PROVERBIOS 18 - Biblia Guarani Tumpa Iñee

¹ Jae aeño ipɨapotaa oeka vae, jae aeño oiko, jare oyemoinge oipotagüe mbae pe.

² Yarakuaambae, mbaetɨ omomora yemboarakuaa katu; oikuaagüe reño oipota oiko.

³ Jupimbae ndive ou ñereröɨro; yembotuicha ndive ou mboromboetembae.

⁴ Kuimbae iñee reta, ɨ tɨpɨ yae vae rami ko, ɨ oguata rami ko, arakuaa jenda.

⁵ Mbaetɨ ko ikavi oporojäa vae reta oepɨ jupimbae, omboeko vaerä jupi vae.

⁶ Yarakuaambae, oyemoinge teko pɨ̈chɨi pe iñee rupi; iñee kavimbae rupi aeño oeka iyeupe ñenupa.

⁷ Yarakuaambae, iñee rupi aeño oyembosusere; iñee aeño oyeapa jese.

⁸ Indaye pota vae reta iñee reta, mbae jëe ngatu vae rami ko, oike yandepɨ a pe etei.

⁹ Ipokoseä iparavɨkɨ re vae, jae ko mbae omokañɨtei vae jëtara.

¹⁰ Ñepɨ̈roka jëguambae rami ko yandeYa jee, jupi vae reta yogüɨraja oñepɨ̈ro jese.

¹¹ Oikokatu vae imbaeyekou, tëta guasu jëguambae rami ko chupe; metei tëta guasu ikësea ɨvate yae vae rami ko chupe.

¹² Ndei susere mbove, oime pɨayembotuicha; ndei oime yemboete mbove, oime susere.

¹³ Arakuaambae ko jare ñemomarai ko ndei mbae oendu kavi rupive iñee omoë voi vae.

¹⁴ Imbaerasɨ vae opüa, oñemoäta ngatu ramo, ërei ipɨatɨtɨ yae oï vae, ¿kia pa ipuereta omopüa?

¹⁵ Yarakuaa vae, oväe arakuaa katu, yarakuaa vae, oeka arakuaa.

¹⁶ Kuimbae, mbota omee vae rupi oipea tape iyeupe, jökorai oike mburuvicha reta pe ave.

¹⁷ Jupiecha, jae räri voi oñeapo vae; ërei ou jovaicho yave, oñeväe apu pe.

¹⁸ Suerte, omboapɨ ñeapo reta, jare mburuvicha reta opa oñono kavi.

¹⁹ Oñoëtara ete vae oyomboarasɨ vae oñemoëguaä etei, tëta guasu ikësea jëguambae vae güi. Oñoëtara vae reta oñeapo oyoe vae, mburuvicha jo ikësea oyeokenda avei vae rami ko.

²⁰ Kuimbae iñee reta, jókuae jekoviata chupe, yangapɨɨ ta iñee reta rupi.

²¹ Ñee güɨnoi mbaepuere, mano peguarä jare tekove peguarä, iñee omoë vae, jókuae jekoviata chupe.

²² Kuimbae oväe imenda ïrurä vae, oväe ko ikavi vae, yandeYa ipɨa kavi ou chupe.

²³ Paravete vae, imiari oporomoñera reve, ërei oikokatu vae, omboyevɨ iñeeasɨ katu reve.

²⁴ Kuimbae oime ivɨa-ïru reta yave, tijeko kavi jae reta ndive; oime vɨa-ïru iporoaɨu yae tëtara ete güi vae.