PROVERBIOS 25 - Biblia Guarani Tumpa Iñee

Salomón iñee reta arakuaa pegua

¹ Kuae reta jae vi ko ñee reta arakuaa pegua Salomón jei vae, Ezequías mburuvicha guasu, Judá pegua imborɨa reta omboasa kuatía ïru tupapire pe vae:

² Tumpa iyemboetea jae ko mbae yaikuaambae vae, ërei mburuvicha guasu iyemboetea jae ko oyemboe vaerä jese.

³ Ara ɨvate yae vae, ɨvɨ iyɨvɨte, jare mburuvicha guasu reta iyemongeta, jae ko mbaetɨ yandepuere yaikuaa vae.

⁴ Eikɨa yoe korepoti, jare korepoti imondɨkuía oyapota jókuae güi mbae ipöra vae;

⁵ embosɨrɨ mburuvicha guasu güi iyoa vae, jayave jupi vae rupi oñemomɨ̈rata mborookuaía.

⁶ Agüɨye eyembotuicha mburuvicha guasu jóvai, agüɨye eike güɨraveño mburuvicha jóvai;

⁷ oparea ndeve vae ko ikavi yae, reñemomichiuka jókuae mburuvicha jóvai vae güi.

⁸ Agüɨye eñeapo voi voi, agüɨye vaerä reñemomaraiuka nderapicha ndembojopa ma yave.

⁹ Peñomomiari räri oyoupii jókuae teko re, jare agüɨye nemiari jókuae teko re ambuae vae pe;

¹⁰ echa jókuae nemiari chupe vae, ngaraa ma ndemboete, jare ngaraa ye ma nerërakua kavi.

¹¹ Ñee kavi, iara pe kavi yae vae, manzana ia iä oro pegua, korepoti pe oñemopöra vae rami ko.

¹² Moäka-vera ani mboɨ oro yepeai vae rami ko, oyemboeta yave, yarakuaa vae iñeereendu katu vae pe.

¹³ Iroɨ ikavi yae araku iara pe, jökorai ko, ñee jerajaa jupi vae jókuae imondoa pe, omboyerovia yae ko iya.

¹⁴ Amapɨtu ɨvɨtu reve vae okɨä, jökorai ko kuimbae, oyemboete reve güɨrökuavee mbae omee vaerä vae, ërei mbaetɨi omee.

¹⁵ Mbɨaguasu omoröɨsa mburuvicha iyarasɨ; ñee yeaeä omoröɨsa arasɨ.

¹⁶ Ei reväe chupe yave, agüɨye jeta ete jeu, agüɨye vaerä jeta ete reu yave nemogüëe.

¹⁷ Agüɨye eapeko nerëta-ɨpɨ pegua reta, agüɨye vaerä rembogüérai yave nemotareɨ.

¹⁸ Martillo, kɨse jare uvɨ jakuaroviasɨ vae, ¡jökorai ko apu reve omboeko japicha vae!

¹⁹ Oporombotavɨ vae re yarovia katu mbɨatɨtɨ pe ñaï yave, yandepɨ opuru reve yaguata vae rami ko, ani ramo ñaneräi ñañopu yakaru yave vae rami ko.

²⁰ Ipɨatɨtɨ vae pe yatairari vae, yukɨ ñañono iperea re rami ko, ani ramo iroɨ pe yamboi jemimonde chugüi rami ko.

²¹ Nemotareɨ vae yɨmbɨaɨ yave, emee tokaru; jare iɨuve yave, emee toɨu;

²² echa jökorai yave, jova pɨ̈tata ko remomarai güi, jare yandeYa omboekoviata ndeve.

²³ Ɨvɨtuguasu kotɨgua ɨvɨtu omaeñoä okɨ; jökorai ko indaye pota vae re, jova arasɨ omae vae.

²⁴ O ipɨmii vae pe yaiko vae ikaviño, o ipɨguasu vae pe kuña iñe rarose vae ndive yaiko vae güi.

²⁵ Ɨ iröɨsa kavi vae, ikavi yae iɨuve yae vae pe rami ko, mombɨrɨ güi mbae jërakua kavi vae.

²⁶ Ɨ juúmbai jare ɨ jesaɨ oikomegua rami, jökorai ko jupi vae oa yave jupimbae reta ipo pe.

²⁷ Ei jeta ete yau vaerä mbaetɨ ko ikavi, jare yande aeño yayemboete vae, yemboeteä ko.

²⁸ Tëta guasu opa oyemboai vae, mbaetɨ ikësea vae rami ko, kuimbae mbaetɨ oyembopɨaguasu vae.