NÚMEROS 5 - Biblia Guarani Tumpa Iñee

Tumpa jóvai ikɨa vae reta oyemombo vae regua

¹ YandeYa jei Moisés pe:

² “Eyókuai Israel iñemuña reta omombo vaerä opaete ipire mbaerasɨ ókui vae, ani opaete imbaerasɨ güi taɨ oë vae, ani opaete oyemongɨa tëogüe rupi vae.

³ Kuimbae ani kuña pemombo teyupa güi ikatu pe, agüɨye vaerä omongɨa teyupa che aiko pɨpe jae reta ndive vae.”

⁴ Jökorai oyapo Israel iñemuña reta, omombo reta jókuae nunga teyupa güi ikatu pe; yandeYa oyókuai Moisés vae rami.

Mborookuai mbae yemboekovia oñemoïru reve vae regua

⁵ YandeYa jei vi Moisés pe:

⁶ “Ere Israel iñemuña reta pe: Metei kuimbae ani kuña oyapo yave ikavimbae japicha kotɨ, jókuae agüɨyeta tëi oyapo vae rupi iyoa ko che iYa kotɨ,

⁷ jókuae nunga toyemombeu jókuae iyoa re, jare opaetei tomboekovia jókuae oyapogüe jare tomoïru pandepo güi metei ye, jare tomee jókuae iyoa ikotɨ vae pe.

⁸ Ërei jókuae kuimbae oyeapo ikavimbae chupe vae omano yave, mbaetɨ yave jëtara köiño chugüi vae pe oñemee vaerä jepɨgüe yave, kuae jepɨgüe topɨta yandeYa pe, sacerdote reta peguarä; jaeramiño vi jókuae vecha kuimbae, sacerdote omee chupe Tumpa iñɨ̈ro vaerä mbaeyoa re vae.

⁹ Opaete mbaemboepɨ oñemoïru reve ani mbota oñeñono tee Tumpa pe vae güi Israel iñemuña reta omee yave sacerdote pe, topɨta jae imbaerä.

¹⁰ Opaete mbae oñeñono tee Tumpa pe vae oñemee sacerdote pe yave, topɨta jókuae sacerdote imbaerä.”

Mborookuai tägüɨro regua

¹¹ YandeYa jei vi Moisés pe:

¹² “Ere Israel iñemuña reta pe: Kia nunga vae jembireko iyaguasa yave chugüi,

¹³ oasa yave ïru kuimbae ndive, ërei ime mbaetɨ oecha, echa jae iyaguasa vɨari, mbaetɨ vi kia oecha, jare mbaetɨ vi kia oipokou jókuae teko pe,

¹⁴ jare ou yave kuae kuimbae jägüɨro jembireko re; ërei jókuae kuimbae jägüɨro jembireko re, jókuae jembireko jekombae reve yave;

¹⁵ jókuae kuimbae togüeru jembireko sacerdote jóvai, jare togüeru vi mbota, mókoi kilo cebada ikuigüe. Ërei agüɨye topɨyere iárambo olivo iasaite, ani ikäti kavi vae incienso, jare jókuae mbota güi tomee iyoa re, echa mbota tägüɨro pegua ko.

¹⁶ Sacerdote toenɨi jókuae kuña, jare toñono yandeYa jóvai.

¹⁷ Javoi sacerdote toekɨ ɨ oñeñono tee vae güi metei vaso ñaeu pegua pe; jare toipɨɨ ɨvɨkúi tupao güi jare toitɨ jókuae ɨ pe,

¹⁸ jare sacerdote tomboyemboɨ jókuae kuña yandeYa jóvai, jare toipea iñäka, toñono ipo pe mbota oporomboyekuaa vae, echa mbota tägüɨro pegua ko; jare sacerdote togüɨnoi ipo pe jókuae ɨ iro vae, yepopeyu pegua.

¹⁹ Jare sacerdote tei chupe: ‘Mbaetɨ yave kia oke nde ndive, mbaetɨ reyemongɨa aguasa pe neme güi yave, easayepe kuae ɨ iro yepopeyu pegua güi.

²⁰ Ërei reiko aguasa pe ïru vae ndive neme güi yave,

²¹ yandeYa toitɨ nderé yepopeyu, jare opaete vae tiñeeasɨ katu ndekotɨ, tituicha nderɨe jare tijëogüe nderumbɨ;

²² jare kuae ɨ yepopeyu pegua toike nderɨe pe jare tombotuicha nderɨe jare tijëogüe nderumbɨ.’ Jare jókuae kuña jeita: ‘¡Jökorai toiko, jökorai toiko!’

²³ Jayave sacerdote toikuatía yepopeyu metei tembikuatía pe, jare toyoe jókuae ɨ iro vae pe;

²⁴ jare tomee tou kuña jókuae ɨ iro vae yepopeyu pegua, jare tomboiro jɨe,

²⁵ jaɨkue rupi sacerdote toipɨɨ kuña ipo güi mbota tägüɨro pegua, jare togüɨrökuavee tomee yandeYa jóvai jare mɨmba oyeyuka oyeapɨ jese vae pe.

²⁶ Sacerdote toekɨ metei ipo mbota yemomaendúa pegua kuña re, jare toapɨ mɨmba oyeyuka oyeapɨ jese vae re, javoi tomee tou kuña ɨ iro vae. Omee güire jou ɨ iro vae;

²⁷ jókuae kuña oyemongɨa ko aguasa pe ime kotɨ yave, jókuae ɨ iro vae yepopeyu pegua jou yave, omboirota jɨe jare ombotuichata, jare tijëogüe jumbɨ; jare toiko yepopeyu rupi jëtara reta ipɨte rupi.

²⁸ Ërei jókuae kuña mbaetɨ ko oyemongɨa yave, ngaraa mbae oasa, jare imembɨ katuta.

²⁹ Kuae ko jae mborookuai tägüɨro regua, metei kuña jupiä ime kotɨ yave, iyaguasa yave;

³⁰ ani kuimbae jägüɨro jembireko re yave; togüɨraja yandeYa jóvai, jare sacerdote toyapo jese opaete kuae mborookuai.

³¹ Kuimbae mbaetɨta jeko, jare kuña toiporara iyoa re.”