PROVERBIOS 8 - Biblia Guarani Tumpa Iñee

Arakuaa katu iñemoñee

¹ Arakuaa osapúkai; arakuaa katu iñeeäta.

² Oyemboɨ ɨvate tape jembeɨ pe, oyemboɨ tape oyoasaa pe,

³ öke reta iyɨke pe, tëta guasu jöke pe, oñemoñee, jei:

⁴ “Kuimbae reta, peve ko jae kuae ñee reta,

⁵ pe, yarakuaambae reta, peyemboe peyeandu katu vaerä jare pepoki vaerä.

⁶ Peyeapɨsaka, chemiarita peve mbae ikavi yae vae re, ñee isɨmbigüe re.

⁷ Kuae jaeta vae añetete vae ko; mbaetɨta chemiari apu.

⁸ Opaete cheñee reta jupi ko; mbaetɨ etei pɨpe jupimbae ani ñape vae.

⁹ Iyarakuaa katu vae pe jare ipoki reve mbae oyapo vae pe, ikavi yae ko cheñee reta, mbaetɨ etei pɨpe yemboavai.

¹⁰ Korepoti jare oro ikavigüe jekovia pe, peipɨɨ cheporomboe jare cheporomboarakuaa.”

¹¹ Echa arakuaa katu ko ikavi yae ita ipöra yae vae güi; ¡mbae ipotaa yae vae ave ngaraa omboyovake!

¹² Che, arakuaa, cheïru jae ko arakuaa katu, jare anoi arakuaa yemboarakuaa pegua.

¹³ YandeYa güi yaipoɨu vae, jae ko ñaröɨro ikavimbae vae. Che aröɨro ko pɨayemboete, yembotuicha, teko ikavimbae jare apu.

¹⁴ Cheré oï yemboarakuaa jare arakuaa kavi, che ko jae arakuaa katu, chembae ko mbaepuere.

¹⁵ Cherupi oporookuai mburuvicha guasu reta, jare mburuvicha reta jupi rupi mbae oyapo vae.

¹⁶ Cherupi mburuvicha reta güɨnoi mbaepuere, jare mburuvicha reta oporojäa kavi ɨvɨ pe.

¹⁷ Che aɨu cheraɨu vae reta, jare chereeka voi vae reta cheväe.

¹⁸ Cheré ko oï mbaeyekou jare mboromboete, mbaeyekou opambae jare yembojupi.

¹⁹ Che amee vae ko ikavi yae ete oro oyembokavigüe güi; che amee vae ko ikavi yae ete korepoti oyeambae güi.

²⁰ Che aja tape isɨmbi vae rupi, tape ikavigüe rupi.

²¹ Cheraɨu vae reta pe amee mbaeyekou: Jare jo amotɨnɨe mbaembae jepɨ vae pe.

²² “YandeYa cherenoi iyɨpɨ güive voi, ndei jae omboɨpɨ opaete mbaembae oyapo mbove.

²³ Aikoño mai iyɨpɨ güive voi, ndei ɨvɨ oyeapo mbove.

²⁴ Ndei ɨguasu reta oyeapo mbove oime ma aiko, ndei ɨesaɨ reta oyeapo mbove.

²⁵ Ndei ɨvɨtɨ guasu reta jare ɨvɨtɨ reta oyeapo mbove oime ma aiko,

²⁶ yandeYa ndei ave vɨteri oyapo ɨvɨ jare ñana reta yave, ɨvɨkúi ave mbaetɨño.

²⁷ Jae oyapo ara yave che joko pe aï, oasavi vae oyapo ɨguasu iárambo yave,

²⁸ oñono kavi ara ɨvate yave, ɨguasu jugua oyapo yave,

²⁹ oyókuai ɨguasu agüɨye vaerä oasa jembeɨ güi yave, oñono ɨvɨ iguapɨ ka re yave,

³⁰ joko pe che aï jae ndive, amborɨ añono kavi opaete mbaembae. Che ko amboyerovia katu avei vae, ayerovia katu avei jae jóvai opaete ara rupi;

³¹ ayerovia katu ɨvɨ oyeapo ramo vae pe, ¡chemboyerovia katu yae ko kuimbae reta!

³² Añave, cheraɨ reta, peyeapɨsaka cheré; oyerovia ko chereko omomoe vae.

³³ Peyeapɨsaka yemboarakuaa re, pearakuaa peyeupe; agüɨye peröɨro.

³⁴ Oyerovia ko jókuae oyeapɨsaka cheré vae, jare ara ñavo cheräro chero jöke pe vae.

³⁵ Echa cheväe vae, tekove ko oväeta, jare oväeta yandeYa ipɨakavi;

³⁶ ërei chekotɨ iyoa vae, jae aeño ko oñererokomegua, ¡opaete chereröɨro vae reta, mano ko oaɨu!”