PROVERBIOS 19 - Biblia Guarani Tumpa Iñee

¹ Ikaviño ko paravete reve jupi rupi oiko vae, ipɨapochɨ jare indaye pota yae vae güi.

² Mbaetɨ arakuaa güɨnoi vae, mbaetɨ ikavi, mbae oyeapo rai rai voi vae, mbaeyavɨ ko.

³ Kuimbae opia jape güi, mbaetɨ yarakuaa jeko pegua, javoi iyarasɨ yandeYa kotɨ.

⁴ Mbaeyekou rupi oime jeta vɨa-ïru, ërei paravete vae, ivɨa-ïru ave oyembosɨrɨ chugüi.

⁵ Japicha re iyapu reve imiari vae, ngaraa opɨta oiporarambae; a pu omomora vae ngaraa oasayepe.

⁶ Ipɨakavi vae, jekaa yae, jäkateɨmbae re, ovɨa yae vae ko.

⁷ Paravete vae, jëtara ete ave omotareɨ yae, ¡vɨtei pa ivɨa-ïru reta, opa tai ko oyembosɨrɨ chugüi! Oeka tëi kia ndive imiari vaerä yave, mbaetɨ oväe.

⁸ Arakuaa katu güɨnoi vae, oyeaɨu ko, arakuaa katu rupi oiko vae, oiko kavita.

⁹ Japicha re iyapu reve imiari vae, ngaraa opɨta oiporarambae; apu rupi imiari vae, omanota ko.

¹⁰ Yarakuaambae, oikatúä ikavigüe pe oiko vaerä, jökoraiño vi metei tembiokuai, ngaraa oikatu oiko mburuvicha reta itenondeguarä.

¹¹ Kuimbae oyeandu katu reve oiko vae, mbaetɨ iyarasɨiño, iyemboete jae ko, omboasɨä ñeeasɨ katu.

¹² Mburuvicha guasu iyarasɨ, yaguapope pochɨ vae iñee rami, ërei ipɨakavi, ɨsápɨi oa ñana re rami.

¹³ Iyarakuaambae, mbɨatɨtɨ ko tu pe, kuña pochɨ rai yae vae, o otɨkɨ avei vae rami ko.

¹⁴ Kuimbae reta iporombopota jae ko, jo jare imbaeyekou taɨ reta imbaerä, ërei yandeYa iporombopota jae ko, kuña yarakuaa katu vae.

¹⁵ Iyakɨ vae, jopeɨ yae, ipokosembae, oiporarata yɨmbɨaɨ.

¹⁶ Mborookuai oñovatu vae, jekove ko oñovatu; ërei mborookuai güɨröɨro vae, omanota ko.

¹⁷ YandeYa pe ko oiporuka, paravete vae ombopota yave; ikavi vae oyapo vae oyemboekoviata ko chupe.

¹⁸ Einupa nderaɨ jeko kavimbae re, ndepuereta rembosɨmbi ramboeve; ërei agüɨye oasa ete einupa.

¹⁹ Iyarasɨ yae vae, oiporara tai ko; mbaetɨ oiporara jeko re yave, jeieteñota.

²⁰ Eendu yemboarakuaa, agüɨye eröɨro yembosɨmbi; jökorai ndearakuaa vaerä.

²¹ Kuimbae ipɨa pe jeta iyemongeta, ërei yandeYa jei vaeño ko oyeapota.

²² Oporoparareko vae, jae ko kuimbae ipɨakatu vae, ërei paravete vae ko, ikavi yae ete iyapu yae vae güi.

²³ YandeYa güiño oipoɨu vae, güɨnoita tekove; oiko pɨagüiveta, ngaraa maratu oiko.

²⁴ Iyakɨ vae, opöe ñae pe, ërei iyakɨ güɨ raja iyuru pe ave.

²⁵ Oporoyóyai yóyai vae iñenupa rupi, yarakuaambae yarakuaa; ërei yarakuaa katu vae pe oye mboeta yave, yarakuaa katu voi.

²⁶ Tu güi omaepɨ̈ro vae jare ichɨ omombo iyeugüi vae, oyapo ko ñemomarai jare mbae jërakua pɨ̈chɨi yae vae.

²⁷ Cheraɨ, mbaetɨ reyeapɨsaka mboromboe re yave, reyembosɨrɨ ko yemboarakuaa ikavigüe güi.

²⁸ Japicha re iyapu reve imiari vae, opuka pukaño mbaejupi re; iy oa vae reta, jei ñee ikavimbae.

²⁹ Tembiporara, oäro oï oporoyóyai yóyai vae reta; jare chikote ko, iyarakuaambae reta peguarä.