PROVERBIOS 14 - Biblia Guarani Tumpa Iñee

¹ Kuña yarakuaa vae, omopüa kavi jorä; ërei kuña yarakuaambae, jae etei opa omboai.

² Jupi rupi oiko vae, oipoɨu yandeYa güi; ërei jeko kavimbae, güɨröɨro.

³ Yarakuaambae, oyembotuicha iñee rupi; ërei yarakuaa vae, oyeandu reve iñee omoë.

⁴ Mbaetɨ güeye yave, avatío mbaetɨ ipo; ërei güeye pe oyeparavɨkɨ yave, oime jeta mbaagüɨye.

⁵ Mbae oecha kavi etei vae, iyapuä imiari; ërei mbaetɨ oecha vae, iyapu imiari.

⁶ Oporoyóyai yóyai vae, oeka arakuaa katu, ërei mbaetɨ ipuere oväe; ërei yarakuaa katu vae pe, mbaetɨ etei yavai.

⁷ Eyembosɨrɨ kuimbae yarakuaambae güi, echa ngaraa reendu chugüi arakuaa.

⁸ Kuimbae yarakuaa vae, iyarakuaa rupi oikuaa jeko, ërei ipokimbae reta, oyembotavɨ iyarakuaambae rupi aeño.

⁹ Yarakuaambae reta, iyoa yave opuka pukaño; ërei jupi vae reta, ipɨakatu oyoe.

¹⁰ Yande aeño yaikuaa yandeyegua, yandepɨatɨtɨ yave ani yayerovia yave.

¹¹ Iyoa vae reta jo opata okañɨtei; ërei jupi vae reta jo oiko kavi aveita.

¹² Kuimbae pe, oime tape ikaviecha vae; ërei tape kañɨtei kotɨ ojo vae ko.

¹³ Opuka tëi yave ave jasɨ ipɨa pe, jare iyerovia katu, iyapɨ mbɨatɨtɨ pe.

¹⁴ Yarakuaambae, ikueraita jeko reta güi; ërei kuimbae jeko kavi vae, oyeroviata jeko reta re.

¹⁵ Yarakuaambae, güɨrovia opaete mbaembae; ërei oyeandu reve kavi oiko vae, omae kavi kërai oiko vaerä.

¹⁶ Yarakuaa katu vae, oipoɨu ikavimbae güi jare oyembosɨrɨ chugüi, ërei yarakuaambae, mbaetɨ etei mbae güi oipoɨu.

¹⁷ Iyarasɨ katu vae, oyapo rai voi mbae; kuimbae ipɨapochɨ vae, oñemotareɨukata ko.

¹⁸ Iyarakuaambae reta, yogüɨrekota yarakuaambae; ërei yarakuaa vae reta, yogüɨrekota arakuaa katu rupi.

¹⁹ Jeko kavimbae reta, oyetavatɨkata jeko kavi vae reta jóvai; iyoa vae reta, yogüɨrajata jupi vae reta jöke pe.

²⁰ Paravete vae, ivɨa-ïru ave ko omotareɨ; ërei oikokatu vae, jaɨúa yae ko.

²¹ Japicha güɨröɨro vae, iyoa ko; ërei paravete vae reta oiparareko vae, oyerovia ko.

²² Ikavimbae reño oyemongeta reta vae, oyavɨ ko; ërei ikavi vae reño oyemongeta reta vae, yogüɨrekota mboroparareko rupi jare mboromboete rupi.

²³ Opaete mbaravɨkɨ reta güi, oime ko mbae oyekuaa; ërei ñeegüeño vae, güeru mbaravete.

²⁴ Yarakuaa vae reta iyemboetea, jae ko imbaeyekou; ërei yarakuaambae reta pe, arakuaambae.

²⁵ Mbae oecha kavi vae, oepɨ ïru vae ñeapo pe; ërei oechambae, iyapu imiari.

²⁶ YandeYa güi oipoɨu vae, mɨ̈rata ko, jae ko taɨ reta iñepɨ̈roa.

²⁷ YandeYa güi yaipoɨu vae, tekove katu ko, mano güi yandereepɨ vae ko.

²⁸ Mburuvicha guasu jeta vae re oporookuai vae, iyemboetea yae ko; ërei mbaetɨ jeta vae re oporookuai vae, ipɨtu ko.

²⁹ Mbaetɨ iyarasɨ raivi vae, yarakuaa yae ko; ërei iyarasɨ rai voi vae, mbaetɨ ko yarakuaa.

³⁰ Ipɨakatu avei vae, tekove katu ko jete peguarä, ërei oporomotareɨ vae, yaratita rami ko ikägüe reta pe.

³¹ Paravete vae güɨrekoasɨ katu vae, ikavimbae ko oyapo Iyapoa kotɨ; ërei omboete ko, paravete vae re güɨ noi mboroparareko vae.

³² Iyoa vae, oyemboai jeko kavimbae pe aeño; ërei kuimbae jupi vae, oyeepɨ jeko kavi rupi.

³³ Oyeandu reve oiko vae, ipɨa pe oï arakuaa, ërei yarakuaambae reta, mbaetɨ oikuaa arakuaa.

³⁴ Mbae jupi vae, ombotuicha tëtaguasu; ërei mbaeyoa, ñemomarai ko tëtaguasu reta peguarä.

³⁵ Mburuvicha guasu ipɨa kavi, oyeokuai kavi chupe vae pe, ërei iyarasɨ, jeko kavimbae kotɨ.