PROVERBIOS 21 - Biblia Guarani Tumpa Iñee

¹ Sekea rupi ɨ yamondo yaipotaa kotɨ rami; jökorai ko mburuvicha guasu iyemongeta yandeYa ipo pe.

² Kuimbae pe ikaviecha opaete mbae oyapo vae, ërei yandeYa ko oikuaa opaete mbae oyeapo vae.

³ Jupi rupi jare sɨmbi rupi mbae oyeapo vae ko ikavi yae yandeYa pe, mɨmb a oyeyuka oñemee chupe vae güi.

⁴ Yembotuicha jare pɨayemboete, jare iyoa vae reta iyemongeta, mbaeyoa ko kuae reta.

⁵ Yemongeta kavi rupi oyeapo mbae vae, oë kavi ko; ërei opaete mbae oyeapo jarembae pegua voi vae, mbaravete peguarä ko.

⁶ Apu rupi mbaeyekou reta oyeapo vae, jae ko michi pegua oporomboyerovia vae mano oeka vae reta peguarä.

⁷ Iyoa vae reta jeko pɨ̈chɨi rupi aeño oñemokañɨteita, mbaetɨ oipota jupi vae oyapo reta jeko pegua.

⁸ Kuimbae ipɨapochɨ vae jeko, mbaetɨ ko ikavi; ërei kuimbae jeko kavi vae jembiapo, ikavi ko.

⁹ O ipɨmii vae pe yaiko vae ikaviño, o ipɨguasu vae pe kuña iñerarose vae ndive yaiko vae güi.

¹⁰ Iyoa vae oyemongeta oyapo vaerä ikavimbaeño; mbaetɨ etei iporoparareko omae japicha re.

¹¹ Oporoyóyai yóyai vae iñenupa rupi, yarakuaambae iyarakuaa; ërei yarakuaa katu vae pe oyemboeta yave, yarakuaa katu voi.

¹² Tumpa omae jupimbae jo re; jare omee yogüɨreko vaerä ikavimbae rupi.

¹³ Paravete vae isapúkai güi iyapɨsa oyokenda vae, jae osapúkai tëi yave, ngaraa vi kia oendu chupe.

¹⁴ Mbota oñemee vɨari vae, omoröɨsa arasɨ.

¹⁵ Jupi vae oyerovia, jupigüe oyeapo yave; ërei jupimbae, ipɨatɨtɨ yae.

¹⁶ Kuimbae oyembosɨrɨ arakuaa katu güi vae, ojota oyea omanogüe reta ndive.

¹⁷ Kuimbae iarete pota vae, paraveteta, ikause jare oñemokäti avei vae, ngaraa oiko katu.

¹⁸ Jeko kavimbae jare iyoa vae, oiporarata jupi vae reta jare iporomboete vae reta jekovia pe.

¹⁹ Yaiko yave ɨvɨ ipombaea pe, ikaviño ko, kuña iñerarose jare pochɨ rai vae ndive yaiko vae güi.

²⁰ Yarakuaa vae jo pe, oime mbae jepɨ vae jare mbae ikäti kavi vae, ërei yarakuaambae opa omokañɨtei mbaetɨ oiporu kavi.

²¹ Oiko jupi rupi vae jare oporoparareko vae, oiko kavita, oväeta mbae jupi vae jare imboeteata.

²² Yarakuaa vae, opɨ̈ro jëia vae reta jëta guasu, jare opa omboai chugüi oyerovia jese vae.

²³ Oyeandu katu reve mbae jei vae, jekove ko oñovatu mbɨatɨtɨ güi.

²⁴ Oporoyóyai yóyai vae jae ko, ipɨapochɨ vae jare oyembotuicha yae vae, oyembotuicha yae reve mbae oyapo vae.

²⁵ Iyakɨ vae, oyukata imbaepotarai, echa iyakɨ oparavɨkɨ;

²⁶ opaete ara imbaepotarai oiko; ërei jupi rupi oiko vae, omee jäkateɨmbae reve.

²⁷ Ikaviä yae ko iyoa vae reta omee mɨmba oyeyukagüe vae, echa omee reta iyemongeta ikavimbae reve.

²⁸ Apu reve omboeko japicha vae, omanota, ërei iñeereendu katu vae, oiko aveita.

²⁹ Jeko kavimbae, oyembopɨa täta, ërei sɨmbi rupi oiko vae, teko kavi rupi oiko.

³⁰ YandeYa kotɨ mbaetɨ oime arakuaa, arakuaa katu ani yemboarakuaa.

³¹ Kavayu oyemboyupavo ñeraro iara peguarä; ërei yandeYa ko omee kia oporomoamɨri vaerä.