OSEAS 12 - Biblia Guarani Tumpa Iñee

¹ Efraín iñemuña reta oyemongaru ɨvɨtu pe rami; ara ñavo yogüɨraja ɨvɨtuakuvo jaɨkue rami. Omoïru iyapu reta jare jekorai oyapo reta morogüɨrökuavee päve Asiria pegua reta ndive, jare güɨraja reta olivo iasaite pe ombopota Egipto.”

² YandeYa ojäata Judá pegua reta. Oiporaraukata Jacob iñemuña reta pe jeko oï reta rupi; oiporaraukata chupe reta teko oyapogüe re.

³ Jacob, ichɨ jɨe peve oipɨtapɨɨ tɨkeɨ, okuakuaa ma yave oñoïraro araɨgua ndive.

⁴ Oñoïraro araɨgua ndive jare omoamɨri; oyaeo jare omoñera oiparareko vaerä. Tumpa oväe chupe Bet-el pe, jare imiari jae ndive joko pe.

⁵ Ërei yandeYa jae ko Tumpa Imbaepuere yae ete vae: ¡Jae ko jee YandeYa!

⁶ Israel pegua reta, peyerova ye peTumpa kotɨ; peyapo peporoaɨu avei reve jare jupi rupi, jare peyeko avei Tumpa reño.

⁷ YandeYa jei: “Omaemee vae güɨnoi ipo pe mbaejäaka oyemboyoavɨgüe, echa ipöra chupe oporombotavɨ vaerä.

⁸ Efraín jei: ‘¡Añete, ayemboikokatu yae, aväe mbaeyekou cheyeupeguarä; ngaraa kia ipuere chemboeko jupimbae rupi kuae mbaravɨkɨ ayapo vae re!’

⁹ Ërei che ko jae peYa Tumpa, Egipto pe peiko yave güive, amee peiko vaerä o guakapi pegua rupi, ñuu rupi peikose yave rami, ara reta arete pegua pe.

¹⁰ Che amomiari ñeemombeúa reta, jeta aechauka chupe reta, jupi reta chemiari ambojaanga reve.

¹¹ Galaad pe oime tumpa reta, ërei tumpa-raanga retaño ko. Gilgal pe oyuka reta toro; mɨmba oyeyuka oyeapɨ jese vae jae reta imbae, kó rupi jeta ita yatɨ yatɨ temitɨ pɨte rupi rami ko.”

¹² Ërei Jacob otekuarai ojo ɨvɨ Aram kotɨ, joko pe oyeokuai güɨnoi vaerä jembirekorä, oparavɨkɨ oyangareko mɨmba reta re.

¹³ Metei ñeemombeúa rupi, yandeYa güɨnoe Israel iñemuña reta Egipto güi; ¡metei ñeemombeúa rupi oyangareko jese reta!

¹⁴ Efraín pegua reta oyapogüe mbaetɨ etei ipöra Tumpa pe. Jáeramo yandeYa oiporaraukata chupe oporoyuka vae re, yandeYa omboekoviata chupe oporomboetembae re.