PROVERBIOS 6 - Biblia Guarani Tumpa Iñee

Yeandu katu agüɨye vaerä oime mbia

¹ Cheraɨ, ndevɨa-ïru remborɨ ipía vaerä yave, ani reikuaambae re reñemoë ipía vaerä yave,

² nde aeño ko reñeapɨti neñee pe, reyepɨɨ ko neñee reta pe aeño.

³ Cheraɨ, eyeyora, echa rea ko ïru vae ipo pe; eyapo kuae: Eñemomichi jare emoambeko ndevɨa-ïru ipía re.

⁴ Agüɨye ndepɨagüiveño eï, agüɨye kërai ave yepe eputuu;

⁵ etekuarai, guasu otekuarai omaepïaro vae güi rami; ani güɨra ñuai pe oa vae ojoyepe vae rami.

Yemboarakuaa iyakɨ vae reta peguarä

⁶ Iyakɨ vae, emae tasɨ reta re, emae iparavɨkɨ re jare ndearakuaa ndeyeupe:

⁷ Jae reta mbaetɨ tëi itenondegua, mbaetɨ vi juvicha guasu, jare mbaetɨ vi iyokuaía,

⁸ ërei oeka jembiurä kuaraɨ guasu pe, omboatɨ, oñovatu jembiurä mbaagüɨye iara pe.

⁹ Iyakɨ vae, ¡agüɨye mo eke mbatee! ¡Agüɨye mo eyapakua reteiño!

¹⁰ Echa reke ramboeve, jare reï kavi kaviño reke kavi vaerä ramboeve,

¹¹ jökorai mboriau oväeta ndeve oguataiño vae rami, jare mbaravete outa ndeve kuimbae oporepeña rami.

Jeko kavimbae vae reta regua

¹² Jeko kavimbae, jeko oikomegua vae jae ko añetembae re imiari avei vae;

¹³ jesäɨ rupi, ipɨ rupi, ani ipoäka rupi mbae jei vae;

¹⁴ ipɨa ikavimbae kotɨño, oyemongeta oyapo avei vaerä ikavimbaeño jare oporomoñorarouka.

¹⁵ Jáeramo, güɨramoi peguaño outa chupe mbaesusere; güɨramoi peguaño oiporara yaeta, mbaetɨta ma moa chupeguarä.

YandeYa güɨröɨro vae regua

¹⁶ Oime ova mbaembae yandeYa güɨröɨro vae, jare chiúa pɨ̈chɨi yae ete jesa róvai; jae ko:

¹⁷ Oyemboete yae iyé vae, apu omomora vae, jekombae oyukaiño vae,

¹⁸ ipɨa mbaembae ikavimbae reño vae, ikavimbae omomora yae oyapo vae,

¹⁹ iyapu reve omboeko japicha vae, oporomoñorarouka oyoupii vae.

Menda re oyuvanga vae isusere

²⁰ Cheraɨ, eñovatu nderu iporookuai reta, agüɨye eeya ndesɨ iporomboarakuaa reta.

²¹ Ereko avei ndepɨa pe, ereko ndeayu re mboɨ rami;

²² ndereroatata reguata reiko yave, ndeangarekota reke reï yave, nemomiarita resareko ye yave.

²³ Echa mborookuai reta jare mboromboe reta tembipe rami ko, yemboarakuaa reta tape tekove pegua ko.

²⁴ Ndeangarekota kuña jeko kavimbae güi, jare iyaguasa pota vae iñee mbokere güi.

²⁵ Agüɨye ipöra güiño eipota emae jese; ¡agüɨye tandembotavɨ jesa omopöra vae rupi!

²⁶ Echa kuña iyaguasa pota vae ko, kuimbae güi oekɨ mbae vaeräño; menda re oyuvanga vae ko oipɨɨ kuimbae jekove etei.

²⁷ ¿Ipuere ra kuimbae oñono jäpapau pe tata, okaimbae reve jemimonde?

²⁸ ¿Ipuere ra kuimbae oguata tätapɨi iárambo rupi okaimbae reve ipɨ reta?

²⁹ Jökorai ko japicha jembireko re opoko vae; ngaraa opɨta jökoraiño oiporarambae reve jeko re.

³⁰ ¿Mbaetɨ ra oñereröɨro imonda vae, yepe tëi omaeñomi yɨmbɨaɨ jeko pegua?

³¹ Ërei oyepokou ko yave, omboekoviata opaete jókuae oñomigüe, jare opaeteita omee jo pe mbaembae güɨnoigüe ave.

³² ¡Menda re oyuvanga vae mbaetɨ ko iyarakuaa! ¡Jökorai oiko vae, jae aeño ko oñemokañɨtei!

³³ Oiporarata jare oikota ñemomarai rupi, ngaraai oyemboai chugüi jókuae ñemomarai.

³⁴ Echa kuimbae jägüɨro vae iyarasɨ yae ko, ngaraa iñɨ̈ro iyepɨ iara oväe yave;

³⁵ ngaraa etei oipota mbae nunga mbaemboepɨ ave, ngaraa etei vi oipota iñɨ̈ro, yepe tëi jeta jepɨ chupe.