OSEAS 3 - Biblia Guarani Tumpa Iñee

Oseas jare kuña iyaguasa pota vae

¹ YandeYa jei ye cheve: “Ekua ereko kuña iyaguasa pota vae yepe tëi jeko kavimbae. Jökorai che peYa Tumpa aaɨu Israel iñemuña reta, yepe tëi jae reta omboete tumpa ambuae, jare jou reta mbɨyape oyea uva oñemotinigüe ndive oñemee chupe vae.”

² Jayave agua cheyeupe metei kuña quince reare korepoti pegua pe jare metei arova y medio cebada re.

³ Jare jae chupe: “Ɨma ara rupi reikota che ndive; agüɨye ndeaguasa pota, agüɨye ekua ïru kuimbae jupíe, che aikota ndembaeräño.”

⁴ Echa ɨma rupi Israel iñemuña reta yogüɨrekota juvicha guasumbae, itenondeguambae ngaraa ma omee mɨmba oyeyukagüe, ngaraa ma oime mbae iä, ngaraa ma sacerdote reta omonde temimonde sacerdote pegua, ngaraa ma oime o rupigua tumpa-raanga reta.

⁵ Kuae jaɨkue rupi yogüeru retata Israel iñemuña reta jare oekata iYa Tumpa jare juvicha guasu David. Ara taɨkuegua pe, oipoɨu retata omboete reve iYa Tumpa güi iporerekua jese reta vae.