PROVERBIOS 29 - Biblia Guarani Tumpa Iñee

¹ Oyemboeta chupe vae oyembopɨa täta yave, güɨramoiño okañɨteita, mbaetɨta kia oepɨ vae.

² Jupi vae reta ñogüɨnoi mburuvicharä yave, tëta pegua reta oyerovia katu, ërei jupimbae reta ñogüɨnoi mburuvicharä yave, tëta pegua reta oiporara yae.

³ Oaɨu arakuaa vae, omboyerovia tu, ërei oapeko iyaguasa pota vae, opata imbaembae omokañɨtei.

⁴ Mburuvicha guasu jupi rupi kavi oiko vae, omomɨ̈rata jëtaguasu, ërei okovara reteiño opaño mbaembae re vae, omboai jëtaguasu.

⁵ Iñee-yukɨ japicha pe vae, ñuai ko oñono güɨnoi japerä pe.

⁶ Jeko kavimbae, oata iyoa pe aeño, ërei jupi rupi oiko vae, otairarita oyerovia reve.

⁷ Jupi vae oikuaa kërai ko paravete vae reta yogüɨreko vae, ërei jupimbae, mbaetɨ omae jókuae re.

⁸ Oporoyóyai yóyai vae reta omboarasɨuka tëta guasu, ërei yarakuaa vae reta omoröɨsa arasɨ.

⁹ Yarakuaa vae, oyoaka yarakuaambae ndive yave, yepe tëi iyarasɨ ani opuka, ngaraa oñono kavi teko.

¹⁰ Oporoyuka vae reta güɨröɨro jupi vae, ërei jupi vae reta, oeka kërai ombopɨa katu vaerä.

¹¹ Yarakuaambae, pochɨ rai yae iyarasɨ yave, ërei yarakuaa vae, oyembopɨaguasu pochɨ yave.

¹² Mburuvicha oyeapɨsaka yave apu re, opaete imborɨa reta pe oyavɨukata ko.

¹³ Paravete vae jare imbaeyuvanga vae, oyovakeño ko; opareve pe yandeYa omee tekove.

¹⁴ Mburuvicha guasu oporojäa jupi rupi kavi paravete vae reta re vae, iporookuaía oikota jekuae avei pegua.

¹⁵ Chikote jare yembosɨmbi rupi ou arakuaa, ërei michia re oñemaeiño vae, ichɨ omomaraiuka ko.

¹⁶ Jeta yae jupimbae reta yave, jeta yae ko mbaeyoa, ërei jupi vae reta, oechata jókuae reta isusere.

¹⁷ Emboarakuaa nderaɨ, jare reiko pɨagüiveta, jare ndemboyerovia yaeta.

¹⁸ Kuimbae reta mbaetɨ yave oeka Tumpa jemimbota, yogüɨreko ikavimbae rupi, ërei Tumpa iporookuai oyapo vae reta oyerovia katu.

¹⁹ Tembiokuai mbaetɨ oyembosɨmbi ñee kavi rupi, echa yepe tëi oikuaa, ërei mbaetɨ oyapo.

²⁰ ¿Reecha pa kuimbae jae räri räri voi iñee omoë vae? Chugüi, yarakuaa mbae re ikaviñota yayeko vaerä.

²¹ Tembiokuai, michi güive iya ombokuakuaa ñee yeaeä rupi vae, taɨkue rupi oikota imbaeyekou iyarä.

²² Iyarasɨ rai vae, oporomoñerarouka katu ko, iyarasɨ katu vae, oa katu mbaeyoa pe.

²³ Kuimbae ipɨapochɨ vae, oñemomichiuka, ërei ñemomic hi rupi oiko vae, oyemboeteuka.

²⁴ Imonda vae omborɨ katu vae, jekove kotɨ aeño ko oyovaicho, echa yepe tëi oñeengata chupe omombeu vaerä, ërei mbaetɨ omombeu.

²⁵ Kuimbae güiño yaipoɨu vae, ñuai rami ko, ërei yandeYa reño oyeko vae, oyemboeteukata ko.

²⁶ Jeta vae oeka mburuvicha iporomborɨ, ërei yandeYa güi ko ou morojäa metei ñavo pe.

²⁷ Jupi vae reta güɨröɨro kuimbae jeko kavimbae reta, jare jupimbae güɨröɨro kuimbae sɨmbi rupi oiko vae.