PROVERBIOS 10 - Biblia Guarani Tumpa Iñee

Salomón iñee reta arakuaa pegua

¹ Salomón iñee reta arakuaa pegua: Kunumi yarakuaa katu vae, omboyerovia ko tu; ërei iyarakuaambae ombopɨatɨtɨ ko ichɨ.

² Ikavimbae rupi oyemboikokatu vae, ngaraa oyekou kavi, ërei jupi rupi oiko vae, oyereroasayepeta ko mano güi.

³ YandeYa ngaraa oiporarauka yɨmbɨaɨ jupi rupi oiko vae pe, ërei jupimbae re ngaraa omaeño jɨ̈vɨata vaerä.

⁴ Ipokoseä oparavɨkɨ vae, iparavete; ërei iparavɨkɨse vae, oikokatu.

⁵ Mbaarɨvo iara pe ombaarɨvo vae, yarakuaa katu ko; ërei mbaarɨvo iara pe oke reteiño vae, imarambae ko.

⁶ Kuimbae jupi vae pe oime mborerekua, ërei iyoa vae oñemokïriiukata jeko pɨ̈chɨi pe.

⁷ Kuimbae jupi vae re oime ñee kavi; ërei kuimbae jupimbae jee, jarembae pegua okañɨ.

⁸ Iyarakuaa vae omboresive mborookuai reta; ërei iñee-rei vae, paravete opɨta.

⁹ Jupi rupi kavi oiko vae, oiko pɨagüive oiko, ërei jupimbae oiko vae, oiporarata ko.

¹⁰ Jesäɨ rupi mbae jei vae, mbɨatɨtɨ ko oyapo iyeupe, jare iñee rupi jei jeiiño mbae vae, oiporarata.

¹¹ Jupi vae iñee reta, tekove katu ko, ërei iyoa vae, oñemokïriiukata jeko pɨ̈chɨi pe.

¹² Ñomotareɨ güeru yoaka reta, ërei mboroaɨu iñɨ̈ro opaete mbaeyavɨ reta pe.

¹³ Yarakuaa vae reta iñee pe oime arakuaa katu; ërei chikote ko mbaetɨ oyemongeta kavi vae reta peguarä.

¹⁴ Iyarakuaa vae reta oñovatu avei yarakuaa, ërei iyarakuaambae reta jarembae oyembosusere iñee pe aeño.

¹⁵ Oikokatu vae imbaeyekou, tëta guasu jëguambae rami ko chupe; ërei paravete vae isusere jae ko mbaravete.

¹⁶ Jupi vae jembiapo, jae ko tekove peguarä; ërei iyoa vae jembiapo, jae ko mbaeyoa peguarä.

¹⁷ Yemboarakuaa oendu vae oepeña ko tekove; ërei yembosɨmbi mbaetɨ oipota oendu vae, oyavɨ ko iyeupe.

¹⁸ Oporoaɨu raanga vae iyapu vae ko, Ndaye omoërakua vae mbaetɨ ko yarakuaa.

¹⁹ Jeta yae imiari vae iñee rupi oyavɨ katu, ërei oyeandu reve iñee omoë vae yarakuaa ko.

²⁰ Korepoti ikavigüe rami ko jupi vae iñee; ërei iyoa vae reta ipɨa ikaviä etei ko.

²¹ Jupi vae reta iñee rupi omborɨ jeta vae, ërei iyarakuaambae reta omano, mbaetɨ iyarakuaa jeko pegua.

²² YandeYa iporerekua, mbaeyekou ko, ngaraa güeru mbɨatɨtɨ.

²³ Yarakuaambae, omomoraño oyapo ikavimbae; ërei yarakuaa katu vae, omboyerovia iyarakuaa katu.

²⁴ Iyoa vae okɨɨye yae chugüi vae etei outa chupe, ërei jupi vae pe oyembopo ipɨa jemimbota.

²⁵ Kusumirou oasa, jökorai ko jeko kavimbae mbaetɨ oiko puku, ërei jupi vae oiko jekuae avei.

²⁶ Mbae jayasɨ vae oporomojäi yeɨ, ani tätati tesa omboasɨ; jökorai ko jókuae iyakɨ vae iyokuaía pe.

²⁷ YandeYa güiño oipoɨu vae, oiko pukuta, ërei iyoa vae reta ngaraa yogüɨreko avei.

²⁸ Jupi vae reta oäro vae, yerovia katu ko; ërei iyoa vae reta oäro tëi vae, mbaetɨ.

²⁹ YandeYa oyangareko jeko kavi vae re, ërei omboai jeko kavimbae.

³⁰ Jupi vae ngaraai oyemombo iɨvɨ güi, ërei iyoa vae ngaraa oikoño oiko ɨvɨ pe.

³¹ Jupi vae iyuru güi oë arakuaa katu, ërei iñee pɨ̈chɨi vae güi oyeasɨata ikü.

³² Jupi vae iyuru güi oë ñee pöra; ërei iyoa vae reta iyuru ikɨa.