PROVERBIOS 5 - Biblia Guarani Tumpa Iñee

Yeandu kuña iyaguasa pota vae güi

¹ Cheraɨ, eyeapɨsaka cheporomboarakuaa re; emboɨke ndeapɨsa cheporomboarakuaa katu kotɨ.

² Reñovatu vaerä yemboarakuaa, ndepuere vaerä nemiari arakuaa katu reve.

³ Echa kuña iyaguasa pota vae iñee jëe ngatu yae, iñee kaviasɨ, asaite iïchɨi kavi rami,

⁴ ërei iyapɨ, mbae iro yae vae rami ko, jare jaimbe yae kɨsepuku jaimbe yoyavi vae güi.

⁵ Jupíe ojo vae güɨraja mano kotɨ; oporogüɨraja omanogüe reta ñogüɨnoia kotɨ.

⁶ Jókuae nunga kuña mbaetɨ oikuaa tape tekove pegua, jape reta mbaetɨ ko ɨma pegua.

⁷ Añave, cheraɨ reta, peyeapɨsaka cheré, agüɨye pesɨrɨ cheñee reta güi.

⁸ Esɨrɨ kuña iyaguasa pota vae güi; agüɨ ye etei eya jöke re ave,

⁹ agüɨye vaerä opɨta ïru vae pe ndembaeyekou, jare repɨ̈ rouka nderekove ndetaɨrusu reve ipɨa-pïrimbae pe;

¹⁰ agüɨye vaerä ïru vae oyekou ndeparavɨkɨagüe re.

¹¹ Agüɨye vaerä ndepɨatɨtɨ nderete okañɨ ma ojo oiko yave.

¹² Jare rere: “¡Maera pa ko aröɨro yemboarakuaa! ¡Maera pa ko aröɨro yembosɨmbi!

¹³ ¡Mbaetɨ aipota aendu chemboe vae reta iñee, mbaetɨ ayeapɨsaka chemboe vae reta re!

¹⁴ ¡Jare mbaetɨ etei ma chereko ikavi opaete vae reta ipɨte pe!”

¹⁵ Eɨu ndeɨrɨru güi aeño, ndeɨkua ae güi.

¹⁶ ¿Repɨyereiñota pa ndeɨesaɨ kaye rupi? ¿Remomboiñota pa ndeɨ oka guasu rupi?

¹⁷ Ɨkua jare ɨ ndembae ko; ¡agüɨye eiporu ambuae vae reta ndive!

¹⁸ ¡Tandemboyerovia ndeɨesaɨ aeño! ¡Eyerovia katu ndetaɨrusu güive voi ma kuña rereko vae ndive!

¹⁹ ¡Guasu ikavi yae jare ipöra yae vae rami vae! ¡Tandepichɨ avei! ¡Tandemboyerovia avei iporoaɨu pe!

²⁰ Cheraɨ, ¿maera pa reikota kuña iyaguasa pota vae ndive nderesambae rami? ¿Maera pa reiküavata kuña iyaguasa pota vae?

²¹ Echa Tumpa jesa róvai oiko kuimbae ara ñavo; jae omae oï opaete kuimbae jembiapo reta re.

²² Iyoa vae oyepokoita jeko pe aeño; jare oñeapɨtiukata iyoa pe aeño.

²³ Omanota mbaetɨ oyepoepɨ jeko pegua; ombaeyavɨ ta imbokere yae jeko pegua.