PROVERBIOS 7 - Biblia Guarani Tumpa Iñee

Kuña iyaguasa pota vae ipoki oporombotavɨ vae

¹ Cheraɨ, eendu cheñee reta, eñovatu ndepɨa pe cheporookuai reta.

² Eendu cheporookuai reta jare cheporomboe reta; eyangareko jese, neresäɨ kunumi re reyangareko rami, jare reiko pukuta.

³ Ereko nepoäka re, ereko avei ndepɨa pe.

⁴ Arakuaa pe ere: “Chereindɨ”; arakuaa katu pe ere: “Tëtara.”

⁵ Ndeangareko vaerä kuña iyaguasa pota vae güi, kuña reta iñee mbokere vae güi.

⁶ Metei ara che amae vɨari aï cheventana rupi yave,

⁷ aecha kunumi reta mbaetɨ yarakuaa vae, aecha chugüi reta metei mbaetɨ oyeandu katu reve oiko vae.

⁸ Ou oväe kaye iekina pe yave, oasa jovaicho kotɨ, jókuae kuña jo oïa kotɨ;

⁹ kaaru ete ma yave, jaemai jäve jäve yave.

¹⁰ Güɨramoiño metei kuña oë oövaiti, kuña iyaguasa pota rami oyemonde vae, ipoki yae oporombotavɨ vae,

¹¹ metei kuña tekorai iyapoa, jekoasɨ vae, oïmbae jo pe vae.

¹² Ámope oï kaye rupi, ámope oï oka guasu rupi, okätɨro oiko jokoropi oasagüe re.

¹³ Jókuae kuña oiküava kunumi jare oiyurupɨte, jare imarambae reve jei chupe:

¹⁴ “Che añererökuavee amee vaerä mɨmba oyeyukagüe yembopɨakatu pegua, kuae ara ambopo ma jókuae añererökuavee vae.

¹⁵ Jáeramo ko ayu roövaiti; ¡roeka mbatee ma, jare roväe chupe!

¹⁶ Cherupa amopöra kavi asoya pe, asoya lino pegua Egipto pe oyeapo vae pe,

¹⁷ cherupa amokäti kavi mirra pe, áloe jare canela pe.

¹⁸ Eyu, yandeangapɨɨ oyoe köe regua; ñaneköe yayerovia,

¹⁹ echa cheme mbaetɨ ko oï, ojo ko mombɨrɨ;

²⁰ güɨraja iyeupe metei jɨru korepoti, yasɨ jova guasu yave ramo ko oyerova yeta.”

²¹ Iñee reta ipöra yae vae rupi, jare iñee-yukɨ rupi omokɨ̈reɨ jókuae kunumi,

²² jaema voi oguata jupíe: Metei guaka oyereraja mbaeyukaa kotɨ rami, metei iyarakuaambae ojo tembipɨɨrɨru pe oñenupa vaerä rami,

²³ metei güɨra jaeiño oa ñuai pe rami, oikuaambae reve oyukata ko vae, javoi metei uvɨ oeterasa.

²⁴ Jayave, eyeapɨsaka cheré cheraɨ; eyeapɨsaka kavi cheñee reta re.

²⁵ Agüɨye ndepɨa topia jókuae kuña jeko jupíe, agüɨye emborɨ katu ekua jupíe,

²⁶ echa jeta vae oa ipo pe; yarakuaa katu yae vae reta ave oa ipo pe.

²⁷ Jëta jape, jae ko mano kotɨ oporogüɨraja vae.