PROVERBIOS 30 - Biblia Guarani Tumpa Iñee

Agur iñee reta

¹ Agur, Jaqué taɨ iñee reta; jei Itiel pe jare Ucal pe vae:

² Che ko yarakuaambae opaete güi vae, mbaetɨ etei chearakuaa.

³ Che, mbaetɨ ayemboe arakuaa re, mbaetɨ ave aikuaa Iyoambae vae regua.

⁴ ¿Kia pa oyeupi ara kotɨ jare ogüeyɨ ye? ¿Kia pa ipuere oipɨɨ ɨvɨtu? ¿Kia pa ipuere ɨ oyapɨkua? ¿Kia pa opa oñono kavi ɨvɨ jembeɨ reta? ¿Mbae pa jee, jare mbae pa taɨ jee? ¡Ere cheve reikuaa yave!

⁵ Opaete Tumpa iñee, ikɨambae ko, jae ko yeopiaka, opaete jese güɨ rovia vae reta peguarä.

⁶ Agüɨye emoïru Tumpa iñee reta, agüɨye vaerä omboeta ndeve, agüɨye vaerä ndeapu.

⁷ Mókoi mbae re ayerure ndeve cheTumpa; emee cheve ndei amano mbove; jae ko:

⁸ Pɨayembotuicha jare apu embosɨrɨ chegüi, agüɨye tacheparavete ani taikokatu; jaeño agüɨ ye emboata cheve tembíu,

⁹ güɨramoi cherɨ̈vɨata ete yave rokuaku jare jae: “¿Kia pa jae YandeYa?” Ani cheparavete ete yave, amanaro, jare cheñeenguru ndekotɨ.

¹⁰ Agüɨye tembiokuai emboeko iya jóvai, echa ipuere oyepopeyu nderé, javoi reiporara reiko.

¹¹ Oime amogüe oyepopeyu tu re vae, jare mbaetɨ iñee kavi ichɨ pe vae.

¹² Oime amogüe, mbaetɨ etei jeko omae iyé vae, ërei mbaetɨ ave yepe oyetɨo oï iyoa güi.

¹³ Oime amogüe ipɨayemboete yae vae, jare omae ïru vae re oyembotuicha reve.

¹⁴ Oime amogüe jäi, kɨsepuku rami, jare jäi-rugua, kɨse rami, omboai vaerä paravete vae reta tëta guasu güi.

¹⁵ Jevoipe güɨnoi mókoi imemɨkuña, jaeño oikuaa reta mbae jou vaerä. Oime mboapɨ mbaembae mbaetɨi yangapɨɨ vae, jare irundɨa mbaetɨi ma: “Joko peño mo” jei. Jae reta ko:

¹⁶ Tɨvɨa, kuña imembɨmbae, ɨvɨ mbaetɨ ɨ re yangapɨɨ vae, jare tata mbaetɨi: “Joko peño mo” jei vae.

¹⁷ Tu güɨnoti vae ichɨ iporomboe güɨröɨro vae, jupi ko omanoasɨ katu vaerä, jare chucha reta opa vaerä jou.

¹⁸ Oime mboapɨ mbaembae mbaetɨ chepuere aikuaa vae, jare irundɨa mbaetɨ chepuere aikuaa. Jae ko:

¹⁹ Güɨraké jaɨkuere ɨvate rupi oveve vae, mboi jaɨkuere ɨ̈vavira rupi oguata vae, barco jaɨkuere ɨguasu rupi oguata vae jare kuimbae kuñatai ndive oasa vae.

²⁰ Kuña menda re oyuvanga vae körai ko oiko: Okaru jare oyoe iyuru, jare jei: “Mbaetɨ ko ayapo mbae ikavimbae.”

²¹ Mboapɨ mbaembae ombokepegua ɨvɨ pegua reta, jare irundɨa, mbaetɨ ipuere güɨropɨa reta, jae ko:

²² Tembiokuai oï mburuvicharä yave, yarakuaambae oyekou tembíu re yave,

²³ kuña oñereröɨrogüe omenda yave, jare tembiokuai kuña opɨta iya kuña jekovia pe vae.

²⁴ Oime irundɨ mbae michi yae vae kuae ɨvɨ pe, iyarakuaa katu yae kuimbae reta iyarakuaa katu güi vae; jae ko:

²⁵ Tasɨ reta, mbaetɨ tëi imbaepuere, ërei kuaraɨ guasu iara pe oñovatu reta jembiurä;

²⁶ tapiti reta, mbaetɨ tëi ipɨ̈rata, ërei oyapo reta ikuarä ɨ̈vavira re;

²⁷ tuku reta, mbaetɨ tëi juvicha guasu, ërei oyomboyao yao kavi oveve reta;

²⁸ yanduti, ndepo pe reipɨɨ vae, ërei ojo mburuvicha guasu jo pe oï.

²⁹ Oime mboapɨ mbaembae ipöra yae iguata vae, jare irundɨa, ipöra yae ete oguata; jae ko:

³⁰ Yaguapope, ipɨ̈rata yae opaete mɨmba reta güi vae, mbaetɨ okɨɨye mbae güi vae;

³¹ takareo oyemboete yae vae; jaeramiño vi kavara kuimbae jare mburuvicha guasu mbaetɨ etei kia ipuere jese vae.

³² Ndearakuaambae reve reipota yave reyembotuicha ani reyemongeta reyapo vaerä ikavimbae yave, ¡eyemongeta kavi mo!

³³ Neche oipɨguara vae, güɨnoeta guara, täta ete oyeambɨvo vae, ombojugüɨta itï, japicha omboarasɨuka vae, oporomoñeraroukata.