OSEAS 1 - Biblia Guarani Tumpa Iñee

Oseas jembireko jare taɨ reta

¹ YandeYa jei Oseas, Beeri taɨ pe. Oiko yave mburuvicha guasurä Judá pe Uzías, jare jei vi mburuvicha guasu Jotam iara pe jare Acaz iara pe jare Ezequías iara pe. Jare Jeroboam, Joás taɨ oiko mburuvicha guasurä Israel pe yave.

² YandeYa omboɨpɨ imiari Oseas rupi, körai jei chupe: “Ekua, ereko metei kuña iyaguasa pota vae, jare toime nderaɨ reta jae ndive; jökorai jae reta toyogüɨreko iyaguasa pota vae imembɨrä; echa kuae tëta iyaguasa pota rami chegüi.”

³ Oseas ojo jare güɨreko Gomer, Diblaim tayɨ, ipurúa jare imembɨ chupe metei kunumi.

⁴ Jare yandeYa jei chupe: “Embojee Jezreel, echa jokoño ma aiporarauka Jehú iñemuña reta pe, Jezreel pe oporoyuka vae jeko pegua, amboapɨta mborookuaía Israel pe.

⁵ Jókuae ara amboaita Israel imbaepuere ɨvɨtɨ päu Jezreel pe.”

⁶ Gomer ipurúa ye, jare oa imembɨ kuña. Jare Tumpa jei Oseas pe: “Embojee Lo-ruhama, echa mbaetɨta ma aiparareko Israel pegua reta, opata amboai.

⁷ Ërei Judá pegua reta re anoita mboroparareko, jare che peYa Tumpa aepɨta; mbaetɨta aepɨ güɨrapa rupi, ani kɨsepuku rupi, ani ñeraro rupi, ani sundaro kavayu regua reta rupi.”

⁸ Ombokambu poi güire imembɨ kuñatai Lo-ruhama, ipurúa ye jare oa imembɨ kunumi.

⁹ Jare Tumpa jei Oseas pe: “Embojee, Lo-ammi, echa pe reta mbaetɨ ma ko tëta chembae, jare che mbaetɨ ma vi aiko peTumparä.”

Tëta Israel oñemopüa pɨau ye

¹⁰ Jeseve, Israel iñemuña reta jeta yaeta, ɨguasu jembeɨ pe ɨvɨkuitï oï rami, mbaetɨta ipuere oñejäa ani oyepapa. Jare “tëta chembaeä ko pe reta”, jei chupea pe jeita chupe: “Tumpa oikove vae taɨ ko pe reta.”

¹¹ Jayave oyomboatɨta Judá jare Israel pegua reta, jare oiparavo retata meteiño mburuvicha, jare ketɨ ketɨ güi oyerova reta yeta iɨvɨ pe. ¡Echa Jezreel iara ikavi yaeta ko!