PROVERBIOS 26 - Biblia Guarani Tumpa Iñee

¹ Araku iara pe mbaetɨ ikavi iroɨ, jare mbaarɨvo iara pe mbaetɨ ikavi ama; jökorai ko mbaetɨ ikavi yarakuaambae, oyemboeteuka vaerä.

² Güɨra oguata vae ani tapérai oveve vae rami ko; yepopeyu mbaetɨ ouiño tekombae reve.

³ Tarero, kavayu peguarä ko, mɨmba itïguaa, mburika peguarä ko; jare chikote, yarakuaambae peguarä.

⁴ Agüɨye etei yarakuaambae pe emoë neñee jae jei rami, agüɨye vaerä nde vi reiko jae rami.

⁵ Ërei emoë neñee yarakuaambae pe jae jeko rupi rami, agüɨye vaerä yarakuaa katu omae iyé.

⁶ Yarakuaambae ndive ñee omondo vae, ipɨ oyasɨa vae rami ko, jae aeño oyapo iyeupe teko.

⁷ Oguatambae itɨmaka reta mbaetɨ ipuere omborɨ rami; jökorai ko yarakuaambae pe, ñee arakuaa pegua.

⁸ Ita oyepókoi tamamboka re rami, jökorai ko yamboete tëi yave yarakuaambae.

⁹ Osavaɨpogüe mbaetɨ oyandu yuu oikutu ipo pe vae, jökorai yarakuaambae mbaetɨ oyandu ñee arakuaa pegua.

¹⁰ Uvɨ regua oñɨvo oipotagüe mbae rami ko, yarakuaambae pe ani oguataiño vae pe omee mbaravɨkɨ vae.

¹¹ Yaɨmba jou ye igüëegüe rami ko, yarakuaambae oyerova ye yave jeko kotɨ.

¹² Yarakuaambae re yayeko vae jaekaviño, jókuae kuimbae yarakuaa yae omae iyé aeño vae güi.

¹³ Iyakɨ vae jei: “Yaguapope oime oï tape rupi; yaguapope oime oï ikatu rupi.”

¹⁴ Ö ke oyere yere jenda re rami, jökorai iyakɨ vae oyere yereño jupa pe.

¹⁵ Iyakɨ vae opöe ñae pe; ërei iyakɨ oupi iyuru pe ave.

¹⁶ Iyakɨ vae, yarakuaa katu yae ko omae iyé, jeta kuimbae reta oporomboarakuaa vae güi.

¹⁷ Oguatagüe, iyarasɨ katu jeko pegua oyemoinge ñeapo ambuae pe yave, yaɨmba pochɨ vae oinambipɨɨ vae rami ko.

¹⁸ Kuimbae imbokere vae omondo tata, uvɨ mano pegua,

¹⁹ jökorai ko kuimbae ombotavɨ ivɨa-ïru vae, javoi jei: “Añetete, yuvanga katu rupiño ko ayapo.”

²⁰ Mbaetɨ yave yepea, tata ogüe, jökorai mbaetɨ ñeraro, mbaetɨ yave indaye pota vae.

²¹ Tatasɨgüe oï jendɨ vaerä, yepea oï tata oyeapo vaerä, jare kuimbae iyarasɨ rai vae, ñeraro oyapo vaerä.

²² Indaye pota vae iñee reta, mbae jëe ngatu vae rami ko, oike yandepɨa pe etei.

²³ Yapepo ñaeu pegua oñeova korepoti pe rami ko, iñee yeaeä ipɨapochɨ reve vae.

²⁴ Ipɨa pe oporomotareɨ vae, mbaetɨ omboyekuaa imiari yave, ërei ipɨa pe oyemongeta ikavimbae.

²⁵ Agüɨye erovia iñee yeaeä rupi nemomiari yave, echa ipɨa pe jeta yae ko yemongeta ikavimbae;

²⁶ yepe tëi mbaetɨ omboyekuaa iporomotareɨ, ërei jeko kavimbae oyekuaata ko opaete vae reta jóvai.

²⁷ Ɨvɨkua oyoo vae, jae yeño oata pɨpe; ita omboyapayere vae, ikotɨi oyapayereta ou.

²⁸ Yapu yae vae, iyapu rupi oiporarauka yae ïru vae pe, jare ñee yeaeä, oporogüɨrokomegua.