PROVERBIOS 2 - Biblia Guarani Tumpa Iñee

Arakuaa katu iñemoñee

¹ Cheraɨ, eipɨɨ cheñee reta; eñovatu ndepɨa pe cheporookuai reta.

² Eyeapɨsaka arakuaa re; eñono ndepɨa yeandu katu re.

³ Esapúkai täta arakuaa katu jare yeandu katu pe;

⁴ eeka opaete ndepɨa ndive, oro reeka rami ani mbae jepɨ vae reeka rami.

⁵ Jayave reikuaata kërai ko yaipoɨu yandeYa güi vae; ¡reikuaata kërai ko Tumpa yaikuaa vae!

⁶ Echa yandeYa ko omee arakuaa katu; mbae yaikuaa vae jare arakuaa katu chugüiño ko ou.

⁷ Jae omee arakuaa kavi sɨmbi vae reta pe, jae ko yeopiaka sɨmbi vae reta peguarä;

⁸ oyangareko oiko jupi rupi vae reta re, oyangareko imbae vae reta re.

⁹ Jayave peikuaata yembojupi, yembosɨmbi jare yae yaeiñombae vae, jare opaete teko kavi.

¹⁰ Arakuaa katu oï yave ndepɨa pe, jare mbae yaikuaa vae ikavi yae yave ndeve,

¹¹ ndepoki reve reyapo vae neovatuta jare arakuaa katu ndeangarekota;

¹² jókuae ndereepɨta teko kavimbae güi, jare kuimbae reta ipɨapochɨ vae güi,

¹³ teko kavi oeya vae reta güi, jókuae oguata reta teko kavimbae rupi vae güi,

¹⁴ oyerovia ikavimbae oyapo vae reta güi, jare ipöra teko pɨ̈chɨi chupe reta vae güi,

¹⁵ jeko kavimbae reta, teko kavi oeya vae reta güi.

¹⁶ Ndereepɨta vi kuña iyaguasa pota vae güi, jókuae kuña iñee mbokere vae güi.

¹⁷ Taɨrusu güive omenda jae ndive vae güi ojo vae, iñakañɨ morogüɨrökuavee päve oyapo Tumpa jovake vae güi vae.

¹⁸ Kuae jeko pegua iñemuña reta ñogüɨnoi mano peguarä, jape ojo omano vae reta kotɨ.

¹⁹ Opaete oasa jae ndive vae ngaraa ye ma oyerova, ngaraa ye ma oguata reta tape tekove pegua rupi.

²⁰ Jayave, emomoe teko kavi, emomoe jupi vae reta jeko.

²¹ Echa jupi vae reta jare jekombae reta yogüɨreko aveita ɨvɨ pe;

²² ërei iyoa vae reta jare ipɨapochɨ vae reta, opata oñemokañɨteiuka ɨvɨ güi.