PROVERBIOS 15 - Biblia Guarani Tumpa Iñee

¹ Ñee yeaeä, omoröɨsa arasɨ; ërei ñeeasɨ katu, ombojeiete arasɨ.

² Yarakuaa vae reta iñee, omopöra arakuaa; ërei yarakuaambae reta iñee, ikavimbae yae ko.

³ YandeYa omae oï opaete re, jeko kavi vae reta re jare jeko kavimbae reta re.

⁴ Ñee yeaeä, tekove katu ko; ërei ñeeasɨ katu, oporombopɨatɨtɨ yae.

⁵ Yarakuaambae, güɨröɨro tu iporomboarakuaa; ërei yemboarakuaa oendu vae, yarakuaa katu ko.

⁶ Jupi vae jo pe, jeta mbae güɨnoi, ërei iyoa vae, opa omokañɨtei omonganagüe.

⁷ Yarakuaa vae reta, omoai arakuaa iñee rupi; ërei yarakuaambae reta, mbaetɨ jökorai.

⁸ Ikaviä yae ko yandeYa pe, iyoa vae reta omee mɨmba oyeyukagüe chupe yave, ërei omboyerovia, jupi vae reta iyerure.

⁹ YandeYa pe, ikaviä yae ko iyoa vae jeko, ërei oaɨu, jupi rupi kavi oiko vae.

¹⁰ Teko kavi oeya vae pe, yembosɨmbi jasɨ katu yae, ërei yembosɨmbi güɨröɨro vae, omanota ko.

¹¹ YandeYa, oecha güɨnoi omanogüe ñogüɨnoia jare tɨvɨa, ¡vɨtei pa kuimbae reta iyemongeta!

¹² Iporoyóyai yoyaise vae, mbaetɨ oaɨu omboeta chupe vae, mbaetɨ vi oñemoïru, yarakuaa katu vae reta ndive.

¹³ Ipɨa oyerovia katu vae, jova kuera katu; ërei ipɨatɨtɨ yae vae, ipɨarúi.

¹⁴ Iyarakuaa vae, oeka arakuaa, ërei yarakuaambae reta, omoïru iyarakuaambae.

¹⁵ Mbɨatɨtɨ rupi oiko vae pe, ara reta ikaviä etei; ërei yerovia katu rupi oiko vae pe, arete avei ko chupeguarä.

¹⁶ Ikaviño ko mbaravete, yaipoɨu reve yandeYa güi yave, oikokatu yae tëi reve ipɨatɨtɨ vae güi.

¹⁷ Ikavi yae ko tembíu isoombae, mboroaɨu reve vae, tembíu kavi, mboroaɨumbae reve vae güi.

¹⁸ Kuimbae iyarasɨ katu vae, oporomoñoraro katu; ërei mbaetɨ iyarasɨ raivi vae, omoröɨsa arasɨ.

¹⁹ Iyakɨ vae pe, tape yuu katuai ko; ërei jupi vae reta jape ikavi yae ko.

²⁰ Iyarakuaa katu vae, omboyerovia tu; ërei yarakuaambae, güɨröɨro ichɨ.

²¹ Yarakuaambae, oyeroviaño iyarakuaambae vae re; ërei yarakuaa katu vae, ombosɨmbi jeko.

²² Yemboarakuaa mbaetɨa pe, yemongeta reta opa oikomegua; ërei yemboarakuaa jetaa pe, oë kavi yemongeta.

²³ ¡Kuimbae omboyevɨ mbarandu vae, oyerovia, vɨtei pa iara pe kavi omboyevɨ yave!

²⁴ Yarakuaa vae pe, tape tekove pegua ojo ɨvate kotɨ, jökorai opia agüɨye vaerä ojo ɨ́vɨkotɨ, omanogüe reta ñogüɨnoia pe.

²⁵ YandeYa, omboai ipɨapochɨ vae reta jo, ërei imemano vae omboyekou aveita opaete imbaembae rupi.

²⁶ YandeYa pe ikaviä yae ko, jeko kavimbae iyemongeta reta, ërei omboyerovia, jeko kavi vae reta iñee kavi.

²⁷ Imbaepotarai vae, güɨrokomegua jo aeño; ërei mbaemboepɨ vɨari güɨröɨro vae, oiko kavita.

²⁸ Jupi vae, ipɨa pe oyemongeta kavi omboyevɨ vaerä ñee; ërei iyoa vae, jei ñee ikavimbae.

²⁹ YandeYa, mombɨrɨ oï iyoa vae reta güi, ërei oendu, jupi vae reta iyerure.

³⁰ Okuera katu vae, yandemboyerovia; mbae jërakua kavi vae, ñanemoäta ngatu.

³¹ Yemboeta tekove pegua re oyeapɨsaka vae, oikota, yarakuaa vae reta ipɨte pe.

³² Yembosɨmbi güɨröɨro vae, jae aeño ko oñereröɨro; ërei yembosɨmbi oendu vae, yarakuaa katu ko.

³³ YandeYa güiño yaipoɨu vae, yandemboe arakuaa katu re; yayemboeteuka vaerä, tenonde ikavi ko ñañemomichi.