Romanos 7 - Biblia Guarani Tumpa Iñee

Menda re oyembojaanga vae

¹ Cherɨvɨ reta, peikuaa ko mborookuai jei vae. Peikuaa ko kërai mborookuai güɨnoi mbaepuere metei kuimbae re, oikove oiko ramboeve.

² Echa mborookuai pe jei, kuña omenda vae, ime oikove oiko ramboeve oikota ko ime jeia re. Ërei ime omano yave, oyeyora ko jókuae mborookuai güi.

³ Jáeramo, kuña imegua yave, oyuvanga ko menda re. Ërei ime omano chugüi yave, oyeyora ko jókuae mborookuai güi. Jayave omenda yave ïru kuimbae ndive, mbaetɨ ko oyuvanga menda re.

⁴ Jaeramiño vi, pe cherɨvɨ reta, pemano ko mborookuai güi Cristo imano rupi, peiko vaerä Cristo oikove ye omanogüe reta ipɨte güi vae re, peyapo vaerä ikavi vae Tumpa peguarä.

⁵ Echa yaikove yaiko ramboeve, yayapose yandepɨa jemimbota reta ikavimbae vaeño, mborookuai jei agüɨye vaerä yayapo ramo, jare yandereraja mano kotɨ.

⁶ Ërei añave yayeyora ma mborookuai güi, ñamano ma jókuae yayeokuaise chupe vae güi ramo, yandepuere yayeokuai ipɨau vae Espíritu pegua pe, jare agüɨye mo yayeokuai mborookuai indechi vae jei vae pe.

Mbaeyoa oiko chepɨa pe vae

⁷ ¿Mbae pa yaeta? ¿Yaeta pa mborookuai jae ko mbaeyoa? ¡Mbaetɨ ko! Ërei che mborookuai rupi aikuaa mbaeyoa. Echa ngaraa tëi aikuaa mbaepotarai, mborookuai mbaetɨ yave mona jei: “Agüɨye pembaepotarai.”

⁸ Ërei mbaeyoa jeieteño oparavɨkɨ chepɨa pe chembaepotarai vaerä, mborookuai cheopia ramo; echa mbaetɨ yave mborookuai, mbaetɨ aikuaa mbaeyoa regua.

⁹ Tenonde yave mbaetɨ aikuaa mborookuai jei vae yave, aiko güɨraveño; ërei aikuaa ma yave mborookuai jei vae, aikuaa cheyoa ko jare aikuaa amano ko.

¹⁰ Jare jökorai, aikuaa mborookuai tekove peguarä vae, cheveguarä mano;

¹¹ echa mborookuai cheopia ramo, mbaeyoa jeieteño oparavɨkɨ chepɨa pe jare chembotavɨ; jare mborookuai rupi cheyuka.

¹² Ërei mborookuai ikɨambae ko, jare mborookuai jei vae ikɨambae ko, jupi ko jare ikavi vae ko.

¹³ Jayave, ¿jókuae ikavi vae, chererajata pa mano kotɨ? ¡Mbaetɨ ko! Jae ko oyekuaa vaerä mbaeyoa, añetete ko mbaeyoa vae ramo, cheyuka jókuae ikavi vae rupi; jökorai mborookuai jei vae rupi ou oyekuaa mbaeyoa ikavimbae yae ko vae.

¹⁴ Echa yaikuaa mborookuai espíritu pegua ko; ërei che aiko soo jemimbota reño, añemee mbaeyoa pe.

¹⁵ Echa ayapogüe mbaetɨ aikuaa; echa chekɨ̈reɨ tëi ayapo vae mbaetɨ ayapo. Ërei aröɨro vae, jókuae ayapo.

¹⁶ Jáeramo aikuaa mborookuai ikavi vae pegua ko. Echa ayapo cheäteɨ tëi ayapo vae.

¹⁷ Jáeramo ikavimbae vae ayapo vae, mbaetɨ ko che aeño ayapo, mbaeyoa chepɨa pe oiko vae ko oyapo.

¹⁸ Aikuaa mbaetɨ ko mbae ikavi vae anoi cheyé. Echa chekɨ̈reɨ tëi ayapo mbae ikavi vae, ërei mbaetɨ chepuere ayapo.

¹⁹ Echa mbaetɨ ayapo ikavi vae chekɨ̈reɨ tëi ayapo vae. Jaeño ayapo ikavimbae vae, cheäteɨ tëi ayapo vae.

²⁰ Jáeramo oyapo yave che aipota vae, cheä ko ayapo, mbaeyoa chepɨa pe oiko vae ko oyapo.

²¹ Jökorai, ikavi vae chekɨ̈reɨ tëi ayapo yave, aecha cheyé, ikavimbae vaeño oï cheré.

²² Echa cheɨvɨte pe avɨakatu Tumpa iporookuai re;

²³ ërei aecha ïru mborookuai cheyé, jókuae oyovaicho ayemongeta tëi ayapo vaerä vae ndive. Jae ko mbaeyoa oï cheré vae, güɨnoi mbaepuere cheré.

²⁴ ¡Këraita pa aiko! ¿Kia ra cheyorata mano imbaepuere oï cheré vae güi?

²⁵ Yasoropai amee Tumpa pe, jae cheyora yandeYa Jesucristo rupi. Jáeramo, chekɨ̈reɨ reve ayemongeta ayapo vaerä Tumpa iporookuai jei vae, ërei cherete oipota mbaeyoa jemimbotaño.