NÚMEROS 6 - Biblia Guarani Tumpa Iñee

Mborookuai nasareo reta regua

¹ YandeYa jei Moisés pe:

² “Ere Israel iñemuña reta pe: Metei kuimbae ani kuña oñererökuavee nasareorä Tumpa peguarä yave,

³ toñeñovatu vino güi jare mbae oporombosavaɨpo vae güi; agüɨye tou mbae oyemboayasɨgüe, uva ipɨau vae ani oñemotinigüe yepe.

⁴ Oiko ramboeve nasareorä agüɨye tou kërai ave uva iagüe,

⁵ agüɨye toñapi ia; yandeYa pe oñeñono tee vae iyapɨ regua; echa oñeñono tee yandeYa pe vae ko, tomaeño tokuakuaa ia.

⁶ Oiko ramboeve nasareorä agüɨye toya tëogüe re,

⁷ yepe tëi omano tu, ichɨ, tɨvɨ, tɨkeɨ, jeindɨ, ërei agüɨye toyemongɨa; echa oñeñono tee Tumpa pe vae ko.

⁸ Oiko ramboeve nasareorä, toñeñono tee yandeYa peguaräño.

⁹ Kia nunga vae omanoɨvɨ yave iyɨpɨ pe, ia oñeñono tee oï vae ikɨa ko Tumpa jóvai; jáeramo, chiúa ara pe oyetɨo yave, toñapiasɨ ia.

¹⁰ Jare juría ara pe togüeru mókoi pɨkasu ani pɨkasutï sacerdote pe, tupao guakapi pegua jöke pe.

¹¹ Jare jókuae sacerdote tomee metei, Tumpa iñɨ̈ro vaerä mbaeyoa re, jare ïru tomee mɨmba oyeyukagüe opaetei oyeapɨ vae; jökorai toyeapo chupe tëogüe jeko pegua oyemongɨa Tumpa jóvai vae güi. Jökorai toñono tee ye ia yandeYa peguarä;

¹² jare jókuae tenonde oñererökuavee tëi nasareorä vae mbaetɨta oyepapa, echa ikɨa ko Tumpa jóvai. Toñeñono tee ye jókuae ara güive yandeYa peguarä jare togüeru vecha kuimbae taɨrusu metei año vae, Tumpa iñɨ̈ro vaerä mbaeyoa re.

¹³ Jae kuae oñererökuavee nasareorä oiko vae omboapɨ yave oyapo vaerä: Tou tupao guakapi pegua jöke pe,

¹⁴ tomee yandeYa pe metei vecha kuimbae taɨrusu metei año vae, jete kavi vae, mɨmba oyeyuka opaetei oyeapɨ vaerä vae, jare metei vecha kuña taɨrusu metei año vae, jete kavi vae, Tumpa iñɨ̈ro vaerä mbaeyoa re, jare metei vecha kuimbae jete kavi vae, mbota yembopɨakatu peguarä.

¹⁵ Jare vi metei kanata mbɨyape oyembovumbae, trigokúi ipɨuasɨ kavi vae, olivo iasaite pe oyemómbɨu vae, jare mbɨyape ipïreriasɨ vae, oyembovumbae olivo iasaite oñeñono jese vae, mbota temitɨ jäɨgüe jare vino oyepɨyere vae.

¹⁶ Jare sacerdote tomee yandeYa jóvai, Tumpa iñɨ̈ro vaerä mbaeyoa re jare mɨmba oyeyukagüe opaetei oyeapɨ vae;

¹⁷ jare tomee vecha kuimbae mbota yembopɨakatu pegua yandeYa pe, jare kanata pe mbɨyape oyembovumbae oï vae ndive; jare vi mbota temitɨ jäɨgüe jare vino oyepɨyere vae.

¹⁸ Jayave jókuae oñererökuavee nasareorä oiko vae, toñapiasɨ ia tupao guakapi pegua jöke pe, jare toipɨɨ iagüe oñono tee vae, jare toñono tata pe, mbota yembopɨakatu pegua ókai oïa pe,

¹⁹ jaɨkue rupi sacerdote toipɨɨ vecha kuimbae taɨrusu vae iu oyɨgüe, jare metei mbɨyape oyembovumbae kanata güi, jare mbɨyape ipïreriasɨ vae oyembovumbae, jare toñono jókuae oñeñono tee vae ipo pe, opa güire oñapiasɨ ia oñono tee vae;

²⁰ jare sacerdote togüɨrökuavee jókuae mbota oñererökuavee oñemee yandeYa jóvai vae, kuae reta sacerdote imbaerä ko, jare vi mɨmba ipɨtiagüe jare iugüe. Kuae jaɨkue rupi ramo oñeñono tee nasareorä vae ipuere jou vino.

²¹ Kuae ko jae mborookuai, yandeYa pe oñererökuavee nasareorä oiko vaerä vae, jare mbota yandeYa pe omee vae, oipapambae reve jae ipuere rupi omee vae. Jae oñererökuavee omee vaerä vae rupi tomee, mborookuai jei rami.”

Sacerdote jei ñee kavi vae

²² YandeYa jei Moisés pe:

²³ “Ere Aarón jare taɨ reta pe, jei ñee kavi Israel iñemuña reta pe yave, tei reta körai:

²⁴ ‘YandeYa tiporerekua nderé jare taneñovatu.

²⁵ YandeYa tipɨakatu tomae nderé jare tandeparareko.

²⁶ YandeYa tanderaɨu tomae nderé jare tomee mbɨakatu ndeve.’

²⁷ Körai toenɨi reta cheree Israel iñemuña reta re, jare cheporerekuata jese reta.”