PROVERBIOS 24 - Biblia Guarani Tumpa Iñee

- 19 -

¹ Agüɨye ndeakatúä kuimbae jeko kavimbae reta re, agüɨye ave neïru pota jese reta,

² echa jae reta ipɨa pe oyemongeta omaeñomi vaeräño, jaeño imiari reta oyapo vaerä ikavimbae.

- 20 -

³ Arakuaa katu ndive oñemopüa metei o, arakuaa katu ndive oñeñono o iguapɨka;

⁴ arakuaa kavi rupi o opa oyemboipo, opaete mbaembae jepɨ vae pe jare mbae ikavigüe pe.

- 21 -

⁵ Kuimbae yarakuaa vae, jëia yae ko, imbaepuere yae ko yarakuaa yae vae,

⁶ echa ñeraro oyeapo yemongeta kavi rupi, jare jeta oyemboarakuaa vae rupi, oporomoamɨrita.

- 22 -

⁷ Yarakuaambae pe tuicha yae ko arakuaa, morojäa renda pe ngaraa oväe iñeerä.

- 23 -

⁸ Ikavimbaeño oyemongeta oyapo vae, oenɨi reta “ikavimbae iyapoa” pe.

⁹ Yarakuaambae iyemongeta ko, mbaeyoaño; oporoyóyai yóyai vae, ikaviä yae ko kuimbae reta pe.

- 24 -

¹⁰ Mbaemboavai iara pe reyemboakɨ yave, ngaraa ko ndepuere.

- 25 -

¹¹ Eroasayepe kuimbae oyeyuka vaerä ma ñogüɨnoi vae; eepɨ mano peguarä ma ñogüɨnoi vae.

¹² Echa rere yave: “Mbaetɨ etei ko aikuaa kuae re”, teko reta ojäa vae oikuaata ko; oikuaa kavita ko omae oï nderé vae, omboekovia teko reta oï rupi vae.

- 26 -

¹³ Cheraɨ, jeu ei, echa ikavi yae ko; jëe kavi yaeta ko ndeve.

¹⁴ Jökoraita ko ndeve, reikuaa yave arakuaa; jókuae reväe yave, reiko kavi yaeta, jare mbaembae reäro vae ngaraai oyemboai ndegüi.

- 27 -

¹⁵ Iyoa vae, agüɨye emomburu jupi vae jo, agüɨye emboai chugüi iputuu renda,

¹⁶ echa jupi vae, yepe tëi ogüɨapi mbovɨ ye, opüa yeta ko; ërei iyoa vae, oata susere pe.

- 28 -

¹⁷ Nderovaicho osusere yave, agüɨye eyerovia, jare ipɨ̈sa-yeyuka yave ave, agüɨye eyerovia

¹⁸ echa yandeYa, ngaraa oyerovia omae kuae re, jare iyarasɨta ndekotɨ.

- 29 -

¹⁹ Agüɨye eyemoinge jeko kavimbae reta ipɨte pe, agüɨye ndeakatúä iyoa vae reta re.

²⁰ Echa jeko kavimbae reta, ngaraa yogüɨreko kavi, ngaraa yogüɨreko puku iyoa vae reta.

- 30 -

²¹ Cheraɨ, eipoɨu yandeYa güi jare mburuvicha guasu güi; agüɨye eyemoinge tovaicho reta ipɨte pe,

²² echa güɨramoiño opata okañɨtei reta, jare mbaetɨ kia ave oikuaa Tumpa jare mburuvicha guasu iporonupa kërai yave ra vae.

Ïru ñee reta arakuaa pegua

²³ Kuae reta, jae vi ko yarakuaa vae reta iñee arakuaa pegua: Ñeapoa pe oporojäa vae reta oporoparavoño yave, mbaetɨ etei ko jaekavi.

²⁴ Jeko vae pe “mbaetɨ ko ndereko” jei vae re, tëta pegua reta oyepopeyuta, jare tëtaguasu pegua reta omotareɨta;

²⁵ ërei jókuae oinupa vae reta, yogüɨreko kavita, jare yogüɨrekota mborerekua rupi.

²⁶ Oyeyurupɨteukata ko, ikavi ñee omboyevɨ vae.

²⁷ Eñono kavi ndeparavɨkɨ reta, eparavɨkɨ ndeko pe, jaɨkue rupi ndepuere reyapo nderorä.

²⁸ Agüɨye emboekoiño nderapicha jekombae reve, ñeapoa pe, agüɨye mbae jupimbae ave ere ikotɨ.

²⁹ Agüɨye ere: “Jae oyapo cheve rami tayapo vi chupe, tamboekovia jókuae kuimbae pe, oyapo cheve rami.”

³⁰ Aasa kuimbae iyakɨ vae iko ikupe rupi, jare kuimbae mbaetɨ iyarakuaa vae iuvarupa ikupe rupi;

³¹ aecha opaetei jókuae ko rupi okuakuaa yuu, jare käpeati yepeai; ikësea reta ita pegua ave opa ma osururu.

³² Kuae aecha yave opɨta chepɨa pe, aecha yave opɨta metei yemboe rami cheve, jae ko:

³³ Nde reke ramboeve, ndekeapara para ramboeve, reñeküava ramboeve reke kavi vaerä michi pegua ye,

³⁴ jökorai mboriau oväeta ndeve oguataiño vae rami, jare mbaravete out a ndeve kuimbae oporepeña rami.