OSEAS 6 - Biblia Guarani Tumpa Iñee

¹ Peyu jare yayerova ye yandeYa kotɨ; echa jae yandemboai, ërei jae ñaneñono kavi yeta, jae yandembopere, ërei jae ñanepoanota.

² Mókoi ara jaɨkue rupi omee yeta tekove yandeve; mboapɨa ara pe yandemoingove yeta, jare yaikoveta jae jóvai.

³ ¡Ñañemoäta ngatu yaeka yaikuaa vaerä yandeYa! Köembipe ou ñotai vae rami outa yandekotɨ, jare ama ou ñotai vae rami outa yandekotɨ, ama taɨkue ete ani tenonde ete okɨ ɨvɨ re vae rami.

YandeYa omboyevɨ ñee vae regua

⁴ YandeYa jei: “¿Mbae ra ayapota ndeve Efraín? ¿Mbae ra ayapota ndeve Judá? Echa pe reta cheraɨu vae, ndeimbove yave ɨ̈vɨti oime vae rami ko, jare köe yave ɨsápɨi opa otini vae rami ko.

⁵ Kuae jeko pegua opa pomboai ñeemombeúa reta rupi; cheñee rupi opa poyuka, cheporojäa outa peve tembipe oë ou rami.

⁶ Echa aipota cheraɨu avei, aipota peikuaa kavi cheregua, mɨmba oyeyukagüe pemee cheve vae güi; mbaetɨ aipota mɨmba oyeyukagüe opaetei oyeapɨ vaeño.

⁷ Ërei jae reta Adán ramiño, morogüɨrökuavee päve oyapoä, oikuaa reve mbaetɨ oyapo jupi vae.

⁸ Ɨvɨ Galaad pe jeta ikavimbae oyapo vae, jeta oyoyuka joko pe.

⁹ Imonda vae reta okätɨro kia re rami, sacerdote reta oyomboatɨ oporoyuka tape Siquem rupi, oyapo reta pɨ̈chɨi yae vae.

¹⁰ Israel pe aecha mbaembae ikavimbae yae vae; Efraín pegua reta oikomegua, Israel pegua reta oyemongɨa.

¹¹ Jaeramiño vi pe Judá pegua reta peguarä, amokätɨro ma ara peiporara vaerä. Aru ye yave ïru ɨvɨ güi chembae vae reta,