PROVERBIOS 13 - Biblia Guarani Tumpa Iñee

¹ Yarakuaa vae, oyeapɨsaka tu iporomboarakuaa re; ërei oporoyóyai yóyai vae, ñäteɨ oyeapɨsaka yemboeta re.

² Kia ñavo iñee kavi vae, oarɨ vota ikavi vae, ërei mborookuai oyapombae reta yogüɨrekota ikavimbae rupi.

³ Iñee mbaetɨ omoë vae, ikavi vae ko oyapo iyeupe; ërei iñee omoë voi vae, iyeupeguarä aeño ko oyapo ikavimbae.

⁴ Iyakɨ vae oipota tëi mbae, ërei ngaraa oväe; ërei jäta ngatu vae, güɨnoita opaño mbaembae.

⁵ Jupi vae, güɨröɨro apu reta; ërei iyoa vae oiko ñemotareɨ rupi jare oiko imboeteambae.

⁶ Mbaejupi oñovatu, kuimbae jupi rupi kavi oiko vae; ërei ikavimbae omokañɨtei, kuimbae iyoa vae.

⁷ Amogüe paravete vae oikokatugüe nunga oiko; amogüe oikokatu vae paravete vaeecha oiko.

⁸ Oikokatu vae, oyereroasayepe imbaeyekou reta rupi; ërei paravete vae, mbaetɨ güɨnoi mbae pe ave oyereroasayepe vaerä,

⁹ Jupi vae reta, mechero omoembipe kavi vae rami ko; ërei iyoa vae reta, mechero ogüe vae rami ko.

¹⁰ Pɨayemboete, güeru ñeraro; ërei yemboarakuaa oendu vae, yarakuaa katu.

¹¹ Mborombotavɨ rupi oyemboikokatu jarembae vae güi, jarembae opa yeta; ërei iparavɨkɨ rupi omboatɨ mbegüe mbegüe vae pe, oñemoïruta.

¹² Mbae oñeäro vae oväe raivimbae vae, oporombopɨatɨtɨ yae, ërei oyembopo vae, oporomboyerovia.

¹³ Mborookuai güɨröɨro vae, oiporarata ko; mborookuai jeigüe oyapo vae, oyekouta ko.

¹⁴ Yarakuaa katu vae iporomboe, tekove katu ko, jare oporogüɨ roasayepe mano güi.

¹⁵ Iyemongeta ikavi vae, oporombopɨakatu, ërei oyembopɨapochɨ vae reta, oepeña kañɨtei.

¹⁶ Opaete kuimbae oyeandu katu vae, oyapo mbae yarakuaa katu rupi kavi, ërei yarakuaambae reta jaeño oyeechauka.

¹⁷ Ñee jerajaa imiari kavimbae, oporombosusere, ërei ñee jerajaa jupi vae oporombopɨakatu.

¹⁸ Paraveteta jare oñemomaraita yemboarakuaa güɨröɨro vae; ërei yemboeta oendu vae imboeteata.

¹⁹ Temimbota kavi oyembopo vae, oporomboyerovia ko, ërei yarakuaambae reta pe, ikaviä etei oeya vaerä ikavimbae.

²⁰ Yarakuaa vae reta ndive oñemoïru vae, yarakuaata; ërei yarakuaambae reta ndive oñemoïru vae, oiporarata.

²¹ Iyoa vae reta, yogüɨrekota ikavimbae rupi; ërei jupi vae reta, yogüɨreko kavita.

²² Ipɨakavi vae, oeyata jɨmɨmino reta pe mbaeyekou, ërei iyoa vae reta imbaeyekou, opɨtata jupi vae reta imbaerä.

²³ Iparavete vae reta iko pe oime jeta tembíu, ërei okañɨ, jupigüe mbaetɨ jeko pegua.

²⁴ Taɨ oinupambae jeko re vae, omotareɨ ko; ërei taɨ oaɨu vae, ndei güive voi ma ombosɨmbi.

²⁵ Jupi vae okaru jɨ̈vɨata regua, ërei iyoa vae oiporarata yɨmbɨaɨ.