PROVERBIOS 22 - Biblia Guarani Tumpa Iñee

¹ Jërakua kavi vae ko ikavi yae ete, oikokatu yae vae güi, jeta korepoti jare oro güɨnoi vae güi.

² Oikokatu vae jare paravete vae, oyovakeño ko; opareve, yandeYa ko oyapo.

³ Oyeandu katu reve oiko vae oecha ikavimbae yave, oñemi chugüi; ërei yarakua ambae oasaño ojo jare oiporara.

⁴ Ñañemomichi jare yaipoɨu yandeYa güi yave, ñanoita mbaeyekou, mboromboete jare tekove katu.

⁵ Ipɨapochɨ vae jape, mbaemboavai katuai; ërei jekove re oyangareko vae, oyembosɨrɨ ko jókuae reta güi.

⁶ Emboe kavi michia ndei güive voi, jare yepe tëi indechi ma yave ngaraa opia chugüi.

⁷ Oikokatu vae, oyemboiya paravete vae reta re, ipía vae, opɨta ko ipía chupe vae jembiokuairä.

⁸ Ikavimbae oyapo vae, ikavimbae rupi vi jekoviata chupe; yandeYa omokañɨteita, ichikote arasɨ pegua pe.

⁹ Japicha oiparareko vae, oikota mborerekua rupi, paravete vae pe omboyao jembíu jeko pegua.

¹⁰ Iporoyóyai yoyaise vae oyemombo yave, opa ñeraro, mbaetɨ ma ñeapo jare ñeeasɨ katu.

¹¹ Mburuvicha guasu oaɨu ipɨa jupi rupi kavi oiko vae, jare oyapo ivɨa-ïrurä jupi rupi kavi imiari vae.

¹² YandeYa oyangareko avei arakuaa re, ërei jae güɨrokomegua oporombotavɨ vae reta iyemongeta.

¹³ Iyakɨ vae jei: “Yaguapope oime oï ikatu pe; cheyukata ko tape rupi.”

¹⁴ Ɨvɨkua kɨ̈pe yae vae rami ko, kuña iyaguasa pota vae iñee reta, joko pe oata, yandeYa iyarasɨ ikotɨ vae.

¹⁵ Arakuaambae oimeño mai kunumi ipɨa pe; ërei yembosɨmbi ñenupa reve vae ombosɨrɨta ko chugüi.

¹⁶ Oyemboikokatu vaerä paravete vae omombaravɨkɨasɨ katu ani omee oikokatu vae pe vae, iparaveteta ko opɨta.

Treinta ñee reta arakuaa pegua

¹⁷ Emboɨke ndeapɨsa eyeapɨsaka iyarakuaa vae reta iporomboarakuaa re; eñono ndepɨa pe che romboarakuaa vae re.

¹⁸ Echa ndemboyerovia yaeta ko, reñovatu yave ndeyeupe ndepɨa pe; ara ñavo remboaɨkuere nemiari pɨpe yave.

¹⁹ Reyeko vaerä yandeYa re, aikuaauka vi ndeve añave.

²⁰ Che aikuatía ndeve treinta yemboarakuaa, jare arakuaa tuichagüe,

²¹ ndemboe vaerä reikuaa kavi añetete vae, reraja ye vaerä ñee reta añetete vae jókuae nemondo vae reta pe.

- 1 -

²² Agüɨye mbae eñomi paravete vae güi paravete güiño, agüɨye erekoasɨ katu mbɨatɨtɨ rupi oiko vae oporojäa vae reta jóvai,

²³ echa yandeYa oepɨta jókuae reta, oiporaraukata, jókuae oiporarauka chupe vae reta pe.

- 2 -

²⁴ Agüɨye eyemoinge iyarasɨ katu vae ipɨte pe, agüɨye eñemoïru iyarasɨ katu vae ndive;

²⁵ agüɨye vaerä reyemboe jeko re, jare reyeitɨ jókuae teko pe.

- 3 -

²⁶ Agüɨye eyemoingeiño mbae pe, jókuae oporomborɨ ipía vaerä vae rami,

²⁷ echa mbaetɨ renoi mbae pe remboepɨ vaerä yave, nderupa ave ko opɨ̈ro retata ndegüi.

- 4 -

²⁸ Agüɨye erosɨrɨ ndeɨvɨ jembeɨ oyembojaangaño mai oï vae; neñemuñagüe reta oñono arakae vae.

- 5 -

²⁹ Iparavɨkɨ oyapo kavi vae, oyeokuaita mburuvicha guasu pe, mbaetɨta oparavɨkɨ oipotagüe pe.