Romanos 2 - Biblia Guarani Tumpa Iñee

Tumpa iporojäa jupi rupi

¹ Jáeramo nde kuimbae: “Mbaetɨ aikuaa” rere rapeä ko. Echa nde remboeko yave ïru vae, reyemboeko vi ko nde aeño, echa nde reporomboeko vae, teko iyapoa vi ko.

² Ërei yaikuaa Tumpa iporojäa añete vae rupi ko, jókuae teko ikavimbae vae iyapoa reta kotɨ.

³ Jare nde kuimbae, reporomboeko vae, nde vi teko iyapoa vae, ¿reyemongeta pa reasayepeta Tumpa iporojäa güi?

⁴ Reröɨro Tumpa ipɨakavi jare ipɨaguasu yae ndeve vae. ¿Mbaetɨ pa reikuaa ipɨakavi ko ndeve, reeya vaerä ikavimbae ndepɨa pe oï vae?

⁵ Ërei ndepɨatäta jare mbaetɨ reeya ikavimbae vae ndepɨa pe oï vae rupi, remboatɨ ndeyeupe aeño Tumpa iyarasɨ, jae iporojäa jupi rupi vae iara oyekuaa yave.

⁶ Jare jae amboekoviata metei ñavo vae pe jembiapo oï rupi:

⁷ Omeeta tekove opambae vae, jókuae ipɨaguasu reve oyapo ikavi vae, jare oeka mbaemboete jare manombae vae pe;

⁸ ërei oiporaraukata iyarasɨ yae reve ipɨapochɨ vae reta pe, mbaetɨ oipota reta oyapo añete vae. Ikavimbae vaeño oyapo reta vae pe;

⁹ oiporarata ko jare ipɨatɨtɨta ko opaete ikavimbae oyapo vae reta, tenonde ete judío reta, jaɨkue rupi judiombae vae reta vi.

¹⁰ Ërei imboeteata jare ipɨakatuta, opaete ikavi vae oyapo vae reta, tenonde ete judío reta, jaɨkue rupi judiombae vae reta vi.

¹¹ Echa Tumpa mbaetɨ ko oporomboyoavɨ.

¹² Echa opaete iyoa Moisés iporookuai mbaetɨ güɨnoi reve vae, mborookuai güɨnoimbae reve yogüɨrajata kañɨtei pe. Ërei opaete iyoa Moisés iporookuai güɨnoi reve vae reta, oñejäaukata jókuae mborookuai rupi;

¹³ echa Tumpa jóvai mbaetɨ ko jupi mborookuai oenduiño vae reta, mborookuai jei vae oyapo vae reta ko Tumpa ombojupita.

¹⁴ Echa judiombae vae reta, yepe tëi mbaetɨ güɨnoi Moisés iporookuai, ërei oyapo reta mborookuai jei vae iyeugüi aeño mbaetɨ tëi güɨnoi reta reve. Kuae reta yepe tëi mbaetɨ güɨnoi mborookuai, ërei jae reta ipɨa pe etei ko güɨnoi iyeupe mborookuai.

¹⁵ Echa oikuaauka reta mborookuai jei vae oyekuatía oï ipɨa pe vae. Oikuaa reta vi ipɨa pe, mbae ikavi vae oyapo vaerä vae. Jáeramo iyemongeta rupi oyemboeko retata ani oyeepɨ retata,

¹⁶ jókuae ara Jesucristo rupi Tumpa ojäa yave, opaete kuimbae reta jembiapo oyekuaambae vae, ñee ikavi vae che amombeu vae rupi.

Judío reta jare Moisés iporookuai

¹⁷ Mase, nde reyeko judío pe, reyeko mborookuai re, jare reyembotuicha Tumpa re.

¹⁸ Nde reikuaa jemimbota jare mborookuai jei vae rupi reikuaa kavi mbae reyapo vaerä.

¹⁹ Nde reyererovia katu reroata vaerä jesambae Tumpa jóvai vae reta, jare remboesape pɨtumimbi pe ñogüɨnoi vae reta pe;

²⁰ remboe vi mbaetɨ mbae oikuaa vae reta jare michia reta. Echa mborookuai re renoi arakuaa jare añete vae.

²¹ Nde remboe ïru vae, ¿maera pa reyemboeä nde etei? Nde remoërakua ïru vae reta pe agüɨye vaerä imonda, ¿maera pa nde ndemonda?

²² Nde rere ïru vae reta pe agüɨye vaerä oyuvanga menda re, ¿maera pa nde reyuvanga menda re? Nde reröɨro tumpa-raanga reta, ¿maera pa jayave reñomi mbaembae ikavi vae itupao güi?

²³ Nde reyemboete mborookuai renoi re, ërei remboeteä Tumpa mborookuai reyavɨ vae rupi.

²⁴ Echa Tumpa Iñee pe oyekuatía oï körai: “Judiombae vae reta jei ikavimbae vae Tumpa kotɨ pereko pegua.”

²⁵ Reyembocircuncidauka vae jaekavi ko, Moisés iporookuai jei vae reyapo yave. Ërei mbaetɨ reyapo mborookuai jei vae yave, reyembocircuncidaukambae rami ko.

²⁶ Jare oyembocircuncidambae vae oyapo yave mborookuai jei vae, jae oyeapo ko metei oyembocircuncida vae rami.

²⁷ Jare oyembocircuncidambae jete pe vae, oyapo mborookuai jei vae yave, ndemboekota ko. Echa nde reyapoä mborookuai jei vae, renoi tëi reve mborookuai oyekuatía oï vae ani reyembocircuncidauka.

²⁸ Echa metei judío, mbaetɨ ko judío oyekuaa vae rupiño. Jaeramiño vi metei oyembocircuncidauka vae, mbaetɨ ko jete pe oyembocircuncidauka vae güiño.

²⁹ Ërei judío añetete vae, ipɨa pe etei oï vae jeko pegua ko. Jaeramiño vi metei oyembocircuncidauka vae, ipɨa pe etei ko oyembocircuncida, Espíritu rupi, mbaetɨ oyekuatía oï vae jeko peguaño. Kuae nunga, Tumpa omboeteuka, yepe tëi ïru vae reta mbaetɨ omboete.