PROVERBIOS 11 - Biblia Guarani Tumpa Iñee

¹ YandeYa güɨröɨro yae ko omaemee yave oata ojäa omee vae; ërei omboyerovia yae jupi rupi kavi mbae ojäa omee vae.

² Pɨayemboete oimea pe mbaetɨ mboromboete; ërei oñemomichi vae pe oime arakuaa katu.

³ Kuimbae jeko sɨmbi vae, jókuae rupi oiko kavi; ërei iyoa vae reta, oyemboaiuka iyoa pe aeño.

⁴ Tumpa iporojäa iara pe, mbaeyekou reta ngaraa etei oporoepɨ; ërei mbae jupi vae oporoepɨta ko mano güi.

⁵ Mbaejupi ombosɨmbi jupi vae jeko, ërei iyoa vae, jeko pegua aeño okañɨtei.

⁶ Mbaejupi güɨroasayepe jupi vae reta, ërei iyoa vae reta oyepókoi iyoa pe aeño.

⁷ Iyoa vae omano yave, opa vi jae ndive oäro tëi vae; jeko kavimbae reta, opa vi okañɨtei mbaeyekou reta oäro tëi vae.

⁸ Tumpa oepɨ jupi vae mbɨatɨtɨ güi, ërei iyoa vae oiporara jekovia pe.

⁹ Kuimbae jova mókoi vae iñee pe ombopɨatɨtɨ japicha, ërei jupi vae reta iyarakuaa katu rupi oyeepɨ.

¹⁰ Jupi vae reta jeko kavi ramo tëta guasu pe, oime yerovia katu, ërei iyoa vae reta omano yave oime yerovia.

¹¹ Jupi vae reta iporerekua rupi tëta guasu oyembotuicha, ërei iyoa vae reta iñee rupi oyemboai.

¹² Arakuaa re oata vae, jei mbae japicha; ërei kuimbae oyeandu katu reve oiko vae mbaetɨ mbae jei.

¹³ Indaye pota vae imiari opaño mbaembae re; ërei jupi vae, mbaetɨ mbae omoërakua.

¹⁴ Yemboarakuaa kavi mbaetɨa pe, tëta guasu ngaraa oyembotuicha; ërei yemboarakuaa jetaa pe, tëta oiko pɨagüive.

¹⁵ Kia oikuaambae vae omborɨ yave ipía vaerä vae, oiporara yaeta; ërei jókuae nunga güɨröɨro iyeugüi vae, oiko pɨagüiveta.

¹⁶ Kuña jeko kavi vae, oyemboeteukata, jare kuimbae ipɨakɨɨyembae, oyemboikokatuta.

¹⁷ Iporoparareko vae, ikavi vae ko oyapo iyeupeguarä, ërei ipɨa-pïrimbae, iyeupeguaräño ko oyapo ikavimbae.

¹⁸ Iyoa vae iparavɨkɨ jepɨ jaangaño ko, ërei jupi kavi rupi oyapo mbaravɨkɨ vae, oyekouta.

¹⁹ Jupi rupi oiko vae, oepeña tekove, jökorai ko ikavimbae rupi oiko vae, oepeña mano.

²⁰ YandeYa güɨröɨro ko iyemongeta kavimbae vae reta, ërei ipɨakatu omae, jeko kavi vae reta re.

²¹ Jeko kavimbae oiporara ñotai ko, ërei jupi vae iñemuña reta oasayepeta.

²² Moäka-vera oro pegua kuchi itï re oñeñono rami ko, kuña maepöra yae vae mbaetɨ arakuaa güɨnoi vae.

²³ Jupi vae reta jemimbota ikavi vaeño ko; ërei iyoa vae reta oipota vae, oporomboarasɨuka vaeräño.

²⁴ Mbae omee ngatu vae pe, oñemoïru ye chupe, ërei jupimbae reve oasa ete mbae omombɨta iyeupe vae reta yogüɨrekota mbaravete rupi.

²⁵ Ipɨakavi vae, oiko kavita; oporoparareko vae, iporopararekota vi jese vae.

²⁶ Tembíu re oñemoäkateɨ vae re tëta pegua reta oyepopeyuta, ërei iñee kavi retata jókuae jäkateɨmbae reve kavi omee vae kotɨ.

²⁷ Ikavi vaeño oeka vae, oväe ikavi vae; ërei ikavimbaeño oeka vae, oväeta ikavimbae iyeupe.

²⁸ Imbaeyekou reño oyeko vae, ñana ipiru vae rami ko, ërei jupi vae reta jokɨta ñana jokɨ katu vae rami.

²⁹ Jo re ipokosembae, mbaetɨ eteita mbae güɨnoi; iyarakuaambae oiko aveita iyarakuaa katu vae jembiokuairä.

³⁰ Jupi vae jembiapo, tekove peguarä ko, tekove oaɨu vae, yarakuaa katu ko.

³¹ Jupi vae omboresiveta mbota kuae ɨvɨ pe, ¡vɨtei pa iyoa vae reta, oiporarata jeko oï rupi!