NÚMEROS 9 - Biblia Guarani Tumpa Iñee

Pascua iyapo regua

¹ YandeYa jei Moisés pe ñuu Sinaí pe, mokoía año ma ñogüɨnoe Egipto güi yave, tenondegua yasɨ pe:

² “Israel iñemuña reta toyapo Pascua, iara pe kavi,

³ ara catorcea, kuae yasɨ pe, kaaru yave toyeapo; toyeapo jókuae mborookuai jei rami etei.”

⁴ Jare Moisés imiari Israel iñemuña reta pe, oyapo reta vaerä Pascua.

⁵ Jayave oyapo reta Pascua, tenondegua yasɨ pe, ara catorcea pe jókuae yasɨ, kaaru yave ñuu Sinaí pe; yandeYa oyókuai Moisés vae rami etei oyapo Israel iñemuña reta.

⁶ Ërei oime mbovɨ kuimbae reta ikɨa Tumpa jóvai vae, tëogüe oyavɨkɨ reta jeko pegua, mbaetɨ ipuere reta oyapo Pascua jókuae ara. Yogüɨraja reta Moisés jare Aarón jóvai jókuae ara,

⁷ jare jei reta Moisés pe: —Ore orekɨa roï Tumpa jóvai, tëogüe royavɨkɨ jeko pegua. ¿Orepuere potaä pa romee mbota yandeYa pe kuae ara, Israel iñemuña reta ndive?

⁸ Moisés jei chupe reta: —Peäro räri, mbae ra yandeYa jeita cheve pekotɨ.

⁹ Jare yandeYa jei Moisés pe: “Ere Israel iñemuña reta pe:

¹⁰ Kia nunga vae pegüi reta ani peñemuña reta güi, ikɨa yave Tumpa jóvai tëogüe oyavɨkɨ jeko pegua, ani ketɨ ojo jeko pegua mombɨrɨ oñeväe yave, toyapo Pascua yandeYa peguarä,

¹¹ mokoía yasɨ pe, ara catorcea pe kaaru yave toyapo reta; tou reta vecha kuimbae taɨrusu vae ndive mbɨyape ovumbae jare ñana iro vae,

¹² agüɨye etei tomoembɨre reta mɨmba oyeyukagüe güi pɨareve peguarä, agüɨye vi toakɨo reta kërai ave ikägüegüe. Toyapo reta Pascua mborookuai amee rami.

¹³ Ërei mbaetɨ oyapo Pascua vae, yepe tëi mbaetɨ ikɨa ani ketɨ ojo; jókuae nunga toyemombo ete kavi jëtara reta ipɨte güi. Mbaetɨ omee mbota yandeYa pe oñemeeta tëi vae jeko pegua, toiporara iyoa re.

¹⁴ Jare ketɨgua yogüɨreko pepɨte pe vae, oyapo yave Pascua yandeYa pe, toyapo mborookuai Pascua regua jei rami etei. Metei mborookuaiño toiko opaete pegua, ketɨgua pe ani kuae ɨvɨ pegua pe.”

Amapɨtu tupao guakapi pegua iárambo

¹⁵ Jókuae ara tupao guakapi pegua omopüa reta yave, amapɨtu opa oñova. Kaaruasɨ güive omoembipe tupao guakapi pegua iárambo köe regua.

¹⁶ Jökoraiñoi ara ñavo: Ara pe oñova amapɨtu jare pɨ̈tu yave omoembipe.

¹⁷ Amapɨtu oyemboɨvate tupao guakapi pegua iárambo güi yave, Israel iñemuña reta omboɨpɨ oguata; jare jókuae amapɨtu opɨtaa pe, jae reta oyembojeyupa.

¹⁸ YandeYa iporookuai rupi Israel iñemuña reta omboɨpɨ oguata, jare yandeYa iporookuai rupi oyembojeyupa reta; jare joko pe opɨta reta amapɨtu oï ramboeve tupao guakapi pegua iárambo.

¹⁹ Amapɨtu opɨta yave ɨma ara tupao guakapi pegua iárambo, jayave Israel iñemuña reta oäro yandeYa iporookuai, jare mbaetɨ omboɨpɨ reta oguata.

²⁰ Jare amapɨtu opɨta tupao guakapi pegua iárambo mbovɨ araño yave, yandeYa iporookuai rupi oyembojeyupa reta, jare yandeYa iporookuai rupi omboɨpɨ reta oguata.

²¹ Jare amapɨtu opɨta yave metei pɨ̈tuño, köe yave oyemboɨvate yave jae reta omboɨpɨ oguata; ani ara pe opɨta yave, pɨ̈tu yave oyemboɨvate, jökorai yave omboɨpɨ reta oguata.

²² Ani amapɨtu opɨta yave mókoi ara, ani metei yasɨ, ani metei año tupao guakapi pegua iárambo, Israel iñemuña reta opɨta vi jeyupa pe, jare mbaetɨ omɨi reta; ërei amapɨtu oyemboɨvate yave, omboɨpɨ reta oguata.

²³ YandeYa iporookuai rupi jae reta oyembojeyupa, jare jae iporookuai rupi vi omboɨpɨ reta oguata. Oyapo reta yandeYa iporookuai, Moisés rupi jei vae rami.