PROVERBIOS 27 - Biblia Guarani Tumpa Iñee

¹ Agüɨye eyemboete pɨareve peguarä vae re, echa mbaetɨ reikuaa, mbae ra pɨareve pe oasata vae.

² Ïru vae reta tandemboete, agüɨye nde aeño eyemboete.

³ Ita jare ɨvɨkuitï ipoɨ yae ko, ërei yarakuaambae iyarasɨ ma ipoɨ yae ete rami ko.

⁴ Arasɨ ikaviä yae ko, arasɨ rai yavaete yae ko, ërei ñemotareɨ mbaetɨ kia ipuere güɨropɨa.

⁵ Yemboeta oyoova pe etei vae ikaviño ko, mboroaɨu yandepɨa peño vae güi.

⁶ Yanderaɨu vae yandembopere yave ikaviño ko, ërei ñanemotareɨ vae yanderaɨu raanga yave mbaetɨ jaekavi.

⁷ Jɨ̈vɨata oï vae, ei re ave güɨröɨro omae, ërei yɨmbɨaɨ yae oï vae pe, mbae iro vae ave jëe ngatu.

⁸ Güɨra ojo mombɨrɨ jaitɨ güi rami, jökorai ko mombɨrɨ ojo jëta güi vae.

⁹ Mbae ikäti kavi vae, yandemboyerovia ñaëtu yave, jökorai ko ikavi yae, vɨa-ïru güi yaendu yemboarakuaa vae.

¹⁰ Agüɨye eyembosɨrɨ ndevɨa-ïru güi, ani nderu ivɨa-ïru güi ave. Agüɨye ekua ndepɨatɨtɨ reï yave, nderɨkeɨ ani nderɨvɨ jëta pe. Ñanerëta-ɨpɨ pegua jaekavi ko, ñanerëtara ete mombɨrɨ oiko vae güi.

¹¹ Cheraɨ, ndearakuaa ndeyeupe, jare chemboyerovia yaeta; jökorai chepuereta amboyevɨ, mbae jei chekotɨ vae reta pe.

¹² Oyeandu katu reve oiko vae oecha ikavimbae yave, oñemi chugüi; ërei yarakua ambae oasaño ojo jare oiporara.

¹³ Ketɨgua omborɨ ipía vaerä vae güi epɨ̈ro jemimonde, epɨ̈ro chugüi, omborɨ ombopiauka vaerä vae jeko pegua.

¹⁴ Ndeimboveasɨ iñeeäta reve ivɨa-ïru pe “maiaño pa reï” jei vae, ivɨa-ïru pe jókuae ñee, mbae jasɨ katu vae jei chupe rami ko.

¹⁵ Ama okɨ yave o otɨkɨ yae vae rami, jökorai etei ko kuña iñerarose yae vae.

¹⁶ Yaipota yayopia yave, ɨvɨtu yaipota tëi yayopia vae rami ko, ani asaite yaipota tëi yaipɨɨ rami ko.

¹⁷ Tembiporu jiero pegua oyeimbee japicha jiero pe, jökorai kuimbae, oñono kavi ivɨa-ïru.

¹⁸ Iɨvarupa re oyangareko vae, jouta iagüe; jare iya imbaembae re oyangareko kavi vae, oyereroviaukata iya pe.

¹⁹ Ɨ pe yanderova oyekuaa rami, jökorai vi kuimbae reta omae iyé, ïru kuimbae reta pe jeko rupi.

²⁰ Omanogüe reta ñogüɨnoia jare Abadón mbaetɨi ko yangapɨɨ, jökorai ko kuimbae reta imbaepotarai vae mbaetɨi yangapɨɨ.

²¹ Korepoti jare oro oyetɨo kavi tata pe, ërei kuimbae ombokavi imboetea reta.

²² Yarakuaambae güi ngaraa mai oyeekɨ jókuae iyarakuaambae, yepe tëi oyeapaso yeyé angúa pe.

²³ Ndepokose avei eyangareko ndevecha reta re, eyemoambeko avei nderɨmba reta re,

²⁴ echa mbaeyekou ñanoi vae ngaraa oiko avei, ngaraa opɨta jekuae avei pegua ñemuña reta peguarä.

²⁵ Jokɨta kapii, jokɨta ñana, jare oñeñovatuta mɨmba jembiurä,

²⁶ ndevecha reta jaagüe güi oëta nderemimonderä, ndekavara reta jepɨgüe güi oëta ɨvɨ regua vaerä,

²⁷ ndekavara reta ineche jeta vae re reikota, jare ndero pegua reta jembiurä jare opaete nderembiokuai reta jembiurä.