PROVERBIOS 4 - Biblia Guarani Tumpa Iñee

Mbaeyekou ko arakuaa katu

¹ Cheraɨ reta, peyeapɨsaka peru iporomboe re; peïndaivi peikuaa vaerä arakuaa katu.

² Echa che amee peve yemboe ikavi vae, jáeramo agüɨye peakañɨ cheporomboe reta güi.

³ Echa che oime vi ko cheru, chesɨ oyeaeä yae ko cheré,

⁴ jare cheru chemboe yepi körai: “Eñovatu ndepɨa pe cheñee reta; eyapo cheporookuai reta jare reikoveta reiko.

⁵ Eväe arakuaa jare enoi arakuaa katu; agüɨye epia ani neakañɨ cheñee reta güi.

⁶ Agüɨye eeya arakuaa katu, jare jae ndeangarekota, eaɨu, jare neovatuta.

⁷ Embotenonde arakuaa ndeyeupe, opaete mbaembae renoi vae güi, eväe arakuaa katu.

⁸ Eaɨu ndeyeupe, jare jae ndembotuichata; eipɨɨ, jare ndemboeteta;

⁹ ¡nemopörata, mbae ipöra yae vae pe; äka-regua ipöra vae omeeta ndeve!”

¹⁰ Cheraɨ, enoi ndepɨa pe cheñee reta, jayave reiko pukuta.

¹¹ Che rogüɨrajata tape arakuaa pegua rupi, rogüɨroatata tape kavi rupi,

¹² mbaetɨta yemboavai ndevea rupi, resɨi yave ave mbaetɨta nepɨ̈sa-yeyuka.

¹³ Eipɨɨ ndeyeupe yemboarakuaa, agüɨye eeya; eñovatu opaete arakuaa, echa tekove ko ndeveguarä.

¹⁴ Agüɨye emomoe iyoa vae reta jeko, agüɨye vi emomoe jeko kavimbae vae reta jeko.

¹⁵ Epia chugüi, esɨrɨ, ïkotɨa rupi ekua chugüi.

¹⁶ Echa jae reta mbaetɨ ko oke oyapoä ñogüɨnoi ikavimbae yave; oyembojopeɨä reta mbaetɨ yave kia oitɨ reta.

¹⁷ ¡Echa ikavimbae pe oyemoembíu etei reta, jare pɨarai pe oyemboɨgua etei reta!

¹⁸ Ërei jupi vae reta jape köembipe rami ko: Köe jembipe ojo oiko köe kavi regua rami.

¹⁹ Ërei iyoa vae reta jape pɨtumimbi rami ko; ¡mbaetɨ oikuaa reta mbae re ko ipɨ̈sa-yeyuka retata vae!

²⁰ Cheraɨ, eyeapɨsaka kavi cheñee reta re, emboɨke ndeapɨsa cheñee reta kotɨ.

²¹ Emae avei jese ndeyeupe, ¡eñovatu kavi ndepɨa pe!

²² Echa tekove ko jókuae arakuaa oväe vae reta peguarä, jare moa ramita ko chupeguarä.

²³ Opaete mbaembae reñovatu vae güi, eñovatu kavi ndepɨa, echa jese ko oï nderekove.

²⁴ Agüɨye emomora ñee ikavimbae, embosɨrɨ ndeyeugüi ñee pɨ̈chɨi.

²⁵ Emae avei sɨmbi vae re, emae avei nderenonde kotɨ.

²⁶ Emae kavi nderaperä, eguata jupi rupi.

²⁷ Agüɨye epia ketɨ ave; agüɨye emomoe ikavimbae.