɨ pegua ɨvɨkuitï jeta yae rami, ërei jembɨregüeño ko oyemboasata;

²⁸ echa yandeYa oiporaraukata jupi rupi jare jarembae kuae ɨvɨ pe.”

²⁹ Echa tenonde yave Isaías jei rami. Echa jei: “YandeYa Imbaepuere yae ete vae, mbaetɨ yave mona oeya yandeve ñaneñemuña, yapɨtata viña Sodoma jare Gomorra rami.”

Yembojupi Tumpa omee mborogüɨrovia rupi vae

³⁰ ¿Mbae pa yaeta? Kërai judiombae vae reta, mbaetɨ yepi oeka oyembojupiuka vaerä vae, añave oyembojupiuka ma ko mborogüɨrovia rupi;

³¹ ërei Israel pegua reta oipota tëi oyembojupiuka mborookuai jei vae rupi vae, mbaetɨ oyembojupi reta.

³² ¿Maera ra mbaetɨ oyembojupiuka? Echa mbaetɨ oyapo reta mborogüɨrovia rupi. Mborookuai jei vae oyapo vae reño oipota oyembojupiuka reta. Jáeramo ipɨ̈sa-yeyuka reta ita pɨ̈sa-yeyuka pegua re.

³³ Echa Tumpa Iñee pe oyekuatía oï körai: “Mase, che añono Sión pe, ita pɨ̈sa-yeyuka pegua jare ita guasu oporoitɨ vae, ërei güɨrovia jese vae, ngaraa oñemomaraiuka.”