PROVERBIOS 17 - Biblia Guarani Tumpa Iñee

¹ Ikavi yae ko atikúi yepe yau vae, yaiko pɨagüive reve vae, oime jeta tembiúa pe, oñeraro reteiño vae güi.

² Tembiokuai oyeandu katu reve oiko vae ipuere oyemboeteuka, tu omboetembae güi, ipuere vi güɨnoi mbaeyekou oporomboetembae tɨvɨ reta ndive.

³ Oro jare korepoti, oyetɨ o kavi tata pe; ërei yemongeta reta, ojäa yandeYa.

⁴ Jeko kavimbae jare yapu yae vae, güɨrovia katu ipɨapochɨ vae iñee reta.

⁵ Paravete vae oyóyai yóyai vae, ikavimbae ko oyapo Iyapoa kotɨ; japicha isusere re oyerovia omae vae, ngaraa opɨta oiporarambae.

⁶ Ndechi reta iyemboetea, jae ko jɨmɨmino reta; michia reta iyemboetea, jae ko tu reta.

⁷ Yarakuaambae, mbaetɨ ipoki imiari jupi rupi kavi, jökoraiño vi mburuvicha, mbaetɨ ikavi iyapu vaerä.

⁸ Mbaemboepɨ vɨari omomora vae pe, ita ipöra yae vae rami ko jókuae, echa oë kavi chupe opaete mbaembae oyapo vae.

⁹ Japicha imbaeyavɨ mbaetɨ omoërakua vae, oyeaɨuka ko; ërei omoërakua vae, ombosɨrɨ iyeugüi ivɨa-ïru.

¹⁰ Yemboeta, ikavi yae yarakuaa katu vae pe, yarakuaambae re cien chikote oyeporu vae güi.

¹¹ Ipɨarai vae, ñeraroño oeka, ërei outa chupe ñee jerajaa ipɨa-pïrimbae.

¹² Jaekaviño ko ñañoövaiti mɨmba imembɨmii vae imembɨ oñepɨ̈ro chugüi vae ndive, metei iyarakuaambae ndive ñañoövaiti vae güi.

¹³ Mbae ikavi vae omboekovia ikavimbae pe vae, jo pe oime aveita ikavimbae.

¹⁴ Oporomoñorarouka vae, ɨ̈aka güi ɨ oyepɨyere rami ko; ndei ñañererokomegua pɨpe mbove, yayembosɨrɨ chugüi.

¹⁵ Jupimbae ombojupi vae jare jupi vae omboeko vae, yandeYa pe ikaviä yae ko kuae reta.

¹⁶ ¿Mbaerä pa yarakuaambae oguata arakuaa, mbaetɨ etei reve iyarakuaa?

¹⁷ Vɨa-ïru, oporoaɨu avei ko; tëtara ete rami ko, oime yave mbɨatɨtɨ.

¹⁸ Mbaetɨ ko iyarakuaa oporomborɨ ipía vaerä vae; ivɨa-ïru omborɨ ipía vaerä vae.

¹⁹ Omomora jei ñeeasɨ katu vae, omomora ñeraro; oyembotuicha yae vae, jae aeño ko oeka iyeupe mbaesusere.

²⁰ Ipɨapochɨ vae ngaraai oväe iyeupe ikavi vae; oporomomburu vae oata mbaesusere pe.

²¹ Yarakuaambae tu, mbɨatɨtɨ rupi ko oiko; mbaetɨ ko oiko yerovia katu rupi.

²² Yerovia katu, moa ikavi vae rami ko yanderete pe, ërei mbɨatɨtɨ, oporomombaerasɨ ko.

²³ Iyoa vae, oipɨɨ mbaemboepɨ vɨari, güɨ rokomegua vaerä jupi vae.

²⁴ Iyarakuaa katu vae re, oyekuaa arakuaa, ërei yarakuaambae, oipotagüe rupiño oyemongeta.

²⁵ Iyarakuaambae, mbɨatɨtɨ yae ko tu peguarä jare ichɨ peguarä.

²⁶ Mbaetɨ ko jupi oyemboeko vaerä jupi vae, mbaetɨ vi jupi oñenupa vaerä kuimbae imboetea yae vae reta.

²⁷ Oyeandu reve iñee omoë vae, yarakuaa ko, kuimbae oyeandu reve vae, yarakuaa ko.

²⁸ Yarakuaambae ave kïrii yave, oyepapa ma ko yarakuaa rami; iyuru oyopia vae, yarakuaa ko.