PROVERBIOS 3 - Biblia Guarani Tumpa Iñee

Yemboarakuaa ñeereendu katu regua

¹ Cheraɨ, agüɨye neakañɨ cheporookuai güi, eñovatu ndepɨa pe cheporookuai reta,

² jare reiko pukuta, jare mbɨakatu oñemoïruta ndeve.

³ Agüɨye etei embosɨrɨ ndeyeugüi mboroparareko jare añetete vae; eñapɨti ndeayu re, jare eñovatu ndepɨa pe.

⁴ Jare reväeta yeparareko jare mboroaɨu Tumpa güi, jare kuimbae reta güi.

⁵ Eyeko yandeYa re opaete ndepɨa ndive; agüɨ ye eyeko ndearakuaa katu reño.

⁶ Enoi avei ndepɨa pe yandeYa, opaete mbae reyapo vae rupi, jare jae ndereroatata sɨmbi rupi.

⁷ Agüɨye ndearakuaa katu emae ndeyé aeño; eipoɨu yandeYa güi jare esɨrɨ ikavimbae güi.

⁸ Echa kuae, moa ramita ko ndeve, omoröɨsa katuta nekägüe reta.

⁹ Emboete yandeYa mbaembae renoigüe pe, jare opaete ndembaagüɨyerɨpɨ reta pe.

¹⁰ Jayave tɨnɨeasɨ yaeta ndeavatío reta, jare uva pɨau tɨgüegüe oyepɨyere yeta jɨru güi.

¹¹ Cheraɨ, agüɨye eröɨro yandeYa oiporarauka ndeve yave, agüɨye ave tandembogüérai iporombosɨ mbi.

¹² Echa yandeYa, oaɨu vae pe oiporarauka ko; kuimbae, oinupa taɨ oaɨu güi rami.

¹³ Oyerovia ko arakuaa oväe vae, arakuaa katu oväe vae;

¹⁴ echa jókuae ko ikavi yae ete korepoti güi jare oro ikavi yae vae güi.

¹⁵ Ipöra yae ete ko ita ipöra yae vae reta güi; ¡mbae ipöra yae ete vae ave ngaraa ipuere oyemboyovake jókuae ndive!

¹⁶ Ipo iyakatu kotɨ güɨrökuavee tekove puku, ipo iyasu kotɨ güɨrökuavee mbaeyekou jare mboromboete.

¹⁷ Jeko ñamomoe vae ikavi yae ete ko; ñamomoe yave mbɨakatu peguarä ko.

¹⁸ Arakuaa ko tekove, arakuaa oväe vae reta peguarä; ¡oyerovia ko jókuae oipɨɨ iyeupe vae reta!

¹⁹ Arakuaa reve kavi yandeYa oñono ɨvɨ jenda pe, jare arakuaa katu reve kavi oyapo ara;

²⁰ jae iyarakuaa katu rupi opa omboyao ɨguasu reta, jare ara güi oa vaerä ɨsápɨi.

²¹ Cheraɨ, agüɨye kuaekuae embosɨrɨ ndeyeugüi, eñovatu mborookuai jare yemboarakuaa,

²² echa jese ko renoita tekove, ndemboaruandata, mboɨ ndemboaruanda rami.

²³ Jayave reikota rekɨɨyembae reve, jare ngaraai nepɨ̈sa-yeyuka.

²⁴ Reputuu reï yave, ngaraa reyeandu reve reï; reyapakuaa yave, reke pɨagüiveta.

²⁵ Ngaraa rekɨɨye mbaesusere güɨramoi peguaño oime vae güi, ani iyoa vae reta re mbaesusere ou yave vae güi ave,

²⁶ echa yandeYa ko ndeyeroviaka, ngaraa omaeño rea mbae nunga mbaemboavai pe.

²⁷ Agüɨye neäteɨ emborɨ, yemborɨ oeka vae, ndepuere tëi reporomborɨ reve.

²⁸ Agüɨye ere nderapicha pe: “Ekua ye räri, pɨareve eyu tamee ndeve.” Oime tëi renoi remee voi vaerä chupe reve.

²⁹ Agüɨye eyemongeta pɨ̈chɨi nderapicha kotɨ, ndererovia katu reve oiko ndeɨpɨ pe vae kotɨ.

³⁰ Agüɨye eñeapo ïru vae re jekombae reve, mbaetɨ kia mbae oyapo ndeve reve.

³¹ Agüɨye emotareɨ kuimbae jupimbae, agüɨye ave vi emomoe jeko reta;

³² echa yandeYa güɨröɨro ipɨapochɨ vae, ërei oï jupi vae reta ndive.

³³ YandeYa iyepopeyu oï jupimbae jo re, ërei iporerekua oï, jupi vae reta jo re.

³⁴ Añetete jae oyóyai yoyaita oporoyóyai yóyai vae reta, ërei ipɨakavi oñemomichi vae reta pe.

³⁵ Yarakuaa katu vae reta iyekou jae ko mboromboete, ërei yarakuaambae reta oñemomaraiuka.