OSEAS 4 - Biblia Guarani Tumpa Iñee

YandeYa oyoaka Israel iñemuña reta ndive

¹ Israel iñemuña reta, peyeapɨsaka yandeYa iñee re, echa jae oyoaka kuae ɨvɨ pe yogüɨreko vae ndive, echa kuae ɨvɨ pe mbaetɨ ma añete vae, oyoparareko vae, ani Tumpa oikuaa vae.

² Jei raangaiño mbae oyapo vaerä, apu, yoyuka, maeñomi, aguasa; kuaekuae reta jeta jare oyoyuka vae oyoaɨkue yoaɨkueño.

³ Jáeramo ɨvɨ ipɨatɨtɨ; mbaetɨta mɨ̈rata güɨnoi joko pe yogüɨreko vae, mɨmba pochɨ vae ñana rupigua, güɨra reta, jare jevae reta ɨ rupigua ave omano ñogüɨnoi.

YandeYa omboeko sacerdote reta

⁴ YandeYa jei: “¡Agüɨye kia tomboeko ani tomboeta ïru vae pe!, echa sacerdote reta kotɨño ayovaicho.

⁵ Jáeramo ara pe ani pɨ̈tu yave peata ñeemombeúa oata vi pe ndive, jare ndesɨ amokañɨteita.

⁶ Chembae vae reta opa okañɨtei, mbaetɨ ramo oipota chekuaa. Nde sacerdote reröɨro yemboarakuaa amee ndeve vae jeko pegua, che rogüɨnoeta sacerdote pegua mbaravɨkɨ güi. Neakañɨ neTumpa iporookuai güi jeko pegua, che cheakañɨta vi neñemuña reta güi.

⁷ Jeta yae peñemuña, jökorai vi jeta peyoa, jáeramo che aipoepɨta peyemboetea ñemomarai pe.

⁸ Chembae vae reta mbaeyoa oyapo vae re peiko; jáeramo peipota yae oyapo reta mbaeyoa.

⁹ Opaete vae reta, sacerdote reta ramiño vi, aiporaraukata chupe reta jeko re.

¹⁰ Okaru retata, ërei mbaetɨta jɨ̈vɨata reta; yogüɨreko retata aguasa rupi, ërei mbaetɨta iñemuña, echa mbaetɨ ma oyeokuai reta cheve.

Israel pegua reta itumpa-raanga pota

¹¹ Aguasa pota, jare vino jasɨ vae jare vino ipɨau vae oporombopɨajopa.

¹² Chembae vae reta oparandu itumpa-raanga reta ɨvɨra pegua pe; jare jókuae ɨvɨra omboyevɨ suerte rupi. Echa ipɨa jese reteiño vae oyavɨuka chupe reta; jare oeya reta iTumpa oyapo vaerä ikavimbae.

¹³ Ɨvɨtɨ reta iyapɨte re jare ɨvɨra reta encina, álamo jare olmo jee vae iküaraɨa igüɨ rupi; jokoropi omee reta mɨmba oyeyukagüe jare oapɨ reta ikäti kavi vae incienso. Jáeramo tayɨ reta iyaguasa pota jare taɨtatɨ reta oyuvanga menda re.

¹⁴ Ngaraa aiporarauka tayɨ reta pe iyaguasa pota jeko pegua ani taɨtatɨ reta pe, menda re oyuvanga jeko pegua, echa jae reta etei ko yogüɨraja kuña iyaguasa pota vae ndive jare kuña jeko kavimbae ndive; oyogüɨroyapakua vae rupi omee reta mbaemboete. ¡Jáeramo oñemokañɨtei tëta mbaetɨ arakuaa güɨnoi vae!

¹⁵ Pe Israel pegua reta, peyoa ko yave, pe Judá pegua reta, agüɨye peyoa. ¡Agüɨye pekua Gilgal pe ani Bet-avén pe, agüɨye peñererökuavee mbae peyapo vaerä yandeYa jee re!

¹⁶ Echa Israel pegua reta oyembopɨapochɨ metei guaka taɨrusu vae imasombae rami; ¿oyangarekota ra yandeYa jese metei vecha re rami jembíu katúa pe?

¹⁷ ¡Efraín pegua reta itumpa-raanga pota yae! ¡Peeya!

¹⁸ ¡Mbaetɨ ipɨ̈rata osavaɨpo vae reta rami! Jekuaekuae oyapo reta mbaeyoa juvicha reta oaɨu teko pɨ̈chɨiño.

¹⁹ ¡Ɨvɨtu güɨroveve vae rami opata okañɨtei reta, jare oñemomaraiukata itumpa-raanga pota rupi!