PROVERBIOS 1 - Biblia Guarani Tumpa Iñee

Maera ko ñee yemboarakuaa pegua reta oime vae

¹ Salomón, David taɨ iñee reta arakuaa katu pegua, jae ko mburuvicha guasu Israel pegua,

² jae ko: Yaikuaa vaerä arakuaa katu jare mboromboe, jare yaikuaa vaerä yemongeta ikavigüe.

³ Yamboresive vaerä yemboarakuaa yeandu katu regua, yembojupi, yembosɨmbi jare yae yaeiñombae vae regua.

⁴ Yemboarakuaa mbaetɨ arakuaa güɨnoi vae pe, taɨrusu vae reta pe oñemee vaerä arakuaa katu jare yemongeta kavi.

⁵ Yarakuaa katu vae oenduta, jare oñemoïru yé chupe iyarakuaa katu, yarakuaa katu vae omoïru iyarakuaa katu.

⁶ Yaikuaa vaerä ñee arakuaa pegua reta yarakuaa vae reta güi, ñee reta mbae re ombojaanga vae, yaikuaa vaerä mbae oipota jei vae.

⁷ Arakuaa katu jae ko yandeYa güi yaipoɨu vae; iyarakuaambae reta güɨröɨro arakuaa katu jare mboromboe.

Yemboarakuaa taɨrusu reta peguarä

⁸ Cheraɨ, eendu nderu iporomboe, agüɨye eröɨro ndesɨ iporomboarakuaa,

⁹ echa ndeve ikavi yae vaerä ko: Ipöra yaeta mboɨ rami ndeayu re, ani äka-regua rami neäka re.

¹⁰ Cheraɨ, iyoa vae reta oipota ndembotavɨ yave, ¡agüɨye emborɨ katu!

¹¹ Jei yave ndeve reta: “Eyu ore ndive; yaeka kërai yaporoyuka vaerä, ñaipïaro jekombae.

¹² Kuimbae jeko kavi vae ñamókoi jekove reveño, omanogüe jokoreve tɨvɨa pe oyemondo rami.

¹³ Ñanoita oipotagüe mbaeyekou, ¡ñamotɨnɨe yandero opaete mbaembae ñapɨ̈rogüe pe!

¹⁴ Eyu emboyao ndesuerte ore ndive; metei rami ñanoi yandembaembae.”

¹⁵ ¡Cheraɨ, agüɨye emomoe jae reta jape! Eyembosɨrɨ jae reta jeko kavimbae güi,

¹⁶ echa osɨi katu oyapo reta ikavimbae; yogüɨraja vaerä oporoyuka jarembae voi.

¹⁷ Echa oñemoataiñota ma ko ñuai güɨra reta jovake,

¹⁸ ërei jókuae kuimbae reta iyeupe aeño oñono ñuai, jekove aeño omoëgua reta mano pe.

¹⁹ Jökorai ko iyapɨ imbaepotarai vae reta: Imbaepotarai jeko pegua omano.

Arakuaa katu iparea

²⁰ Oka guasu reta rupi jare kaye reta rupi arakuaa osapúkai.

²¹ Osapúkai jeta vae oyemboatɨa rupi, tëta guasu jöke reta rupi, jei:

²² “Pe, yarakuaambae reta, peporoyóyai yóyai vae reta, ¿kërai yave regua pa peröɨrota arakuaa katu? ¿Kërai yave regua pa peporoyóyai yoyaita?

²³ Peyeapɨsaka cheporombosɨmbi re, jare che ameeta peve chearakuaa katu, jare aikuaaukata peve cheñee reta.

²⁴ Che poenɨi tëi, ërei mbaetɨ peipota peendu, aparea tëi peve, ërei mbaetɨ peyu.

²⁵ Peröɨroño opaete cheporomboarakuaa; mbaetɨ peipota cheporombosɨmbi ave.

²⁶ ¡Jáeramo che apukata vi peré, oväe ma mbaesusere peve yave! ¡Poyóyai yoyaita, ou ma peve pekɨɨye yae chugüi vae yave,

²⁷ ou ma yave peve kɨɨye jare susere, tembiporara jare mbɨatɨtɨ, metei kusumirou opaetei oporomboai rami!

²⁸ Jókuae ara chereenɨita, ërei ngaraa aendu peve; chereeka tëita, ërei ngaraa cheväe chupe;

²⁹ echa arakuaa peröɨro, jare mbaetɨ peipota peipoɨu che peYa güi.

³⁰ Mbaetɨ peipota peendu cheporomboarakuaa; peröɨro cheporombosɨmbi.

³¹ ¡Ërei peiporarata ko jókuae pereko re! ¡Peyombogüeraita peyemongeta reta ikavimbae pe!

³² Mbaetɨ arakuaa güɨnoi vae reta omanota opia jeko pegua, yarakuaambae reta oñemokañɨteiukata imbaeyekou pe;

³³ ërei oyeapɨsaka cheré vae, oikota oipoɨumbae reve, oiko pɨagüiveta, okɨɨyembae reve ikavimbae güi.”