PROVERBIOS 16 - Biblia Guarani Tumpa Iñee

¹ Kuimbae, oyemongeta mbae oyapo vaerä; ërei yandeYa ko jeita, jókuae yemongeta oyembopo vaerä.

² Kuimbae pe, ikaviecha opaete mbae oyapo vae, ërei yandeYa ko oikuaa, opaete mbae oyeapo vae.

³ Opaete mbae reyapota vae, eñono yandeYa ipo pe, jayave, oë kavita ndeve opaete ndeyemongeta reta.

⁴ Opaete mbaembae yandeYa oyapo, jökoraiño mai ou vaerä, iyoa vae ave oyapo, tembiporara iara peguarä.

⁵ YandeYa pe ikaviä yae ko, opaete ipɨayemboete vae, ngaraai opɨta oiporarambae.

⁶ Mboroparareko jare añetete vae rupi, iyoa vae pe oime ñɨ̈ro; yandeYa güi yaipoɨu vae rupi ko, yasɨrɨ ikavimbae güi.

⁷ Kuimbae, jeko kavi rupi omboyerovia yandeYa yave, jovaicho reta ave jae ombopɨakatuta chupe.

⁸ Michi yae omongana jupi rupi vae, ikavi yae ko, jeta omongana jupimbae reve vae güi.

⁹ Kuimbae oyemongeta mbae oyapo vaerä, ërei yandeYa ko jei, kërai oiko vaerä.

¹⁰ Mburuvicha guasu, jei añete vae Tumpa jee re, mbaetɨ oporojäa jupimbae rupi.

¹¹ Oñejäa kavi oñemee mbae vae, jare mbaejäaka jupi vae, yandeYa güi ko ou; opaete mbae oñejäa oñemee pɨpe vae, jae etei ko oñono.

¹² Ikaviä yae ko mburuvicha guasu reta oyapo vaerä jaekavimbae, echa jupi vae rupi ko oñemomɨ̈rata mborookuaía.

¹³ Mburuvicha guasu reta, oaɨu jare omboyerovia jókuae jupi rupi imiari vae.

¹⁴ Mburuvicha guasu iyarasɨ yave, oime mano, ërei kuimbae yarakuaa vae, omoröɨsa.

¹⁵ Mburuvicha guasu oyerovia yave, oime tekove, jare ipɨa kavi, ama taɨkuegua rami ko.

¹⁶ Arakuaa ko ikavi yae, oro ñanoi vae güi; jare arakuaa katu, korepoti güi.

¹⁷ Jupi vae reta jeko, jae ko osɨrɨ vaerä ikavimbae güi; oyangareko jeko re vae, jekove re ko oyangareko.

¹⁸ Oime susere, pɨ ayembotuich oime ramo; oime tembiporara, pɨayemboete oime ramo.

¹⁹ Ikavi yae ko ñañemomichi vaerä paravete vae reta ndive, ipɨapochɨ vae reta ndive mbae oñepɨ̈rogüe yamboyao vae güi.

²⁰ Iñee reendu vae, oiko kavita. ¡Oyerovia ko yandeYa reño oyeko vae!

²¹ Iyarakuaa vae, jae ko yarakuaa katu vae; ñee yeaeä, omoïru arakuaa katu.

²² Iyarakuaa katu vae pe, arakuaa tekove katu ko; yarakuaa vae reta iyarakuaa, mbaeä etei ko.

²³ Iyarakuaa vae, oyeandu reve imiari, iñee yeaeä vae, omoïru iyarakuaa katu.

²⁴ Ñee yeaeä, ei rami ko, oporombovɨakatu jare oporomoingove katu.

²⁵ Oime tape ikaviecha kuimbae pe vae; ërei tape kañɨtei kotɨ ojo vae ko.

²⁶ Oparavɨkɨ vae, iyeupeguarä ko oparavɨkɨ; okaru vaerä ko oparavɨkɨ.

²⁷ Kuimbae ipɨapochɨ vae, oeka oyapo vaerä ikavimbae, ¡iñee reta etei, tata jendɨ rami ko!

²⁸ Kuimbae ipɨapochɨ vae, oporomoñoraro katu; indaye pota vae, omboyovaichouka oyoupii ovɨa oyoe reta vae ave.

²⁹ Kuimbae ipɨarai vae, iñee añetegüe nunga japicha pe, jare oyapouka chupe teko ikavimbae.

³⁰ Osapɨmi etei oyemongeta ikavimbae oyapo vaerä; oyeembesuu etei jókuae ikavimbae oyapo ma yave.

³¹ Indechi vae imboetea ko, jupi rupi oiko jeko pegua.

³² Iyarasɨ raivimbae, ikavi yae ko jëia yae vae güi; jare oyembopɨaguasu vae, ikavi yae ko tëta guasu opɨ̈ro vae güi.

³³ Kuimbae oyapo iyeupe suerte, ërei yandeYa ko jeita, opaete yemongeta oyeapo vaerä.