OSEAS 13 - Biblia Guarani Tumpa Iñee

Efraín opaetei okañɨtei

¹ Efraín pegua reta imiari yave, ïru ñemuña Israel pegua reta okɨɨye; ërei opa okañɨtei reta Baal omboete jeko pegua.

² ¡Ërei jeseve jeieteño iyoa reta! Ikorepoti omondɨkui reta oyapo vaerä itumparä mbae iä, ipoki mbae oyapo vae oipota oyapo rami. Javoi jei reta: “¡Pemee mɨmba oyeyukagüe chupe!” Jare oovapɨte reta jókuae toro taɨrusu iä.

³ Jáeramo, ndeimbove yave ɨ̈vɨti oyekuaa vae ramita, ɨsápɨi köe pota yave oa vae ramita, jarembae okañɨ, ama ɨvɨtuai reve vae güɨroveve trigo pire javiyugüe ramita, jare tätati oë horno jemimbɨ rupi ramita.

⁴ YandeYa jei: “Che jae ko peYa Tumpa ɨvɨ Egipto güi peë güive, agüɨye perovia ïru tumpa re, jaeño cheré, agüɨye perovia oime ko ïru oporoepɨ vae, chereño perovia.

⁵ Che ayangareko peré ñuu rupi, ɨmbaea rupi.

⁶ Ërei pe reta jeta tembíu penoi yave, peyembotuicha jare peakañɨ chegüi.

⁷ Jáeramo, che aïta chupe reta yaguapope rami, yagua rami tape pe akätɨrota.

⁸ Aëta tape pe aövaiti metei oso kuña imembɨ oñepɨ̈ro chugüi vae rami, amopächata. Yaguapope oporou rami opata jau, mbaeporou oporoapo rami opata ambojaɨ jaɨ.

⁹ Romokañɨteita Israel, ngaraa kia oasayepe chegüi.

¹⁰ ¿Ketɨ pa oime oï peruvicha guasu, pereroasayepe vaerä opaete perëta guasu reta ndive? ¿Ketɨ pa oime ñogüɨnoi peruvicha reta, chupe reta peiporu mburuvicha guasu jare mburuvicha reta vae?

¹¹ Amee peruvicha guasu chearasɨ reve, jare apɨ̈ro ye pegüi chearasɨ reve.

¹² Efraín oyapo ikavimbae vae, oñemoapɨta oï; iyoa oñeñovatu oï oiporara vaerä.

¹³ Outa oväe chupe ara, kuña imembɨrasɨ vae rami, metei michia yarakuaambae rami ko, echa mbaetɨ oñeñono kavi michia oa vaerä rami ko.

¹⁴ ¿Mano güi etei pa apɨ̈ro yeta? ¿Aepɨta pa mano güi? ¿Ketɨ pa oime oï mano imbaepuere oporomokañɨtei vae? ¿Tëogüe-rɨru, ketɨ pa oime ñogüɨnoi neporomokañɨtei? ¡Mbaetɨta ma aiparareko reta!”

¹⁵ Yepe tëi togüɨnoi jeta mbaembae jëtara reta ipɨte pe, outa ɨvɨtuakuvo, yandeYa iɨvɨtuai oyepeyu ñuu kotɨ güi vae, kuae omotinita jare omondɨpata ɨesaɨ reta. Tovaicho reta güɨrajata pembaembae jepɨ yae vae.

¹⁶ Samaria oiporarata jeko re, echa oyembopɨapochɨ iTumpa kotɨ. Omano retata ñeraro pe, imichia reta oyererokuaukata ɨvɨ re, ikuña reta ipurúa ñogüɨnoi vae oipekata jɨe chugüi.