PROVERBIOS 12 - Biblia Guarani Tumpa Iñee

¹ Mboromboe oaɨu vae, arakuaa ko oaɨu; ërei yemboeta güɨröɨro vae, yarakuaambae ko.

² Kuimbae jeko kavi vae re, yandeYa iporoparareko, ërei kuimbae iyemongeta kavimbae, jae omokañɨtei.

³ Ngaraai kia nunga oiko kavi, ikavimbae oyapo vae rupi; ërei jupi vae reta ngaraa kia omomɨi.

⁴ Kuña jeko kavi vae, yerovia ko ime peguarä; ërei kuña jeko kavimbae, yaratita rami ko ime ikägüe reta re.

⁵ Jupi vae reta iyemongeta sɨmbi ko, ërei iyoa vae reta iporomboarakuaa, yembotavɨ ko.

⁶ Iyoa vae reta iyemongeta, yemomburu ko oporoyuka vaerä ërei jupi vae reta iyemongeta, yereroasayepe pegua.

⁷ Tumpa opata omokañɨtei iyoa vae reta, jare ngaraa ye ma yogüɨreko, ërei jupi vae reta, jo pegua reta ndive ngaraa oyemboai.

⁸ Kuimbae oyemboeteuka iyarakuaa katu güɨnoi rupi, ërei ipɨapochɨ vae, oñereröɨrouka vaeräño ko.

⁹ Ñemotareɨ rupi oiko vae güɨnoi jembiokuai vae ikavi ko, oyemboete yae vae mbaetɨ jembiurä vae güi.

¹⁰ Jupi vae oyangareko kavi jɨmba reta re, ërei iyoa vae reta ipɨa-pïría yae ko.

¹¹ Tembíu ngaraa oata, iko pe oparavɨkɨ vae pe, ërei oparavɨkɨmbae reta ndive oñemoïru vae, mbaetɨ yarakuaa.

¹² Iyoa vae reta imbaepotarai, ikavimbae kotɨño; ërei jupi vae reta jeko kavi rupi, yogüɨreko kavi avei.

¹³ Iyoa vae oyepókoi iyapu pe aeño, ërei kuimbae jupi vae oëta mbɨatɨtɨ güi.

¹⁴ Kuimbae iñee ka vi vae, jókuae jekoviata chupe, omboresiveta jembiapo reta oï rupi.

¹⁵ Yarakuaambae, sɨmbi rupi kaviecha ko oiko iyeupe, ërei yemboarakuaa re oyeapɨsaka vae, yarakuaa ko.

¹⁶ Yarakuaambae, iyarasɨ rai voi; ërei oyeandu katu reve oiko vae, mbaetɨ oyeapɨsaka ñeeasɨ katu re.

¹⁷ Añetegüe imiari vae, omoërakua jupigüe; ërei añetembae imiari vae, omoërakua apu.

¹⁸ Oime amogüe, oporoapicha iñee rupi, ërei yarakuaa vae reta iñee, moa rami ko.

¹⁹ Añetete rupi imiari vae, oiko aveita, ërei yapu yae vae, ngaraa etei ɨma oiko.

²⁰ Iyemongeta kavimbae reta ipɨa pe, oime mborombotavɨ; ërei iyemongeta kavi vae reta ipɨa pe, oime yerovia katu.

²¹ Jupi vae, ngaraai oiporara ikavimbae, ërei iyoa vae reta, oiporarata jeta ikavimbae.

²² Yapu imiari vae, pɨ̈chɨi yae ko yandeYa pe, ërei oyerovia katu omae, añetete rupi imiari vae reta re.

²³ Kuimbae iyarakuaa katu vae mbaetɨ oyembotuicha iyarakuaa re, ërei iyarakuaambae reta jaeiño oñemoërakua.

²⁴ Jäta ngatu vae, oporookuaita; ërei iyakɨ vae oikota tembiokuairä.

²⁵ Mbɨatɨtɨ, ombopɨarúi kuimbae; ërei ñee yeaeä, ombovɨakatu.

²⁶ Jupi vae oechauka kavi tape japicha pe, ërei iyoa vae reta oyavɨuka japicha pe.

²⁷ Iyakɨ vae mbae omboyɨ jou vaerä ave ipuereä, ërei iparavɨkɨse vae güɨnoi jeta mbaembae.

²⁸ Tape jupi vae jae tekove pegua, jokoropi mbaetɨ mano.