PROVERBIOS 28 - Biblia Guarani Tumpa Iñee

¹ Iyoa vae otekuarai mbaetɨ tëi reve kia oaɨkuemoña, ërei jupi vae oiko okɨɨyembae reve yaguapope rami.

² Metei tëtaguasu pe mbaetɨ teko ikavi yave, jeta mburuvicha reta jeko kavimbae, ërei mburuvicha yarakuaa katu vae oikatu güɨroata kavi tëtaguasu.

³ Kuimbae paravete jare jeko kavimbae omaeñomi yave paravete vae güi, okɨrai yave opaetei güɨrokomegua oeya mbaagüɨye rami ko.

⁴ Tumpa iporookuai güi oyembosɨrɨ vae reta omboete iyoa vae reta, ërei mborookuai oyapo vae reta oyoaka jókuae reta ndive.

⁵ Kuimbae jeko kavimbae reta mbaetɨ etei oikuaa ikavi vae regua, ërei yandeYa reño oyeko vae reta oikuaa opaete mbaembae.

⁶ Ikaviño ko paravete reve jupi rupi oiko vae, ipɨapochɨ vae jare oikokatu yae vae güi.

⁷ Tumpa iporookuai oyapo vae, yarakuaa katu ko, ërei ikause vae reta ndive oñemoïru vae omomarai ko tu.

⁸ Mbae re oasa ete okovara vae rupi oyemboikokatu vae, omboatɨ ko, jókuae paravete vae re iporoparareko vae peguarä.

⁹ Tumpa iporookuai mbaetɨ oipota oendu vae, Tumpa güɨröɨrota vi chugüi iyerure.

¹⁰ Jupi rupi oiko vae pe oyavɨuka vae, jae yeño ko oata pɨpe; ërei jupi vae reta yogüɨreko kavita.

¹¹ Kuimbae oikokatu vae, yarakuaa yae ko omae iyé; ërei paravete reve yarakuaa katu vae, oikuaa chugüi kërai ko jae vae.

¹² Jupi vae reta oyerovia yave, tuichagüe ko yerovia, ërei jupimbae reta oñemopüa yave, oñemi opaete vae reta.

¹³ Ngaraa oiko kavi, imbaeyoa reta oikuaku vae, ërei oyemombeu vae jare oeya ete iyoa vae, oikota mboroparareko rupi.

¹⁴ Oyerovia ko Tumpa güiño oipoɨu avei vae, ërei ipɨa omotäta vae, oata ikavimbae pe.

¹⁵ Yaguapope oñee mbae oeka ani oso yɨmbɨaɨ yae oï vae rami, jökorai ko mburuvicha jupimbae oï metei tëta paravete vae juvicharä yave.

¹⁶ Mburuvicha yarakuaambae, ombojeiete mbae ikavimbae jasɨ katu vae, ërei mbaetɨ imbaepotarai vae oiko pukuta.

¹⁷ Kuimbae oyuka japicha vae, omanota ko, ¡ngaraa kia oepɨ!

¹⁸ Jupi rupi oiko vae, oasayepeta, ërei ipɨapochɨ vae, oata ikavimbae pe.

¹⁹ Iko pe oparavɨkɨ vae, yangapɨɨta tembíu re, ërei iparavɨkɨsembae jeko omomoe vae, paraveteta ko.

²⁰ Kuimbae mbaetɨ teko oñeväe jese vae, oikota mborerekua rupi; ërei oipota jarembae pegua oyemboikokatu vae, ngaraa opɨta jekombae.

²¹ Yayoparavoño yayoparareko vae mbaetɨ ko ikavi; metei mbɨyape jaɨgüe re ave, ipuere ko yandeyoa.

²² Imbaepotarai vae, oipota jarembae pegua oyemboikokatu, ërei mbaetɨ oikuaa oikota ko mbaravete rupi vae.

²³ Japicha pe omboeta mbae re vae, taɨkue rupi imboetea yae ko, jókuae iñee yeaeä raanga vae güi.

²⁴ Tu güi ani ichɨ güi omaeñomi vae jei yave: “Mbaeyoaä ko kuae”, jókuae nunga, oporoyuka vae iñeïru ko.

²⁵ Ipɨarai yae vae, oporomoñerarouka katu ko, ërei yandeYa reño oyeko vae, oiko kavita.

²⁶ Oyererovia katu omae iyé vae, mbaetɨ ko yarakuaa, ërei yarakuaa katu reve oiko vae, oasayepeta.

²⁷ Paravete vae omborɨ vae pe, ngaraa mbae oata, ërei mbaetɨ oipota oporomborɨ vae kotɨ, jeta yaeta oyepopeyu vae.

²⁸ Jupimbae reta oñemopüa yave, kuimbae reta opa oñemi; ërei opa okañɨtei reta yave, jupi vae r eta oñemuña.