OSEAS 10 - Biblia Guarani Tumpa Iñee

Mɨmba oyeyuka oyeapɨ jese vae reta Israel pegua oyemboai

¹ Israel ko uvarupa ikavigüe rami, jeta ia iyeupeguaräño; ia jeta rami omopüa reta vi mɨmba oyeyuka oyeapɨ jese vae; iɨvɨ ikavi yae rami, ombokavi vi itumpa-raanga reta.

² Israel ipɨayoyavi, añave oiporarata iyoa re. YandeYa opata oyoka chugüi mɨmba oapɨ reta omee jese vae, jare omboaita itumpa-raanga reta.

³ Jayave kuae tëta jeita: “Mbaetɨ yanderuvicha guasu, mbaetɨ ramo yamboete yandeYa. Ërei metei mburuvicha guasu ngaraa yandemborɨ.

⁴ Echa imiari reta yave jei raangaiño oyapo reta morogüɨrökuavee päve; jáeramo teko okuakuaata chupe reta ñana ikavimbae okuakuaa temitɨ ipäu rupi rami.”

⁵ Guaka taɨrusu vae iä Bet-avén pegua oyemboai jeko pegua okɨɨyeta Samaria pegua reta. Jae reta jare isacerdote reta jäse retata toro taɨrusu vae iä oyemboai vae re, echa iyemboetea oyekou jese vae opata okañɨtei.

⁶ Jókuae toro taɨrusu vae iä ave oyererajaukata Asiria pe, omee reta vaerä mburuvicha guasu pe. Jökorai Efraín pegua reta oñemomaraiukata, jare Israel oñemomaraita itumpa-raanga reta ndive.

⁷ Samaria juvicha guasu okañɨtei, ɨ tɨrɨyɨi opa okañɨ ɨ iárambo güi rami.

⁸ Jare mbaemboetea Bet-avén pegua ɨvɨtɨ re ñogüɨnoi vae oyemboaita, joko pe Israel pegua reta oyapo mbaeyoa. Mɨmba oyeyuka oyeapɨ jese vae re oëta ñurati reta. Jare jei retata ɨvɨtu guasu reta pe: “¡Oreöva, oreñomi!” Jare ɨvɨtɨ reta pe jei retata: “¡Pea oreré!”

YandeYa iporojäa Israel kotɨ

⁹ YandeYa jei: “Israel iyoa güire Gabaa pe jekuaeño oyapo mbaeyoa. ¡Jökorai yogüɨreko! Jáeramo, outa ñeraro kuae jeko pɨ̈chɨi vae reta pe Gabaa pe.

¹⁰ Aiporaraukata chupe reta che aipota yave. Yatɨta jese reta ïru tëtaguasu pegua reta, aiporarauka yave chupe reta jeko kavimbae yae re.

¹¹ Efraín pegua reta guaka imaso vae rami yepi, ikɨ̈reɨ ngatu ombaembopiriri. Ërei añave che ayokua yuvo jese omoata vaerä käretou; jare Judá pegua reta omoatata arao, jare Jacob iñemuña reta omoatata ɨvɨ omongúi pɨpe vae.

¹² Jae chupe reta: Peñotɨ jupi vae, jare pearɨvo mboroaɨu opambae. Peyapo katu ɨvɨ pemaetɨ pɨau vaerä, echa añave ko ara peeka vaerä yandeYa, jae ou regua pemboe jupi vae re.

¹³ Ërei pe reta peñotɨ ikavimbae, jare pearɨvo jupimbae, peapu jeko pegua peiporara. Peyerovia pekäretou reta ñeraro pegua re, jare jeta sundaro re ramo,

¹⁴ pemoäsembaita ñeraro, jare opaete pekësea jëguambae oyemboaita, mburuvicha guasu Salmán omboai Bet-arbel ñeraro iara pe rami, michia reta ichɨ ndive oyakambɨ rami.

¹⁵ Jökorai etei peasata pe Bet-el pe peiko vae reta, pereko kavimbae yae jeko pegua. ¡Mburuvicha guasu Israel pegua omanota köe yave!