PROVERBIOS 23 - Biblia Guarani Tumpa Iñee

- 6 -

¹ Reguapɨ rekaruta reï yave metei kuimbae tuichagüe ndive, emae kavi kia nunga jóvai ko reguapɨ reï vae.

² Yepe tëi ndeyɨmbɨaɨ yae reï, agüɨye eñemoamɨriuka yɨmbɨaɨ pe;

³ agüɨye eyúe rai voi emae jembíu kavi re, echa ndembotavɨta ko.

- 7 -

⁴ Agüɨye eyemoambeko reyemboikokatu vaerä; ndearakuaa ndeyeupe, agüɨye eipota.

⁵ ¿Reipotata pa remae mbaeyekou re, mbaeä etei vae re? Echa ipepo ramita ko, ɨmambae opata oveve, güɨraké oveve rami.

- 8 -

⁶ Agüɨye ekaru jäkateɨ vae ndive, agüɨye eyúe emae jembíu kavi re ave,

⁷ echa iyuru peño ko: “Ekaru jare jeu vino”, jei ndeve, ërei mbaetɨ ko ipɨa katu nderé;

⁸ nemogüëeta ko jókuae reugüe, ngaraa osirive ndeve jókuae ñee reta ikavigüe rere vae.

- 9 -

⁹ Agüɨye emboarakuaa yarakuaambae, echa güɨröɨrota ko ndeyemongeta kavi reta.

- 10 -

¹⁰ Agüɨye erosɨrɨ ndeɨvɨ jembeɨ oyembojaangaño mai oï vae; agüɨye eroike ndeɨvɨ jembeɨ tɨ̈reɨ reta iɨvɨ pe ave,

¹¹ echa jae reta jepɨa, jae ko Ipɨ̈rata yae vae, jae ko oëta jae reta ipoepɨka pe ndekotɨ.

- 11 -

¹² Eñono ndepɨa mboromboe kotɨ, jare ndeapɨsa reta ñee arakuaa pegua kotɨ.

- 12 -

¹³ Agüɨye eipoɨu embosɨmbi kunumi; echa reinupa yave ɨvɨra raɨ pe, ngaraa omano;

¹⁴ einupa ɨvɨra pe, jare reroasayepeta mano güi.

- 13 -

¹⁵ Cheraɨ, ndepɨa arakuaa katu ko yave, chepɨa remboyerovia yaeta vi ko;

¹⁶ ayerovia yaeta ko, aendu yave nemiari jupi rupi kavi.

- 14 -

¹⁷ Agüɨye ndepɨa pe emotareɨ iyoa vae reta; eipoɨu avei yandeYa güiño;

¹⁸ jökorai yave reiko kavita mbaembae reä ro vae ngaraai oyemboai ndegüi.

- 15 -

¹⁹ Cheraɨ, eyeapɨsaka kavi, jayave ndearakuaata; eñemoäta ngatu reiko kavi vaerä.

²⁰ Agüɨye neïru pota okau vae reta ndive, ani okaru kavi vae reta ndive ave,

²¹ echa kau regua reta jare okaru kavi vae reta iparavete yaeta ko, jare iyakɨ vae reta oyemonde temimonde ipächagüe pe.

- 16 -

²² Eyeapɨsaka nderu iñee re, jókuae chugüi reñemuña vae re; agüɨye eröɨro ndesɨ itɨ̈aro ma yave.

²³ Eväe añetete vae, arakuaa, mboromboe jare arakuaa katu, jare ¡agüɨye emee!

²⁴ Jupi vae, omboyerovia yae tu, yarakuaa vae, ombovɨakatu yae ko tu.

²⁵ ¡Emboyerovia nderu jare ndesɨ! ¡Embovɨakatu ndesɨ!

- 17 -

²⁶ Cheraɨ, eyeapɨsaka ndepɨa reve cheré, jare emae kavi kërai ko che aiko vae re;

²⁷ echa kuña iyaguasa pota vae, ɨvɨkua kɨ̈pe yae jare ipɨmii yae vae rami ko;

²⁸ oporopïaro ko imonda vae rami, jare jeta kuimbae reta omokañɨteiuka.

- 18 -

²⁹ ¿Kia peguarä pa täse? ¿Kia peguarä pa mbaejasɨ? ¿Kia peguarä pa ñoraro reta? ¿Kia peguarä pa yaeo reta? ¿Kia peguarä pa yembopereiño vae? ¿Kia peguarä pa tesakuaovɨ reta?

³⁰ Okau reteiño vae reta peguarä ko; jókuae jekuaeñoi oeka reta vino oyemboyeagüe jou reta vaerä vae.

³¹ Agüɨye emae vino re, pɨ̈ta kavi kopa pe oyekuaa oï yave; jare jëe ngatu oñemókoi yave vae.

³² Ërei jaɨkue rupi mboi oporosuu vae rami ko; moitini iporosuu ramita ko jasɨ.

³³ Reechata opaño mbaembae, jare rereta opaño mbae ndepɨa pe renoi vae;

³⁴ ɨguasu mbɨte pe oyapakua oï vae ramita ko reiko, ani metei ɨvɨra puku vae iyapɨte re oyapakua oï vae rami,

³⁵ jare rereta: “Chembopere reta, ërei mbaetɨ jasɨ cheve; chenupa reta, ërei mbaetɨ ayandu; akuera ye yave, aeka ye ñotai ko.”