PROVERBIOS 31 - Biblia Guarani Tumpa Iñee

Yemboeta mburuvicha guasu pe

¹ Mburuvicha guasu Lemuel iñee reta, ichɨ omboe jese vae reta, jei körai:

² Chemembɨ, cherɨe güi oëgüe, cheTumpa amoñera jese vae omee cheve vae, ¿mbae yé pa jaeta ndeve?

³ Agüɨye eyuvanga ndeyé kuña reta rupi, echa jókuae rupi mburuvicha guasu reta oñererokomegua.

⁴ Chemembɨ Lemuel, mbaetɨ ko ikavi mburuvicha guasu reta jare imborɨa reta jou vaerä vino jare mbae oporombosavaɨpo vae,

⁵ echa okau reta yave, güɨramoi iñakañɨ retata mborookuai güi, jare güɨrova paravete vae reta güi jupi vae.

⁶ Eeya vino jare mbae oporombosavaɨpo vae, ipɨtu jare ipɨatɨtɨ yae vae reta pe;

⁷ tokau reta jare toñemoakañɨ reta mbae oata chupe vae güi, jare jasɨ katu rupi yogüɨreko vae güi.

⁸ Eñemoë mbaetɨ iñee vae reta re; ¡eepɨ, ipuerembae oyeepɨ vae reta!

⁹ Eñemoë jese reta, jare eyapo jupi vae; ¡eepɨ, paravete vae reta jare mbae re oata vae reta!

Kuña yarakuaa jare jeko kavi vae

¹⁰ Kuña jeko kavi vae, ¿kia pa ipuereta oväe? ¡Echa jeko oasa ete yé ko ikavi, ita ipöra yae vae güi!

¹¹ Ime güɨrovia katu avei omae jese, jare mbaetɨi mbae oata chupe.

¹² Oyangareko kavi ime re, opaete ara oikove oiko ramboeve.

¹³ Oeka iyeupe vecharaagüe jare mandɨyu, jare ikɨ̈reɨ ngatu reve ombaapo.

¹⁴ Metei barco güeru jeta mbae oñemee vaerä rami, jökorai güeru mombɨrɨ güi iyeupe jembiurä.

¹⁵ Ndei köe mbove opüa, omongaru imembɨ reta, jare jembiokuai reta pe omombeu iparavɨkɨrä.

¹⁶ Oiparavo reve kavi ogua ɨvɨ, jembiapo jepɨgüe pe oñotɨuka uva.

¹⁷ Oyeumbɨkua kavi oparavɨkɨ vaerä, jare jäta ngatu reve omboɨpɨ oparavɨkɨ.

¹⁸ Oyangareko kavi iparavɨkɨ oguata kavi vaerä, pɨ̈tu yave ave opoi raiviä iparavɨkɨ güi.

¹⁹ Imaepövase yae, mbaetɨ opoi ëɨ güi.

²⁰ Omborɨ avei paravete vae reta, jare mbae re oata yae vae reta.

²¹ Mbaetɨ ipɨatɨtɨ imembɨ reta re iroɨ oa oï yave, echa opaete imembɨ reta jemimonde yandambusugüe päve.

²² Jae etei oyapo iyeupe asoya, oyemonde temimonde pɨ̈taü vae pe jare lino oyeambae pegua katuai pe.

²³ Ime, jërakua kavi yae tëta guasu jöke pe, oguapɨ yave jókuae tëtaguasu pegua tenondegua reta ipɨte pe.

²⁴ Jae oyapo temimonde ipöra vae jare kuakuaa, jare omee omae vae reta pe.

²⁵ Oyemonde temimonde tätagüe pe jare ipöra yae vae pe, mbaetɨ etei oyemoambeko pɨareve peguarä vae re.

²⁶ Imiari yarakuaa katu reve, iporoaiu reve kavi oporomboarakuaa.

²⁷ Jo pegua reta re oyemoambeko; mbaetɨ oiko ïru vae iparavɨkɨagüe reño.

²⁸ Imembɨ reta opüa yave jei reta chupe “oyerovia katu vae”; jare ime omboete vi körai:

²⁹ “Oime jeta kuña jeko kavi vae, ërei nde oasa ete yé chugüi reta.”

³⁰ Ipöra vae, ipöra raangaiño ko, mbaeä etei ko; ërei kuña oipoɨu yandeYa güi vae, jókuae ko imboeteata.

³¹ ¡Pemboete, opaete vae reta jóvai! ¡Pemboete opaete oyapogüe re, tëta guasu jöke pe!