PROVERBIOS 9 - Biblia Guarani Tumpa Iñee

Arakuaa katu jare arakuaambae

¹ Arakuaa katu oyapo jorä, omopöra chiu okɨta pe;

² oyuka mɨmba arete peguarä, omboyea vino, ikavi yae vaerä, oñono kavi imesa,

³ jare omondo jembiokuai kuña reta osapúkai vaerä, tëta guasu pe ɨvate yaea güi,

⁴ jei reta: “¡Peyu kuae kotɨ, yarakuaambae reta!” Omondo jei mbaetɨ oyemongeta kavi vae reta pe:

⁵ “Peyu pekaru, jare peu vino amboyea kavigüe.

⁶ Peeya mo ïkotɨa pearakuaambae, jare peikoveta; peiko mo arakuaa katu rupi.”

⁷ Oporoyóyai yóyai vae omboarakuaa vae, oñemomaraiukata ko; iyoa vae pe omboeta vae, oyapo ko iyeupe tovaicho.

⁸ Agüɨye emboeta oporoyóyai yóyai vae pe, agüɨye vaerä nemotareɨ; emboarakuaa iyarakuaa katu vae, jare jae nderaɨuta.

⁹ Emee arakuaa iyarakuaa vae pe, jare iyarakuaa yae eteta; emboe jupi vae, jare oñemoïruta chupe iyarakuaa.

¹⁰ Arakuaa katu jae ko yandeYa güi yaipoɨ u vae; Iyoambae yaikuaa vae, jae ko arakuaa katu.

¹¹ Echa che arakuaa katu re ko reiko pukuta, jare oñemoïruta ndeve ɨma año reiko vaerä.

¹² Ndearakuaa katu ko yave, ndeyeupegua ko; ërei ndeporoyóyai yoyaise ko yave, nde aeño ko reiporarata.

¹³ Kuña iyarakuaambae tekorai iyapoa ko, mbaetɨ etei ko yarakuaa.

¹⁴ Jöke pe oguapɨ metei siya pe, tëta guasu pe ɨvatea pe,

¹⁵ oyepoeru vaerä oguata vae reta pe, tape rupi sɨmbi oasa vae reta pe,

¹⁶ jei yarakuaambae pe: “¡Eyu kuae pe!” Jei mbaetɨ oyemongeta kavi vae reta pe:

¹⁷ “Ɨ oñeomigüe ko jëe ngatu yae; tembíu yau vɨari vae ko jee ngatu yae.”

¹⁸ Ërei jae reta mbaetɨ oikuaa, ñogüɨnoi ma ko omanogüe reta ñogüɨnoia pe, jókuae oyeparea chupe vae reta.